Malivi 13

Milao bakeñisa matuku a fa litalo

1Muñ'a Bupilo a fa Mushe ni Aruni milao ye, 2“Haiba mutu ufi kamba ufi a ba ni sitombo fa mubili, buluma-luma kamba butuku bwa ku tutuluka mubili, bo bu ka swana bwa hula ku ba butuku bwa litalo bo bu yambukela, a isiwe kwa baprisita ba mba ya Aruni. 3Muprisita u ta tatuba sitombo seo, mi haiba buambo bo bu ku sona bu fetuhile busweu, mi hape sitombo si bonahala ku tunga hahulu ku fita litalo le li kwa matuko a sona, fohe ki butuku bo bu yambukela. Cwale muprisita ha s'a tatubile mutu yo, u ta mu zibahaza kuli h'a si ka kena. 4Kono haiba katombo kao ki ka kasweu, mi ka si ka tunga ku fita litalo le li ka potolohile, mi hape buambo ha bu si ka fetuha busweu, muprisita u ta buluka mutu yo mwa sasana ka mazazi a supile. 5Muprisita u ta tatuba mutu yo hape ka lizazi la busupa, mi haiba mwa muhupulo wa hae a fumana kuli sitombo seo si sa swana, mi ha si si ka ekezeha, u ta mu kutiseza hape mwa sasana ka mazazi a supile. 6Muprisita u ta mu tatuba hape ka lizazi la busupa, mi haiba sitombo si si ka hula, mi si bonahala ku fola, cwale u ta mu zibahaza kuli u kenile. Ki sitombo feela. 7Mutu yo u ta tapisa liapalo za hae, mi a be ya kenile ka mulao. Kono haiba sitombo si ekezeha, muprisita ha s'a mu tatubile mi a bulezi kuli u kenile, u swanezi ku y'o iponhaza hape ku muprisita. 8Muprisita u ta kutela ku mu tatuba hape, mi haiba sitombo seo si ekezehile, u ta mu zibahaza kuli h'a si ka kena. Ki butuku bo bu yambukela.

9“Mutu kaufela h'a na ni butuku bo bu yambukela, u swanezi ku tiswa ku muprisita. 10Cwale yena u ta mu tatuba. I kona ku ba sitombo se sisweu fa mubili wa hae, ili sitombo se si fetula bwambo busweu, mi si na ni bulalu bo buñata. 11Ki butuku bwa mbingwa bo bu sa foli kapili. Fo, muprisita u ta bulela kuli h'a si ka kena. H'a ku tokwahali kuli a beiwe mwa sasana kakuli kwa bonahala kuli h'a si ka kena. 12Butuku bo bwa mbingwa bwa kona ku hasana ni ku apesa mubili kaufela ku zwa kwa toho ku y'o fita kwa mahutu. 13Fo muprisita u na ni ku tatuba mukuli hape. Haiba a fumana kuli butuku bo bu apesize mubili kaufela, u ta bulela kuli mutu yo u kenile. Litalo la hae kaufela li fetuhile busweu, mi cwale u kenile. 14Kono ku sa bonahala feela sitombo, u ta bizwa ya si ka kena. 15Muprisita u ta mu tatuba hape, mi haiba a bona sitombo se si atami u ta bulela kuli h'a si ka kena. Sitombo se si atami si talusa kuli mukuli u kula butuku bo bu yambukela, mi cwale h'a si ka kena. 16Kono sitombo ha si fola, mi sa ba busweu hape, mutu yo u ta ya ku muprisita. 17Yena a y'o mu tatuba hape. Haiba sitombo seo si fetuhile busweu hape, muprisita u ta bulela kuli u kenile.

18“Mutu wa kona ku ba ni sitombo se si folile. 19Mi kwamulaho haiba kwa bonahala kuli, fo ne ku inzi sitombo sa kale, ku mela se siñwi sa mubala o musweu, kamba o mufubelu, u na ni ku ya ku muprisita. 20Muprisita u ta mu tatuba, mi haiba sitombo seo si bonahala ku tunga ku fita litalo, mi hape bwambo bo bu kwa matuko a sona bu fetuhile busweu, fo muprisita u ta bulela kuli h'a si ka kena. Ki butuku bwa litalo bo bu yambukela, bo bu kalile ka sitombo. 21Kono haiba muprisita a si tatuba, mi a fumana kuli bwambo bwa sona ha bu si ka fetuha busweu, mi ni sona sitombo ha si si ka tunga ku fita litalo, kono mubala wa sona u bonahala ku ba o musweunyana feela, muprisita u ta buluka mutu yo mwa sasana ka mazazi a supile. 22Haiba sitombo sa hula ni ku ekezeha, muprisita u ta bulela kuli h'a si ka kena. U sa kula. 23Kono haiba sibali si siyala cwalo, si sa ekezehi, fo kikuli ki sibali feela, sona sitombo si folile, mi cwale muprisita u ta talusa kuli mutu yo u kenile ka mulao.

