Malivi 7
7
Litabelo za ku lifa milatu
1“Ye, ki yona milao ya litabelo za ku lifa milatu. Ki mpo ye kenile hahulu. 2Folofolo ya sitabelo se, i na ni ku bulaelwa kwa neku la mutulo wa katala, fo ku bulaelwanga lifolofolo za litabelo za ku cisa, mi mali a yona a na ni ku selwa fa maneku a mane a katala. 3Lisuzo la yona kaufela li zwisiwe, mi li beiwe fa katala, ili lisuzo la muhata, ni la muteto. 4A zwisiwe lipio ni lisuzo la zona cwalo, hamoho ni lisuzo kaufela la kwa sibiti. 5Muprisita u ta ciseza lisuzo leo kamukana fa katala ku ezeza Muñ'a Bupilo sitabelo sa mpo ya lico. Ki sitabelo sa tifo ya mulatu. 6Mwan'a muprisita wa munna kaufela u lukela ku ca sitabelo se. Sona, si swanezi ku celwa mwa sibaka se si tompeha, kakuli ki sitabelo se si kenile hahulu.
7“Ku na ni mulao u li muñwi o sebeza kwa sitabelo sa ku zwisa sibi ni sa ku lifa milatu. Nama ki ya muprisita ya eza sitabelo. 8Litalo la folofolo ye ezizwe sitabelo sa ku cisa ki la muprisita ya ezize sitabelo seo. 9Limpo za lico kaufela ze besizwe mwa sibesezo, kamba ze lukiselizwe mwa pani kapa fa mukeke, ki za muprisita ya li ezelize Mulimu sitabelo. 10Kono limpo za lico za bubeke ze si ka apehiwa, i be ze kopanyizwe ni mafula kapa ze omile, ki za baprisita ba mba ya Aruni kaufela, mi ba lukela ku abelwa hande ka ku likana.
Litabelo za ku tiisa bulikani
11“Ye, ki yona milao ya litabelo za ku tiisa bulikani ze ezezwa Muñ'a Bupilo. 12Haiba mutu a eza sitabelo se sa ku itumela ku Mulimu, u lukela ku tisa folofolo ye ka eziwa sitabelo, ni sinkwa se si si na mumela. I ta ba linkwa ze tuna ze ezizwe ka bupi bo bu kopanyizwe ni mafula a olive, kamba ze nyinyani ze lambilwe mafula a olive, kapa mañende a munati a ezizwe ka bupi bo bu kopanyizwe ni mafula. 13Fahalimw'a zeo, a tise linkwa ze besizwe ni mumela. 14A fe kalulo ye ñwi ya sinkwa sa mushobo o muñwi ni o muñwi kuli i be mpo ye nde ye ketezwi Muñ'a Bupilo. Yona mpo yeo ki ya muprisita ya ta nga mali a folofolo ni ku a sela fa katala. 15Nama ya folofolo yeo i swanezi ku ciwa ka lona lizazi le ne i bulailwe. Ha ku na nama ye ka bulukiwa ku fitela habusa.
16“Haiba mutu a tisa mpo ya sitabelo sa ku tiisa bulikani, ili ku taleleza buitamo, kamba mpo y'a fa Muñ'a Bupilo ka ku lata, sitabelo seo ha si swaneli ku celelwa ka lona lizazi leo le si eziwa, kono se si siyezi ku sona si kona ku ciwa habusa. 17Nama kamukana ye sa siyezi ku fitela ka la bulalu i swanezi ku ciswa. 18Haiba ye ñwi ya yona i ciwa la bulalu, Mulimu h'a na ku amuhela mpo ya mutu yo. Mpo yeo ha i na ku balwa kuli ki ye nde kwa neku la hae, kono i ta ngiwa feela kuli ki mpo ye si ka kena, mi mutu kaufela ya i ca u ta izieza. 19Haiba nama i ka kopanyiwa ni nto ye si ka kena, ha i lukeli ku ciwa, kono i swanezi ku ciswa mwa mulilo.
