Malivi 23

Mikiti ya silumeli

(Lipa 28.16—29.40)

1Muñ'a Bupilo a fa Mushe milao. 2Milao yeo ye tatama i amana ni ya mikiti ya silumeli, ye ba swanezi ku hupula kamita batu ba Isilaele ha ba kopana ku t'o lapela. 3#Mut 20.8-10; 23.12; 31.15; 34.21; 35.2; Mul 5.12-14 A li, “Mu na ni mazazi a silezi a ku eza misebezi ya mina, kono mu hupule kuli lizazi la busupa ki lizazi la pumulo. Ka lona lizazi leo, mu si ke mwa sebeza, kono mu kopane hamoho ku lapela. Lizazi la Pumulo ki la Muñ'a Bupilo, niha mu ka pila kai ni kai. 4Mu zibahaze mikiti yeo ye tatama ka linako ze ketilwe.

Paseka ni linkwa ze si na mumela

(Lipa 28.16-25)

5 # Mut 12.1-13; Mul 16.1-2 “Paseka, ye ezelizwe ku kuteka Muñ'a Bupilo, i kala lizazi la bulishumi ni a mane, mwa kweli ya pili, lizazi ha li likela. 6#Mut 12.14-20; 23.15; 34.18; Mul 16.3-8 Mukiti wa Linkwa ze si na Mumela u kala ka la bulishumi ni a ketalizoho, mi mu swanezi ku nga mazazi a supile mu sa ci linkwa ze umezwi. 7Ka lizazi la pili, mu ta kopana hamoho ku lapela, mu sa ezi musebezi ufi kamba ufi wa misebezi ya mina ya mazazi kaufela. 8Mu tiseza Muñ'a Bupilo limpo za mina za lico ka mazazi a supile. Ka lizazi la busupa, mu kopane hape, mu lapele, mi mu si ke mwa eza misebezi ya mina ya ka zazi ni zazi.”

9Muñ'a Bupilo a bulelela Mushe, a li, 10“Ha mu fita mwa naha y'a mi fa Muñ'a Bupilo, mi mwa kutula lico za mina, mu ise ñata ya pili ku muprisita. 11Yena u ta i fitisa ku Muñ'a Bupilo, ili mpo ya butokwa kuli mu amuhelwe. Muprisita u ta i eza sitabelo ka lizazi le li tatama la Pumulo. 12Ka lona lizazi le mu ta eza sitabelo sa lico, mi mu eze ni sitabelo sa ku cisa sa ngunyana ya silimo si li siñwi, ili ya poho ye si na fo i nyazahala. 13Hape mu ekeze ku yona litikanyo ze ne za bupi bo bunde, bo bu lubilwe ni mafula a olive, ili mpo ya lico. Muunko wa sitabelo se u tabisa hahulu Muñ'a Bupilo. Hape, mu ta beyelela ni mpo ya tikanyo ye likani ya waine. 14Mu si ke mwa ca lico za mina ze nca butala, li besizwe, kamba li ezizwe linkwa, ku fitela ha mu se mu tiselize Mulimu limpo za mina za lico za mutamuno. Mulao wo u na ni ku mamelwa ki baikulu ba mina ka linako kaufela kuya kuile.

Mukiti wa Kutulo

(Lipa 28.26-31)

15 # Mut 23.16; 34.22; Mul 16.9-12 “Ku zwa ka lizazi le li tatama la Pumulo, ili lona le mu kile mwa tisa limpo za mina za lico ku Muñ'a Bupilo, mu bale lisunda ze supile ze tezi. 16Ka lizazi la Pentekonta, ili lizazi le li tatama la Pumulo ya busupa, mu tiseza Muñ'a Bupilo mpo ye nca ya lico. 17Ba ndu ye ñwi ni ye ñwi ba tiseze Muñ'a Bupilo linkwa ze peli. Sinkwa se siñwi ni se siñwi si be se si ezizwe ka bupi bo bu nekile, bo bu likana kilo i liñwi. Linkwa zeo, i be ze umezwi, mi li ezezwe Muñ'a Bupilo mpo ya lico za mutamuno. 18Hape, batu ba tise linkwa zeo ni lingunyana ze supile ze na ni silimo si li siñwi, poho i liñwi, ni lipuli ze peli, mi ku zona ku si ke kwa ba ni ye na ni fo i nyazahala. Li ta ezezwa Muñ'a Bupilo sitabelo sa ku cisa, hamoho ni limpo za lico ni waine. Muunko was sitabelo se u tabisa hahulu Muñ'a Bupilo. 19Hape mu eze puli i liñwi ya poho sitabelo sa ku zwisa libi, mi mu nge lingunyana ze peli za lipoho ze na ni silimo si li siñwi, mu li eze sitabelo sa ku tiisa bulikani. 20Muprisita u ta fitisa linkwa zeo hamoho ni lingunyanga ze peli ku Muñ'a Bupilo, ili mpo ya butokwa ye ta fiwa baprisita. Limpo ze li kenile. 21Ka lona lizazi leo mu si ke mwa eza musebezi ni o mukana, kono mu kopane mi mu lapele hamoho. Baikulu ba mina ba mamele mulao wo kuya kuile, niha ba ka pila kai ni kai.

