Malivi 4
4
Litabelo za lifoso ze si ka ezwa ka bomu
1Muñ'a Bupilo a fa Mushe litaelo. 2Mushe n'a na ni ku bulelela batu ba Isilaele kuli haiba mutu a fosa, mi a loba mulao wa Muñ'a Bupilo a si ka lela ku eza cwalo, u swanezi ku buluka litaelo ze.
3Haiba ki muprisita yo muhulu ya fosa ni ku fosisa batu, u swanezi ku ezeza Muñ'a Bupilo sitabelo sa poho ye sa li ye nyinyani, ye sa nyazahali, kuli foso ya hae i swalelwe. 4A tise poho yeo kwa munyako wa Tende ya Kopano. A beye lizoho la hae fa toho ya yona, mi a i bulaele hona fo fapil'a Muñ'a Bupilo. 5Cwale muprisita yo muhulu u ta nga mali a mañwi a poho yeo mi a' ise mwa Tende. 6A cupwe munwana wa hae mwa mali hasupile, mi a fafaze mali ao fapil'a lisila le li kenile. 7Cwale a beye mali a mañwi fa manaka a mwa malulu a katala ka insense, mwa Tende ya Kopano. Mali a siyezi kaufela a' sele kwatas'a katala ka ka cisezwanga litabelo, ili ka ka inzi kwa munyako wa Tende. 8Hape a nge lisuzo la yona poho ye, ni lisuzo la muteto kaufela. 9A nge ni lipio ni lisuzo la zona, hamoho ni lisuzo kaufela la fa sibiti. 10Kamukwaoswana ni mo ne ku ezelizwe lisuzo la poho ye ne bulaezwi sitabelo sa ku tiisa bulikani, muprisita u ta nga lisuzo le, mi u ka li ciseza fa katala ka ka ezezwanga litabelo za ku cisa. 11Kono u ta nga litalo la yona, nama ya yona kaufela, toho, mahutu ni za mwa mba hamoho ni mala a yona. 12Zeo kaufela u ta li isa kwand'a mafulo kwa sibaka se si swaneleha, ili fo ku sululelwanga mulola, mi a y'o li ciseza fateñi ka mulilo wa likota.
13Haiba ki batu kaufela ba Isilaele ba ba fosa ka ku loba o muñwi wa milao ya Muñ'a Bupilo, ba si ka lela ku eza cwalo, ba na ni mulatu. 14Foso yeo i sa zibahala feela, batu bao ba tise nkomwana ya poho, ba t'o i eza sitabelo sa mulatu wa bona. Ba i tise kwa Tende ya Kopano. 15Baeteleli ba batu bao ba ta beya mazoho a bona fa toho ya yona, mi i ta bulaelwa hona fo. 16Mi muprisita yo muhulu u ta isa mali a yona a mañwi mwahal'a Tende ya Kopano. 17Kih'a ka cupwa munwana wa hae mwa mali hasupile ni ku a fafaza fapil'a lisila la mwahali. 18Muprisita yo muhulu u ta lamba mali a mañwi fa manaka a kwa malulu a katala ka insense, mwahal'a Tende ya Kopano, ni ku sela a siyezi kamukana kwatas'a katala ka litabelo za ku cisa ka ka kwa munyako wa makenelo a mwa Tende. 19Cwale kihona a ta nga lisuzo la yona kamukana, a li ciseza fa katala. 20Poho ye u ta i eza ka mukwa o swana ni wa poho ya sitabelo sa ku zwisa libi, mi wo ki ona mukwa w'a ta ezanga ka ona muprisita litabelo za lifoso za batu, mi li ta swalelwa. 21Cwale u ta isa poho yeo kwand'a mafulo ni ku y'o i cisa sina mw'a cisezanga poho ya sitabelo sa foso ya hae luli. Se, ki sona sitabelo sa ku zwisa lifoso za batu.
22Haiba ki mubusi ya fosa ka ku loba o muñwi wa milao ya Muñ'a Bupilo a si ka lela ku eza cwalo, u ka ba ni mulatu. 23Kapili-pili, a sa lemuswa feela foso yeo, a tise puli ya poho ye si na fo i nyazahala, a t'o eza sitabelo. 24U ta beya lizoho fa toho ya yona, mi a i bulaele kwa neku la mutulo wa katala fo ku bulaelwanga lifolofolo za litabelo za ku cisa. Se, ki sona sitabelo sa ku zwisa milatu. 25Muprisita u ta cupwa munwana wa hae mwa mali a folofolo, mi u ta a lamba fa manaka a kwa malulu a katala, mi a sele a siyezi kaufela kwatas'a katala. 26Cwale kihona a ta ciseza lisuzo la yona kaufela fa katala sina mw'a ezezanga ka lisuzo la lifolofolo ze bulaelwanga litabelo za ku tiisa bulikani. Ka mukwa wo, muprisita u ta eza sitabelo sa foso ya mubusi, mi u ta swalelwa.
27 #
Lipa 15.27-28
Haiba ki yo muñwi wa batu feela ya fosize ka ku loba o muñwi wa milao ya Mulimu a si ka lela ku eza cwalo, u ka ba ni mulatu. 28A sa lemuswa feela foso yeo, a tise puli ye sihali ya sitabelo, ili ye si na fo i nyazahala. 29U ta beya lizoho fa toho ya yona, mi a i bulaele kwa neku la mutulo wa katala fo ku bulaelwanga lifolofolo za litabelo za ku cisa. 30Muprisita u ta cupwa munwana wa hae mwa mali a folofolo, mi a' lambe fa manaka a kwa malulu a katala ni ku sela mali a siyezi kaufela mwatasa'a katala. 31Cwale u ta zwisa lisuzo la yona kamukana sina mw'a li zwisezwanga kwa lifolofolo za litabelo za ku tiisa bulikani, mi a li ciseze fa katala ku eza muunko o tabisa Muñ'a Bupilo. Wo ki ona mukwa w'a ka eza ka ona muprisita sitabelo sa foso ya mutu, mi u ta swalelwa.
32Haiba mutu a tisa ngu ya sitabelo sa foso, i swanezi ku ba ye sihali, mi ili ye si na fo i nyazahala. 33U ta beya lizoho fa toho ya yona, mi a i bulaele kwa neku la mutulo wa katala, fo li bulaelwanga lifolofolo za litabelo za ku cisa. 34Muprisita u ta cupwa munwana wa hae mwa mali a folofolo, mi a' sase fa manaka a kwa malulu a katala ni ku sela mali a siyezi mwatas'a katala. 35Cwale kihona a ta zwisa lisuzo la yona kaufela sina mo ku zwisezwanga lisuzo la lingu ze bulaelwanga litabelo za ku tiisa bulikani, ni ku li ciseza fa katala hamoho ni limpo za lico ze filwe Muñ'a Bupilo. Ka mukwa wo, muprisita u ta eza sitabelo sa foso ya mutu, mi u ta swalelwa.
Currently Selected:
Malivi 4: Lozi09
Highlight
Copy
Compare
Share
Want to have your highlights saved across all your devices? Sign up or sign in
Lozi Interconfessional Bible, Catholic Edition © Bible Society of Zambia, 2009.
