Mateu 13

Nguli ya mucali

(Mar 4.1-9; Luk 8.4-8)

1Ka lona lizazi leo, Jesu a zwa mwa ndu, mi a ya kwa likamba la lisa, kw'a iz'o ina. 2#Luk 5.1-3 Kabakala buñata bwa batu ba ba ne ba til'o kubukana ku yena, a longana mwa sisepe, mi a ina mwateñi, nyangela yona i nze i yemi fa likamba. 3Cwale, a ba bulelela litaba ze ñata ka linguli.

A li, “Mulimi yo muñwi n'a il'o cala. 4Ha na nz'a hasa peu mwa simu ya hae, peu ye ñwi ya wela mwa nzila, mi ya ciwa ki linyunywani. 5Ye ñwi ya wela mwa macwe mo ne ku na ni mubu o munyinyani. Peu ya mela kapili kakuli mubu n'o si o muñata. 6Lizazi ha li pahama, mitungo ya letuka ni ku oma kakuli mibisi n'e si ka kena hahulu mwa mubu. 7Peu ye ñwi ya wela mwa mikakani, mi mikakani ha i hula, ya i pukutisa. 8Kono peu ye ñwi ya wela mwa mubu o munde, mi ya beya lico. Ye ñwi ya beya mwanda, ye ñwi mashumi a silezi, ni ye ñwi mashumi a malalu.”

9Jesu kih'a li, “Ya na ni lizebe, a utwe.”

Mulelo wa linguli

(Mar 4.10-12; Luk 8.9-10)

10Cwale balutiwa ba taha ku Jesu, mi ba mu buza, ba li, “Kiñi ha u sebelisanga linguli h'a u bulela ni bona?”

11Jesu a ba alaba, a li, “Mina mu filwe ku ziba likunutu za Mubuso wa Lihalimu, kono bona ha ba si ka fiwa cwalo. 12#Mat 25.29; Mar 4.25; Luk 8.18; 19.26 Kakuli ya na ni se siñwi, u ka ekelezwa kuli a be ni ze ñata. Kono ya si na se siñwi, u ka amuhiwa nihaili kona ka kanyinyani k'a na ni kona. 13Kikabakaleo ni sebelisa linguli ha ni bulela ni bona. Kakuli ba talima kono ha ba boni, mi ba teeleza kono ha ba utwi, kamba ku utwisisa. 14#Isa 6.9-10 Cwale, se ne si polofitilwe ki Isaya sa petahala ku bona, ha kutwi,

‘Ku utwa, mu ka utwa, kono ha mu na ku utwisisa,

ku bona, mu ka bona, kono ha mu na ku bonisisa.

15Batu ba, ha ba koni ku utwisisa lika kapili,

ba tibile lizebe za bona,

mi ba itimile kwa meeto.

Kabesicwalo, meeto a bona a ka swana a bona,

lizebe za bona li ka swana za utwa,

minahano ya bona i ka swana ya utwisisa,

mi ne ba ka swana ba sikuluhela ku na,

na ba folisa.’

16“Haili mina, mu na ni litohonolo, kakuli meeto a mina a bona, mi lizebe za mina za utwa. 17#Luk 10.23-24 Kono na mi bulelela, ni li, “Bapolofita ni batu ba Mulimu ba bañata ba lakalize ku bona ze mu bona, kono ha ba si ka li bona, mi ba lakalize ku utwa ze mu utwa, kono ha ba si ka li utwa.’

