Malivi 6

1 # Lipa 5.5-8 Hape Muñ'a Bupilo a fa Mushe milao ye. 2A li, “Ku na ni mulatu haiba mutu a foseza Muñ'a Bupilo ka ku hana ku kutiseza mwanahabo wa Muisilaele mali a n'a siyezi ku yena, kapa ka ku mu uzweza se siñwi, kamba ka ku mu puma. 3Ku na ni mulatu hape ka ku bulela buhata ka za sika se ne si latehile mi a konka kuli h'a si ka si fumana. 4Mutu h'a fosa ka mukwa wo, u na ni ku lifa z'a fumani kaufela ka mukwa o sa swaneli. 5Ka lona lizazi leo l'o fumanehile mulatu, u na ni ku lifela muñ'a zona ka ku tala. Hape a ekeze fateñi tifo ye likana ni kalulo ya buketalizoho. 6Mpo ya tifo ya hae, ili ngu ya poho kamba puli ye si na fo i nyazahala, a i tise ku muprisita. Teko ya yona i ka tomwa ka ku latelela mulao. 7Muprisita u ta eza sitabelo sa foso ya mutu, mi mutu yo u ta swalelwa.”

Limpo ze ciselezwa mutumbi

8Muñ'a Bupilo a fa Mushe litaelo. 9Mushe n'a na ni ku fa Aruni ni bana ba hae milao ya litabelo za ku cisa. Sitabelo sa ku cisa si na ni ku siyala fa katala busihu kaufela, mi mulilo u na ni ku tuka nako kamukana. 10Cwale muprisita ha s'a apezi siapalo sa hae se sinde sa buprisita ni kaputula ka hae ka kande cwalo ka line, u ta zwisa mulola wa lisuzo o siyezi fa katala, mi a u beye kwa tuko a kona. 11Cwale kihona a ta cinca liapalo za hae ni ku nga mulola wo, a u zwise mwa mafulo, a u ise kwa sibaka se si swaneleha. 12Mulilo wa fa katala u swanezi ku tuka cwalo, mi u si ke wa liselwa u tima. Ka zazi ni zazi kakusasana, muprisita u ta na a beya fateñi likota, a lukise limpo za ku cisa, mi cwale a cise lisuzo la sitabelo sa ku tiisa bulikani. 13Mulilo u swanezi ku tuka cwalo fa katala, mi u si ke wa liselwa u tima.

14Ki ye milao ya limpo za lico za bubeke. Muprisita wa lusika lwa Aruni u ta fa Muñ'a Bupilo mpo ya lico fapil'a katala. 15Cwale kihona a ta nga bupi bwa buloto ni mafula, mi insense kaufela, mi a ciseze fa katala kalulo ya zona ye bonisa kuli kaufel'a zona lico zeo li filwe Muñ'a Bupilo. Muunko wa mpo ye u tabisa Muñ'a Bupilo hahulu. 16Baprisita ba ta ca ze siyezi kaufela. Li ta eziwa linkwa, mi li celwe mwa sibaka se si tompeha, ili mwa lapa la Tende ya Kopano. 17Linkwa zeo li beswe li si ka umelwa. Muñ'a Bupilo u ba file zona ku ba kabelo ya bona ya limpo za lico. Li kenile hahulu sina litabelo za ku zwisa libi ni za ku felisa milatu. 18Ka nako ye taha kaufela, bana ba mba ya Aruni ba banna ba ka zwelapili ku li ca kakuli ki yona kabelo ya bona ya lico ze filwe Muñ'a Bupilo. Mutu kamba sika sifi ni sifi se si ngunyuta sico se si filwe Muñ'a Bupilo si ta ba se si kenile.

19Muñ'a Bupilo a fa Mushe milao ye. 20N'e li ya mo ku ketelwa baprisita ba mba ya Aruni. Ka lona lizazi leo l'a beiwa fa buprisita, u na ni ku fa Muñ'a Bupilo bupi bwa buloto bo bu likana komoki i liñwi ye tezi, ili bo bu likana ni mpo ya bubeke ye fiwa ka zazi ni zazi. A fe licika la teñi kakusasana, ni le liñwi manzibwana. 21Bupi bo, bu kopanyiwe ni mafula mi bu beswe fa pani. Cwale kihona bu ta pumakwa ni ku beiwa sina mpo ya bubeke, ili muunko o tabisa Muñ'a Bupilo hahulu. 22Ka linako kaufela ze taha, mpo ye i na ni ku eziwa ki wa mba ya Aruni kamukana ya li muprisita yo muhulu. Mpo yeo i ta ciswa kaufel'a yona, i be sitabelo se si filwe Muñ'a Bupilo. 23Ha ku na kalulo ya mpo ya bubeke bw'a sebeza muprisita bo bu ta ciwa. Bu lukela ku ciswa kamukana.

Litabelo za ku zwisa sibi

24Muñ'a Bupilo a fa Mushe litaelo. 25Mushe n'a na ni ku fa Aruni ni bana ba hae milao ya litabelo za ku zwisa sibi. A li, “Folofolo ya sitabelo sa ku zwisa sibi i na ni ku bulaelwa kwa neku la mutulo wa katala, fo ku bulaelwanga lifolofolo za litabelo za ku cisa. Ye ki mpo ye kenile hahulu. 26Muprisita ya eza sitabelo ka folofolo ye, u ta i cela mwa sibaka se si tompeha, ili mwa lapa la Tende ya Kopano. 27Mutu kamba sika sifi ni sifi se si ka ngunyuta nama ya folofolo yeo, si ta keniswa ki ku kena kwa yona. Haiba siapalo si lambilwe ki mali a folofolo, si swanezi ku tapisezwa mwa sibaka se si tompeha. 28Piza ya lizupa kaufela mo ne ku apehilwe nama yeo i swanezi ku tubwa, kono haiba ki ya sipi, i lukela ku faliwa ni ku tapiswa ka mezi. 29Bana ba baprisita ba banna ba swanela ku ca sitabelo se. Si kenile hahulu. 30Kono haiba ku na ni mali a mañwi a tisizwe mwa Tende ya Kopano, mi a itusisizwe kwa ku zwisa sibi, folofolo yeo ha i lukeli ku ciwa. I swanezi ku ciswa.

Currently Selected:

Malivi 6: Lozi09

Highlight

Copy

Compare