Malivi 19

Mu be ba ba kenile sina na, Muñ'a Bupilo

1Muñ'a Bupilo a fa Mushe litaelo. 2#Malivi 11.44-45; 1 Pit 1.16 Mushe n'a na ni ku taluseza sicaba sa Isilaele kuli, “Mu kene, kakuli na ni kenile. Ki na Muñ'a Bupilo, Mulimu wa mina. 3#Mut 20.8, 12; Mul 5.12, 16 Yo muñwi ni yo muñwi wa mina a kuteke ndat'ahe ni m'ahe, mi a buluke mazazi a mikiti ya silumeli sina mo ni laelezi. Ki na Muñ'a Bupilo, Mulimu wa mina.

4 # Malivi 26.1; Mut 20.23; 34.17; Mul 27.15 “Mu si ke mwa ni siya ku y'o lapela milimu ya maswaniso. Hape, mu si ke mwa eza ni ku lapela milimu ya sipi. Ki na Muñ'a Bupilo, Mulimu wa mina.

5“Ha mu bulaya folofolo ya sitabelo sa ku tiisa bulikani, mu buluke milao ye ni mi file, mi ni ta amuhela mpo yeo. 6Nama i swanezi ku ciwa ka lona lizazi le i bulailwe folofolo, kamba habusa. Nama ye ka siyala kaufela ku fitela lizazi la bulalu i swanezi ku ciswa. 7Ka mulao i silafezi, mi haiba i ciwa ki mutu ufi kamba ufi ha ni na ku amuhela sitabelo seo. 8Mutu kaufela ya ka i ca u ta ba ni mulatu wa ku silafaza nama ye n'e filwe Muñ'a Bupilo, mi mutu yo h'a sa na ku balelwa kwa batu ba ka.

9 # Malivi 23.22; Mul 24.19-22 “Ha mu kutula masimu a mina, mu si ke mwa kutula lico za kwa munjewela wa simu, mi mu si ke mwa kutela ku kutula ze siyezi mwa mulaho. 10Mu si ke mwa kutela mwa simu ya mina ya veine ku y'o kubukanya ze ne si ka bonwa, kamba ku nopa miselo ya veine ye wile. Mu li siyele babotana ni bazwahule. Ki na Muñ'a Bupilo, Mulimu wa mina.

11 # Mut 20.15, 16; Mul 5.19, 20 “Mu si ke mwa uzwa, kapa ku putelela, kamba ku puma. 12#Mut 20.7; Mul 5.11; Mat 5.33 Mu si ke mwa itama ka libizo la ka, haiba mu sa lati ku buluka buitamo bo, kakuli kezo ye cwalo i tompolola libizo la ka. Ki na Muñ'a Bupilo, Mulimu wa mina.

13 # Mul 24.14-15 “U si ke wa putelela mutu kamba ku mu uzweza. U si ke wa ipulukela tuelo ya mubeleki, mane nihaili ya lizazi li li liñwi feela. 14#Mul 27.18 U si ke wa lwahaka susu, kamba ku beya sika fapil'a sibofu kuli a sitatale fateñi. U ni sabe, na, Muñ'a Bupilo, Mulimu wa hao.

15 # Mut 23.6-8; Mul 16.19 “U sepahale, mi u be ni niti ha u atula taba ka mulao. U si ke wa bonisa ketululo ku mubotana kamba ku saba mufumi. 16U si ke wa hasanya za buhata ka mutu ufi kamba ufi. U si ke wa palelwa ku fa bupaki bwa niti ka m'o bu zibela bakeñisa mutu wa sibulai. Ki na Muñ'a Bupilo.

17 # Mat 18.15 “U si ke wa toya mutu ufi ni ufi, kono mu elezane ka za lifapahano za mina, ili kuli u si ke wa eza sibi kabakala hae. 18#Mat 5.43; 19.19; 22.39; Mar 12.31; Luk 10.27; Baro 13.9; Magal 5.14; Jak 2.8 U si ke wa kutiseza mutu ufi ni ufi ka bumaswe, kamba ku zwelapili ku mu toya, kono u late ba bañwi sina m'o itatela. Ki na Muñ'a Bupilo.