22 # Malivi 19.9-10; Mul 24.19-22 “Ha mu kutula masimu a mina, mu si ke mwa kutula lico ze kwa munjewela wa simu, mi hape mu si ke mwa kutela ku y'o kutula lico ze ne siyezi. Mu li siyele babotana ni bazwahule. Ki na Muñ'a Bupilo Mulimu wa mina.”

Mukiti wa Silimo se Sinca

(Lipa 29.1-6)

23Muñ'a Bupilo a fa Mushe litaelo. 24Mushe n'a na ni ku bulelela Maisilaele kuli, “Ka lizazi la pili la kweli ya busupa mu buluke lizazi la pumulo, mi litolombita ha li lila mu kopane hamoho ku lapela. 25Mu si ke mwa eza ni o mukana wa misebezi ya mina ya kamita, kono mu ezeze Muñ'a Bupilo sitabelo sa lico.”

Lizazi la Swalelo

(Lipa 29.7-11)

26 # Malivi 16.29-34 Muñ'a Bupilo a fa Mushe litaelo. 27Mushe n'a na ni ku bulelela Maisilaele kuli, “Lizazi la bulishumi, la kweli ya busupa, ki lizazi la sebelezo ya silimo ni silimo ya ku zwisa libi za batu. Ka lona lizazi leo mu si ke mwa ca ni se sikana. Mu kopane hamoho ku lapela, mi mu ezeze Muñ'a Bupilo sitabelo sa lico. 28Mu si ke mwa sebeza ka lona lizazi leo, kakuli ki lizazi la ku eza sebelezo ya ku zwisa libi. 29Ufi ni ufi ya ka ca se siñwi ka lona lizazi leo, h'a sa na ku balelwa kwa batu ba Muñ'a Bupilo. 30Haiba mutu a ka sebeza ka lona lizazi leo yena Muñ'a Bupilo kasibili u ta mu bulaya. 31Mulao wo u ama mina ni baikulu ba mina kaufela, niha ba ka pila kai kamba kai. 32Ku zwa lizazi la busupa ni a mabeli kwa kweli ha li likela, ku isa manzibwana a la bulishumi, mu buluke lizazi le, ili la pumulo, mi ka lona lizazi leo mu si ke mwa ca se siñwi.”

Mukiti wa Minganda

(Lipa 29.12-40)

33 # Mul 16.13-15 Muñ'a Bupilo a fa Mushe litaelo. 34Mushe n'a na ni ku bulelela Maisilaele kuli, “Mukiti wa Minganda u kala ka la bulishumi ni a ketalizoho mwa kweli ya busupa, mi u zwelapili ka mazazi a supile. 35Ka lizazi la pili la ona mukiti wo, mu kopane hamoho, mu lapele, mi mu si ke mwa eza ni o mukana wa misebezi ya mina ya kamita. 36Ka zazi ni zazi, ili ka mazazi a supile, mu ka na mu tisanga limpo za lico. Ka lizazi la busupa ni li li liñwi mu kopane hamoho, mi mu eze sitabelo sa lico. Lizazi leo ki la milapelo, mi ka lona mu si ke mwa eza musebezi ni o mukana.

37“Ye ki yona mikiti ya silumeli mo mu kuteka Muñ'a Bupilo ka ku kopana hamoho ku lapela, ku fitisa limpo za lico, limpo za ku cisa, ni litabelo hamohocwalo ni limpo za waine ka mo li tokwahalela ka zazi ni zazi. 38Mikiti yeo ki ye eziwa kwand'a Lipumulo za kamita, mi ni zona limpo za teñi li eziwa kwand'a limpo za kamita, ili litabelo za mina za ku taleleza buitamo, ni limpo za mina ze mu fa Muñ'a Bupilo ka ku lata kwa mina.

39“Ka lizazi la bulishumi ni a ketalizoho mwa kweli ya busupa, ha mu se mu kutuzi masimu a mina, mu eze mukiti wo ka mazazi a supile. Lizazi la pili i ta ba le li ketezwi ku pumula. 40Ka lona lizazi leo, mu nge miselo ye minde hahulu ye zwa kwa likota za mina. Hape mu nge ni linzalu ni mitai ya likota ze na ni matali, mi cwale mu kale ku eza mukiti wa silumeli, ili ku kuteka Muñ'a Bupilo, Mulimu wa mina. 41Mukiti wo, mu u eze ka mazazi a supile. Wo ki mulao o na ni ku bulukwa ki baikulu ba mina kuya kuile. 42Batu ba Isilaele kamukana ba ta ina mwa minganda mazazi a supile. 43Kihona kuli baikulu ba mina ba te ba zibe kuli Muñ'a Bupilo n'a pilisanga batu ba Isilaele mwa minganda muta a ba zwisa mwa Egepita. Ki na Muñ'a Bupilo, Mulimu wa mina.”

44Cwale ka mukwa wo, Mushe a fa batu ba Isilaele milao ya ku mamela mazazi a mikiti ya silumeli, ili ku kuteka Muñ'a Bupilo.

Currently Selected:

Malivi 23: Lozi09

Highlight

Copy

Compare