Malivi 21
21
Ku kena kwa baprisita
1Muñ'a Bupilo a bulelela Mushe ku taluseza baprisita ba mba ya Aruni, a li, “Ha ku na muprisita ya ta isilafaza ka ku kena kwa lisebelezo za kepelo, mwanahabo h'a shwile. 2Kono wa kona ku kena kwa lisebelezo za kepelo ha ku shwile m'ahe kamba ndat'ahe, mwan'a hae wa mushimani kamba wa musizana, mwanahabo, 3kamba kaizel'a hae ya si ka nyalwa ya pila mwa ndu ya hae. 4A si ke a isilafaza ka lifu la kaizel'a hae ya nyezwi.
5 #
Malivi 19.27-28; Mul 14.1 “Ha ku na muprisita ya ta ikuta kwa toho, kamba ku pumela mulelu, kamba ku ipazaka lipazo fa mubili ku bonisa kuli wa silisa. 6U ta ba ya kenile cwalo, mi a si ke a tompolola libizo la ka. Ki yena ya ni ezeza litabelo za lico, mi u swanezi ku ba ya kenile. 7Muprisita a si ke a nyala musali ya n'a li lihule, kamba musali ye si mwalyanjo, kapa musali ya lelekilwe, kakuli yena muprisita u kenile. 8Batu ba swanezi ku lemuha kuli muprisita u kenile, kakuli ki yena ya ni ezeza litabelo za lico. Ki na Muñ'a Bupilo, ni kenile, mi ni kenisa ni batu ba ka. 9Haiba mwan'a muprisita u ikeza lihule, u tompolola ndat'ahe, mi u ta bulaiwa ka mulilo.
10“Muprisita yo muhulu ya tozizwe mafula fa toho, mi ili ya tohonolofalizwe ni ku apeswa liapalo za buprisita, h'a lukeli ku lisela milili ya hae i shakilikana feela i sa kamunwi, kapa ku pazaula liapalo za hae ku bonisa kuli u mwa maswabi. 11A si ke a kena mwa ndu mo ku na ni situpu sa mufu. A si ke a silafaza niha i ka ba sa ndat'ahe kamba sa m'ahe. 12A si ke a silafaza Tende ya ka ye Kenile, kamba ku i siya, kakuli u ketezwi na. Ki na Muñ'a Bupilo. 13U ta nyala mwalyanjo. 14H'a koni ku nyala mbelwa, musali ya lelekilwe, kapa musali ya n'a li lihule. U ta nyala feela mwalyanjo wa mwa lusika lwa habo. 15Hakusicwalo, bana ba hae ba ba lukela ku ba ba ba kenile ba ta ba ba ba silafezi. Ki na Muñ'a Bupilo, mi ni iketezi yena kuli a be muprisita yo muhulu.”
16Muñ'a Bupilo a fa Mushe litaelo. 17Mushe n'a na ni ku bulelela Aruni kuli, “Ha ku na wa lusika lwa hao, wa sihole, ya ta ni ezeza sitabelo sa mpo ya lico. Ku be cwalo kuya kuile. 18Ha ku na mutu wa sihole ya ta eza sitabelo, i ta ba sibofu, ya holofezi lihutu, wa pata ye holofezi, kamba ya bupehile maswe, 19ya sitani lizoho kamba lihutu, 20wa situnda, kamba mbonezikai, ya kula meeto kamba lukwekwe, kapa numbulwa. 21Ha ku na mutu ya holofezi cwalo wa lusika lwa Aruni ya ta ni fa sitabelo sa mpo ya lico. 22Mutu ya cwalo u ta ca lico ze ni filwe, ili sitabelo sa lico se si kenile hamoho cwalo ni sitabelo sa limpo za lico ze kenile hahulu. 23Kono a si ke a sutelela fakaufi ni lisila la mwahali kamba kwa katala, kakuli na ni Muñ'a Bupilo, mi ki na ni li kenisa.”
24Cwale ze, ki zona z'a bulezi Mushe ku Aruni ni bana ba hae, hamoho ni batu ba Isilaele kaufela.
Currently Selected:
Malivi 21: Lozi09
Highlight
Copy
Compare
Share
Want to have your highlights saved across all your devices? Sign up or sign in
Lozi Interconfessional Bible, Catholic Edition © Bible Society of Zambia, 2009.
