Malivi 5

Milatu ye zwiswa ki litabelo za lifoso

1Litabelo za lifoso li batahala mwa milatu yeo ye tatama.

Haiba mutu a utwa kuli u bizezwa kwa kuta ku y'o fa bupaki, mi a hana ku fa bupaki bwa z'a n'a boni kamba z'a n'a bulelezwi, fo u mulatu.

2Haiba ka ku sa tokomela, mutu a swala sika se si si ka kena, sina folofolo ye ishwezi, u na ni masila, mi u mulatu ku zwa f'a lemuhezi kezo y'a ezize.

3Haiba ka ku sa tokomela, mutu a swala nto ye si ka kena, ili ya mubili wa mutu, i ka ba ifi kamba ifi, u mulatu ku zwa f'a lemuhezi kezo y'a ezize.

4Haiba ka ku sa tokomela, mutu a akufela ku itama, i ta ba ka buitamo bufi kamba bufi, mutu yo u mulatu a sa ziba feela s'a ezize.

5Mutu h'a fosize, u swanezi ku itumelela sibi sa hae. 6Ka mulatu w'a ezize u lukela ku tiseza Muñ'a Bupilo ngu kamba puli ye sihali ya sitabelo. Muprisita u ta mu ezeza sitabelo sa ku zwisa mulatu wa hae.

7Haiba mutu a palelwa ku tisa ngu kamba puli, u swanezi ku tiseza Muñ'a Bupilo maiba a mabeli, kamba linkwilimba ze peli, li be tifo ya mulatu wa hae. Ye ñwi ki ya sitabelo sa foso, mi ye ñwi ki ya sitabelo sa ku cisa. 8A li tise ku muprisita ya ta kala pili ku fitisa ku Muñ'a Bupilo nyunywani ya sitabelo sa foso. U ta i loba mulala a sa i pumi toho. 9U ta fafaza mali a yona a mañwi kwatukw'a katala. Mali a siyezi mwa mubili kaufela a ta lotisezwa mwatas'a katala. Ki yona mpo ya ku zwisa mulatu. 10Cwale kihona a ta eza nyunywani ya bubeli sitabelo sa ku cisa ka ku latelela milao. Ka mukwa wo, muprisita u ta eza sitabelo sa foso ya mutu, mi u ta swalelwa.

11Haiba mutu a sa koni ku tisa maiba a mabeli kapa linkwilimba ze peli, a tise komoki ye tezi ya bupi bwa buloto ku eza mpo ya sitabelo sa ku zwisa milatu. A si ke a bu beya mafula a olive kamba insense, kakuli ha si sitabelo sa lico kono ki sa sibi. 12A bu tise ku muprisita ya ta ñwata mwateñi lizoho le li tezi, ku bonisa kuli lika kaufela li ketezwi Muñ'a Bupilo, ni ku bu ciseza fa katala inge sitabelo sa lico. Se ki sitabelo sa ku zwisa mulatu. 13Ka mukwa wo, muprisita u ta eza sitabelo sa foso ya mutu, mi u ta swalelwa. Bupi bo bu ta siyala fateñi kaufela bu ta ba bwa muprisita, sina mo ku inezi ka sitabelo sa lico.

Limpo za litifo

14Muñ'a Bupilo u file Mushe milao ye, a li, 15“Haiba mutu kaufela a eza foso a sa leli ku eza cwalo, ka ku palelwa ku lifa litifo za Muñ'a Bupilo, a tise ngu ya poho kamba puli ye si na fo i nyazahala, i be mpo ya tifo ya hae ku Muñ'a Bupilo. Teko ya yona i ta tomwa ka ku latelela mulao. 16Hape u swanezi ku lifa litifo z'a n'a palezwi ku lifa, mi ka ku ekeza ku zeo u lukela ku lifa tifo ya kalulo ya buketalizoho. A i fe muprisita, mi yena muprisita a eze folofolo yeo sitabelo sa mulatu wa mutu yo, mi u ta swalelwa.

17“Haiba mutu ufi ni ufi a fosa ka ku loba o muñwi wa milao ya Muñ'a Bupilo ka ku sa tokomela, yo u mulatu, mi u lukela ku lifa mulatu wo. 18U swanela ku tisa ku muprisita ngu ya poho kamba puli ye si na fo i nyazahala, ili mpo ya sitabelo sa tifo. Teko ya yona i ka tomwa ka ku latelela mulao. Cwale muprisita u ta eza sitabelo sa foso ya mutu, mi u ta swalelwa. 19Ye ki mpo ya tifo ya mulatu w'a n'a foselize Muñ'a Bupilo.”

Currently Selected:

Malivi 5: Lozi09

Highlight

Copy

Compare