19 # Mul 22.9-11 “Mu utwe litaelo za ka. U si ke wa kopanya limunanu za mishobo ye fapahani kuli li zwalisane. U si ke wa cala lipeu za mishobo ye mibeli mwa tima i liñwi. Hape u si ke wa apala liapalo ze ezizwe ka masila a fapahani.

20“Haiba mutu a sepisize ku leka mutanga wa musizana mi a be siendi sa hae, kono mutu yo h'a si ka lifa musizana yo kale, fohe munna yo muñwi ni yena musizana kasibili, niha ba ka fosana, ba si ke ba bulaiwa. Ba utwiswe feela butuku, kakuli musizana u sa li mutanga. 21Munna yo u ta tisa ngu ya poho kwa munyako wa Tende ya Kopano, i be mpo ya hae ya sitabelo sa tifo. 22Ka yona muprisita u ta eza sebelezo ya ku mu kenisa ku zwisa sibi sa hae, mi Mulimu u ta mu swalela.

23“Ha mu se mu keni mwa naha, mi mu cala kota ya muselo wa mufuta ufi kamba ufi, mu hupule kuli miselo ya yona ha i si ka kena, mane ku be ku fele lilimo ze talu. 24Ka silimo sa bune miselo kamukana mu i eze mpo ku na Muñ'a Bupilo, ili ku bonisa buitumelo. 25Kono ka silimo sa buketalizoho mu i ce. Haiba mu eza cwalo, likota za mina li ta beya hahulu miselo. Ki na Muñ'a Bupilo, Mulimu wa mina.

26 # Sim 9.4; Malivi 7.26-27; 17.10-14; Mul 12.16, 23; 15.23; 18.10 “Mu si ke mwa ca nama ye sa lota mali. Mu si ke mwa eza mabibo a mufuta ufi ni ufi. 27#Malivi 21.5; Mul 14.1 Mu si ke mwa ikuta milili ya mwa matuko a toho, kamba ku pumela mulelu ha mu silisa. 28Mu si ke mwa ipaza lipazo, kamba ku ikolofaza fa mubili ha mu silisa. Ki na Muñ'a Bupilo.

29 # Mul 23.17 “Mu si ke mwa tompolola bana ba mina ba basizana ka ku ba eza mahule. Haiba mu eza cwalo mu ta kutela kwa milimu i sili, mi naha i ka tala buhule. 30#Malivi 26.2 Mu buluke la Pumulo, mi mu kuteke Tende ya ka ye Kenile. Ki na Muñ'a Bupilo.

31 # Mul 18.11; 1 Sam 28.3; 2 Male 23.4; Isa 8.19 “Mu si ke mwa ya kwa batu ba ba buza mioya ya ba ba shwile. Haiba mu eza cwalo mu ta silafala. Ki na Muñ'a Bupilo, Mulimu wa mina.

32“U bonise likute fapil'a macembele, mi u ba kuteke. U sabe Muñ'a Bupilo.

33 # Mut 22.21; Mul 24.17-18; 27.19 “Mu si ke mwa nyandisa bazwahule ba ba pila mwa naha ya mina. 34Mu ba eze sina mo mu ezeza Maisilaele ba bañwi, mi mu ba late sina mo mu itatela ili mina. Mu hupule kuli ni mina ne mu li bazwahule mwa naha ya Egepita. Ki na Muñ'a Bupilo, Mulimu wa mina.

35 # Mul 25.13-16; Mash 20.10; Ezek 45.10 “Mu si ke mwa puma mutu ufi kamba ufi ka ku itusisa litikanyo za buhata, ili za mwa butelele, bukiti, kapa buñata. 36Mu itusise likala za bukiti ni za litikanyo ka ku sepahala. Ki na Muñ'a Bupilo, Mulimu wa mina ya mi zwisize mwa naha ya Egepita. 37Mu utwe milao ni litaelo za ka kaufela. Ki na Muñ'a Bupilo.”

Currently Selected:

Malivi 19: Lozi09

Highlight

Copy

Compare