Malivi 22
22
Ku kena kwa limpo
1Muñ'a Bupilo a fa Mushe litaelo. 2Mushe n'a na ni ku taluseza Aruni ni bana ba hae kuli, “Mu kuteke hande limpo ze kenile ze ni tisezwa ki batu ba Isilaele, ili kuli libizo la ka le li kenile li si ke la tompololwa. Ki na Muñ'a Bupilo. 3Haiba yo muñwi wa baikulu ba mina a sutelela fakaufi ni limpo ze kenile ze ni tiselizwe ki batu ba Isilaele, a nz'a silafezi, h'a sa na ku bonahala hape fapil'a ka ni kamuta. Ku ta ba cwalo kuya kuile. Ki na Muñ'a Bupilo.
4“Ha ku na wa lusika lwa Aruni, ya na ni butuku bwa mbingwa bo bu yambukela kamba bwa sooya, ya ta ca kwa lico ze kenile, konji ha s'a kenile ka mulao. Muprisita kamukana ya swala nto ifi ni ifi ye silafalizwe ka ku kopana ni situpu, kapa muprisita ya shamile mushamo wa lupepo, yena u silafezi. 5Ya sweli folofolo kamba mutu ya silafezi, ni yena u silafezi. 6Muprisita kamukana ya silafala, u ta ina cwalo a silafezi ku fitela manzibwana, mi niha i ka ba cwalo h'a na ku ca kwa limpo ze kenile ku fitela ha s'a tapile. 7Lizazi ha li se li likezi, u ta ba ya kenile, mi cwale u ta ca kwa limpo ze kenile ze li lico za hae. 8H'a na ku ca nama ya folofolo ye ishwezi kamba ye bulailwe ki libatana. I ta mu silafaza. Ki na Muñ'a Bupilo.
9“Baprisita kaufela ba ta buluka milao ye, ye ni ba file. Hakusicwalo ba ta ba ni mulatu, mi ba swanezi ku bulaiwa kabakala ku tula milao yeo ye kenile. Ki na Muñ'a Bupilo ya ba kenisa.
10“Ha ku na ye si wa lusika lwa baprisita, nihaiba ya ina ni muprisita kamba ya beleka ku yena, ya ka ca limpo ze kenile. 11Kono batanga ba muprisita, ba ba lekilwe ka mali, kapa ba ba pepezwi mwa lapa la hae, ba lukela ku ca lico z'a fiwa muprisita. 12Mwan'a muprisita ya nyalwa ki mutu feela ye si muprisita, a si ke a ca kwa lico zeo za limpo ze kenile. 13Kono mwana wa musizana ya shwezwi ki munna, kamba ya lelekilwe, ya si na bana, mi ili ya kutezi ku t'o pila mwa ndu ya ndat'ahe, u lukela ku ca lico z'a fiwa ndat'ahe, ili kabelo ya buprisita. Ha ku na ye si wa lusika lwa buprisita ya ka ca kwa lico zeo.
14“Haiba mutu ye si wa lusika lwa buprisita a ca ye ñwi ya limpo ze kenile a sa ezi ka bomu, u swanezi ku i lifa muprisita hamoho ni kalulo ya buketalizoho ya teko ya yona. 15Baprisita ba si ke ba silafaza limpo ze kenile. 16Baprisita ba si ke ba tuhelela mutu ya sa lumelelwi ka mulao kuli a li ce. Kezo yeo i ka tiseza mutu ya cwalo mulatu. Ki na Muñ'a Bupilo ya kenisa limpo zeo.”
17Muñ'a Bupilo a fa Mushe litaelo. 18Mushe n'a na ni ku bulelela Aruni ni bana ba hae ni batu kaufela ba Isilaele milao ye, ye tatama, ye li, “Muisilaele kaufela kamba mulicaba ya pila mwa Isilaele h'a eza sitabelo sa ku cisa, i ka ba sa ku taleleza buitamo kamba sa mpo y'a fa ka tato ya hae, folofolo ya sitabelo seo i swanezi ku ba ye si na fo i nyazahala. 19Hape i lukela ku ba ya poho ye si na fo i nyazahala kuli i amuhelwe. 20#Mul 17.1 Haiba u tisa folofolo ye na ni fo i nyazahala, Muñ'a Bupilo h'a na ku i amuhela. 21Mutu kamukana h'a tisa mpo ya sitabelo sa ku tiisa bulikani ku Muñ'a Bupilo, i ka ba ya ku taleleza buitamo kamba mpo feela y'a fa ka tato ya hae, folofolo ya sitabelo seo i swanezi ku ba ye si na fo i nyazahala, haiba a lata kuli si amuhelwe. 22Mu si ke mwa tiseza Muñ'a Bupilo folofolo ye shwile meeto, ye holofezi, ye fahuzwi, ya sitombo se si zwa bulalu, ya sikwekwe, ye kubuhile kapa ya litombo-tombo. Mu si ke mwa fitisa ye ñwi ya lifolofolo ze cwalo fa katala ku ezeza Muñ'a Bupilo sitabelo sa lico. 23U kona ku tisa folofolo, ya mpo y'o fa ka lilato la hao, ili folofolo ye kokile kapa ye nyazahala, kono yeo ha i lumelelwi kwa ku eza sitabelo sa buitamo. 24Mu si ke mwa fa Muñ'a Bupilo folofolo ye tubilwe sisete, ku pumeha, ku pyatwa, kamba ku pazuha fahali. Taba yeo ha i lumelelwi mwa naha ya habo mina.
25“Mu si ke mwa eza sitabelo sa lico ka folofolo ye tisizwe ki mulicaba. Lifolofolo ze cwalo li maswe, mi ha li lumelelwi.”
26Muñ'a Bupilo a bulelela Mushe, a li, 27“Namani, ngunyana, kamba pulinyana ha i zwezwi, ha i lukeli ku zwiswa ku m'a yona ku si ka fita mazazi a supile, kono ku zwa fo ya lumelelwa ku eziwa sitabelo sa lico. 28Mu si ke mwa eza komu ni mwan'a yona kamba ngu ni mwan'a yona sitabelo ka lizazi li li liñwi. 29Ha mu ezeza Muñ'a Bupilo sitabelo sa buitumelo, mu latelele milao, ili kuli mu lumelelwe. 30Mu si ce ka lona lizazi leo, mi mu si ke mwa buluka se siñwi ku isa habusa.”
31Muñ'a Bupilo a li, “Mu utwe litaelo za ka. Ki na Muñ'a Bupilo. 32Mu si ke mwa tompolola libizo la ka le li kenile. Batu ba Isilaele kamukana ba swanezi ku ziba kuli, na, ni kenile. Ki na Muñ'a Bupilo, mi na mi kenisa. 33Hape ni mi zwisize mwa Egepita kuli ni be Mulimu wa mina. Ki na Muñ'a Bupilo.”
Currently Selected:
Malivi 22: Lozi09
Highlight
Copy
Compare
Share
Want to have your highlights saved across all your devices? Sign up or sign in
Lozi Interconfessional Bible, Catholic Edition © Bible Society of Zambia, 2009.