“Mutu kamukana ya kenile u lukela ku ca nama yeo. 20Kono ha i ciwa ki ya si ka kena, mutu yo h'a sa na ku balwa kuli ki yo muñwi wa batu ba Mulimu. 21Hape mañi ni mañi ya ka ca nama yeo ha s'a sweli sifi ni sifi se si ka kena, i ka ba kwa neku la mutu kapa folofolo, h'a sa na ku balelwa kwa batu ba Mulimu.
22Muñ'a Bupilo a fa Mushe milao. 23Mushe n'a na ni ku bulelela kuli, “Ha ku na ya ta ca lisuzo la komu, la ngu kamba la puli. 24Lisuzo la folofolo ye ishwezi, kapa ye bulailwe ki sibatana ha li lukeli ku ciwa, kono li itusiswe ka mukwa o muñwi. 25Mutu kaufela ya ca lisuzo la folofolo ye ta ezezwa Muñ'a Bupilo sitabelo sa ku ca, h'a sa na ku balelwa kwa batu ba Mulimu. 26#Sim 9.4; Malivi 17.10-14; 19.26; Mul 12.16, 23; 15.23 Maisilaele, ko ba pila kaufela, ba si ke ba itusisa ni kamuta mali a nyunywani kamba a folofolo mwa lico za bona. 27Mutu ufi ni ufi ya loba mulao wo h'a sa na ku balelwa kwa batu ba Mulimu.”
28Muñ'a Bupilo hape a fa Mushe milao yeo ye tatama. 29Mushe n'a na ni ku bulelela batu ba Isilaele kuli, “Mutu kaufela ya eza sitabelo sa ku tiisa bulikani u swanezi ku fitisa kalulo ye ñwi ku Muñ'a Bupilo. 30A si tise, ili yena, ka mazoho a hae, sina mo ku ezezwanga ka mpo ya sitabelo sa lico. A tise lisuzo la folofolo ni sifuba sa yona, mi li be mpo ya Muñ'a Bupilo. 31Muprisita u ta ciseza lisuzo leo fa katala, kono haili nama ya sifuba, yona, i ta ba ya baprisita. 32Silupi sa bulyo sa folofolo i ta ba mpo ya ipetezi. 33Mpo ye ki ya muprisita ya ezeza Muñ'a Bupilo sitabelo sa ku tiisa bulikani ka mali ni lisuzo. 34Sifuba sa folofolo ki mpo ye nde hahulu, mi silupi sa bulyo sa folofolo ki kabelo ya Muñ'a Bupilo y'a ngile kwa batu ba Isilaele ku i fa baprisita. Ye ki tukelo ye ba swanezi ku ezezwa ki batu ba Isilaele ka linako ze taha kaufela. 35Ye, ki yona kalulo ya litabelo za lico ye ne abezwi Muñ'a Bupilo, mi ye n'e ngilwe ni ku fiwa Aruni ni bana ba hae lizazi le ba tiiswa ku ba baprisita. 36Ka lona lizazi leo, Muñ'a Bupilo a laela batu ba Isilaele ku fa ba mba ya Aruni kalulo ye ya sitabelo. Ki mulao o ba swanezi ku buluka Maisilaele kuya kuile.”
37Cwale ye ki yona milao ya litabelo za ku cisa, litabelo za lico za bubeke, litabelo za swalelo ya libi, litabelo za ku lifa milatu, litabelo za ku beiwa fa buprisita ni litabelo za ku tiisa bulikani. 38Muñ'a Bupilo a fa Mushe milao ye kaufela fa Lilundu la Sinai, ili mwa lihalaupa ka lona lizazi l'a n'a bulelezi Maisilaele ku eza litabelo za bona.
Currently Selected:
Malivi 7: Lozi09
Highlight
Copy
Compare
Share
Want to have your highlights saved across all your devices? Sign up or sign in
Lozi Interconfessional Bible, Catholic Edition © Bible Society of Zambia, 2009.