Jesu u talusa nguli ya mucali

(Mar 4.13-20; Luk 8.11-15)

18“Cwale mu teeleze, mu utwe taluso ya nguli ya mucali. 19Ba ba utwa linzwi la Mubuso kono ba sa li utwisisi, ba swana ni nzila mo ku wezi peu. Ya Maswe wa taha, mi u ba amuha se ne si calilwe mwa lipilu za bona. 20Ba bañwi ba swana ni mubu o kopani ni macwe mo ku wezi peu. Ba utwa linzwi, mi ba pakisa ku li amuhela ka tabo. 21Kono ba li tokwisa sibaka sa ku tiya hande mwa lipilu za bona. Cwale ha ku taha matomola kamba manyando kabakala linzwi la Mulimu, ba tuhela kapili. 22Ba bañwi ba swana ni mubu mo ku na ni mikakani. Ba utwa linzwi, kono maswenyeho a bupilo ni ku yembululwa ki bufumu za kena ku t'o pukutisa linzwi, mi la palelwa ku beya miselo. 23Kono ba teñi ba ba swana ni mubu o munde. Bao ba utwa linzwi, ba li amuhela ka kutwisiso mi ba beya miselo. Ba bañwi ba beya mwanda, ba bañwi mashumi a silezi, ni ba bañwi mashumi a malalu.”

Nguli ya mufuka

24Jesu a ba bulelela nguli ye ñwi hape, a li, “Mubuso wa Lihalimu u swana ni mutu ya cezi peu ye nde mwa simu ya hae. 25Zazi le liñwi, busihu, batu ha ba lobezi, kwa taha sila sa hae. Sa t'o cala mufuka mwa buloto, mi sa ikela. 26Cwale, buloto ha bu se bu hulile ni ku beya, mufuka wa bonahala ni ona. 27Batanga ba hae ba taha ku yena, mi ba li, ‘Mulena, n'o cezi peu ye nde mwa simu ya hao. Kanti mufuka o mwateñi u zwa kai?’ 28A ba alaba, a li, ‘Ki sila, se si ezize cwalo.’ Batanga kiha ba mu buza, ba li, ‘Kana wa lata kuli lu y'o kumula mufuka mwateñi?’ 29A alaba, a li, ‘Batili, kakuli mu ka swana mwa kumula ni bona buloto ha mu nze mu kumula mufuka. 30Mu li tuhele li hule, bubeli bwa zona cwalo, ku fitela nako ya kutulo, mi ka nako yeo ni ka li kwa bakutuli, ‘Mu kumule mufuka pili, mu u tame mañata, u ciswe. Buloto bona mu bu kubukanye, mu bu beye mwa sishete sa ka.’ ”

Nguli ya peu ya masitete

(Mar 4.30-32; Luk 13.18-19)

31Hape Jesu a ba bulelela nguli ye ñwi, a li, “Mubuso wa Lihalimu u swana ni peu ya masitete y'a cezi mutu mwa simu ya hae. 32Yeo ki peu ye nyinyani hahulu-hulu. Kono ha i se i hulile, i fetuha kota ye tuna ku fita limela ze ñwi kamukana. I ba kota, mi linyunywani li t'o yaletela mwa mitai ya yona.”

Nguli ya mumela

(Luk 13.20-21)

33Jesu a ba bulelela nguli ye ñwi hape, a li, “Mubuso wa Lihalimu u swana ni mumela w'a nga musali ni ku u kopanya ni bupi, ku fitela liñende kaufela li huhumuha.”

Jesu n'a sebelisezañi linguli

(Mar 4.33-34)

34Jesu a bulela zeo kaufela kwa nyangela ka linguli. N'a sa buleli feela a sa sebelisi linguli. 35#Lipi 78.2 N'a eza cwalo ku taleleza ze ne bulezwi ki mupolofita, ha n'a ize,

“Ni ta sebelisa linguli, ha ni bulela ni bona.

Ni ta ba bulelela lika ze sa zibwi,

ha i sa li lifasi li ezwa.”

Jesu u talusa nguli ya mufuka

36Cwale Jesu a siya nyangela, mi a kena mwa ndu. Balutiwa ba hae ba taha ku yena, mi ba li, “U lu taluseze nguli ya mufuka wa mwa simu.”

37Jesu a alaba, a li, “Ya cala peu ye nde ki Mwan'a Mutu. 38Simu ki lona lifasi. Peu ye nde ki bona batu ba ba li ba Mubuso. Mufuka ki bona batu ba ba li ba Ya Maswe. 39Sila se si til'o cala mufuka ki Satani kasibili. Kutulo ki yona nako ya mafelelezo a lifasi, mi bakutuli ki mangeloi. 40Sina mufuka ha u kumulwa ni ku ciswa mwa mulilo, ku ta ba cwalo kwa mafelelelzo a lifasi. 41Mwan'a Mutu u ta luma mangeloi a hae ku zwisa mwa Mubuso wa hae ba ba sitatalisa ba bañwi ni ba ba eza ze maswe kaufela. 42Mi ba ta nepelwa mwa lyangalilo, mo ba ta y'o lila ni ku kweca meeno. 43Kono batu ba ba mamela za Mulimu, bona, ba ta benya sina lizazi mwa Mubuso wa Ndat'a bona. Ya na ni lizebe, a utwe!

Nguli ya bufumu bo bu patilwe

44“Mubuso wa Lihalimu u swana ni bufumu bo bu patilwe mwa simu. Mutu a bu fumana, mi a bu pata hape. Ka ku taba hahulu a ya, a y'o lekisa z'a na ni zona kaufela, mi a kuta a t'o leka simu yeo.

Nguli ya licwe la butokwa

45“Hape, Mubuso wa Lihalimu u swana ni mulekisi ya bata macwe a mande a butokwa. 46H'a fumani le li tula hahulu, a ya, a y'o lekisa z'a na ni zona kaufela, mi a t'o itekela lona.

Nguli ya lituwa

47“Hape Mubuso wa Lihalimu u swana ni lituwa le li nepezwi mwa lisa, le li swasa litapi za mifuta-futa. 48Ha li tezi, mandui ba li hohela fa likamba, mi ba ina fafasi ku keta litapi. Ze nde ba li beya mwa lizuma, mi ze maswe ba li yumba. 49Ku ta ba cwalo kwa mafelelezo a lifasi. Mangeloi a ta keta batu ba ba maswe ku ba bande. 50A ka ba nepela mwa lyangalilo. Mo, ba ta lila ni ku kweca meeno.”

Bufumu bwa kale ni bo bunca

51Jesu a ba buza, a li, “Kana mwa utwisisa litaba ze?”

Ba alaba, ba li, “Ee, lwa utwisisa.”

52Kih'a li ku bona, “Kifohe, Muluti wa Mulao kaufela ya itutile za Mubuso wa Lihalimu u swana ni muñ'a ndu ya zwisa ze nca ni za kale mwa sibulukelo sa hae.”

Batu ba Nazareta ba hana ku lumela ku Jesu

(Mar 6.1-6; Luk 4.16-30)

53Jesu ha s'a felize ku bulela linguli ze, a zwa fo. 54A kutela kwa munzi wa habo mi a luta batu mwa sinagoge ya bona. Ba ba ne ba li teñi kaufela ba komoka hahulu, ba li, “Butali ni maata a ku eza limakazo zeo u li fumani kai? 55Kana ha si yena mwan'a mubeti? M'ahe ha si Maria, nji? Jakobo, Josefa, Simoni ni Juda ha si bahabo yena? 56Kana likaizeli za bona kaufela ha ba ini mo ku luna? Cwalehe, zeo kamukana u li fumani kai?” 57#Joa 4.44 Mi ne ba palelwa ku lumela ku yena.

Jesu kiha li ku bona, “Mupolofita u kutekiwa kai ni kai, konji mwa munzi wa habo, ni mwa lapa la habo.” 58Mi h'a si ka eza limakazo ze ñata mwateñi kakuli ne ba si na tumelo.

Currently Selected:

Mateu 13: Lozi09

Highlight

Copy

Compare