24“Mutu ya cile mulilo, nama ya fa sitombo i kona ku fetuha busweu, kapa busweu bwa bufubelu. 25Ni hona u na ni ku tatubwa ki muprisita, mi haiba bwambo bwa fo ku cile bu fetuhile busweu, mi hape sitombo si tungile ku fita litalo, fohe ki butuku bwa mbingwa bo bu se bu kalile mwa sitombo seo sa mulilo, mi muprisita u ta bulela kuli h'a si ka kena. 26Kono haiba bwambo bo bu mwa sitombo seo bu si ka fetuha busweu, mi sona sitombo ha si si ka tunga ku fita litalo, kono ili se si sweunyana feela, muprisita u ta buluka mutu yo mwa sasana ka mazazi a supile. 27Muprisita u ta mu tatuba hape ka lizazi la busupa, mi haiba sitombo seo si hula ni ku ekezeha, fohe ki butuku bwa litalo bo bu yambukela, mi muprisita u ta bulela kuli h'a si ka kena. 28Kono haiba mubala wo u sa cinci, mi u sa ekezehi, hape u nz'o li o musweunyana feela, fo kikuli ku luluhile feela, mi muprisita u ta bulela kuli mutu yo u kenile ka mulao, kakuli ki sibali feela.

29“Munna kamba musali wa kona ku ba ni sitombo mwa toho kamba fa silelu. 30Muprisita u na ni ku si tatuba. Haiba si bonahala ku tunga hahulu ku fita litalo ni bwambo bo bu ku sona ili bwa mubala wa ñandatalukeke, fohe ki butuku bwa litalo bo bu yambukela, mi cwale u ta bulela kuli h'a si ka kena. 31Haiba muprisita, h'a mu tatuba, a fumana kuli sitombo ha si bonahali ku tunga ku fita litalo, kono ku si na bwambo bo bunde ku sona, muprisita u ta mu buluka mwa sasana ka mazazi a supile. 32Hape muprisita u ta tatuba sitombo seo ka lizazi la busupa mi a ikolwise kuli ha si si ka ekezeha ni ku hasanela fa litalo, hape ku si na bwambo bwa ñandatalukeke ku sona, ni kuli sona ha si si ka tunga ku fita litalo. 33Mutu yo u lukela ku beula bwambo bo bu fa sibaka seo. Ku zwa fo, muprisita u ta mu buluka mwa sasana ka mazazi a supile. 34Ka la busupa, muprisita u ta tatuba sitombo seo hape, mi haiba si si ka ekezeha, ni ku sa tunga ku fita litalo, muprisita u ta bulela kuli u kenile ka mulao. Ku zwa fo, mutu yo u ta tapisa liapalo za hae, mi a kenelele. 35Kono sitombo sa kona ku fufuluka, mutu ha s'a bulelezwi kuli u kenile. 36Cwale muprisita u ta mu tatuba hape. Haiba sitombo si yambile litalo, ha ku sa na ku batisiswa za mibala ya bwambo. Kwa iponahaza hande kuli mutu yo h'a si ka kena. 37Kono haiba muprisita a bona kuli sitombo seo ha si si ka ekezeha, mi ku mela bwambo bo bunde ku sona, fo si folile, mi muprisita u ta bulela kuli u kenile.

38“Munna kamba musali wa kona ku ba ni mabali a masweu fa mubili. 39Kihona kuli muprisita u ta kona ku tatuba mutu yo hape. Haiba mabali-bali ao h'a si a masweu hahulu, ki mabali feela a itahezi ili ona. Mutu yena u kenile ka mulao.

40“Haiba mutu a tahelwa ki sitenda kwa toho, nto yeo ha i mu silafazi. 41Haiba mutu a tahelwa ki sitenda fa pata, nto yeo ha i mu silafazi. 42Kono haiba ku bonahala sitombo sa mubala wa bufubelu bo bu kopani ni busweu hona fa sitenda fo, ki makakelo a butuku bwa mbingwa. 43Muprisita u ta mu tatuba, mi wa kona ku fumana kuli u na ni sitombo se sifubelu ni busweunyana. 44Cwale muprisita u ta bulela kuli h'a si ka kena, kabakala butuku bo bu yambukela bo bu fa toho ya hae.

45“Mutu ya na ni butuku bwa mbingwa bo bu yambukela, u lukela ku apala liapalo ze pazauhile, a sa kamuli milili ya hae, a apese pata ya hae, mi a huweleze, a li, “Ya silafezi! Ya silafezi!” 46U ta ba ya si ka kena cwalo, ka yona nako yeo y'a sa kula, mi u lukela ku pila a nosi mwa sasana, kwand'a mafulo.

Milao bakeñisa muuta wa fa liapalo

47“Ku kona ku ba ni muuta fa siapalo, i ta ba sa boya kamba sa lisila la line. 48Ku kona ku ba ni muuta fa kalulo ye ñwi ya lisila leo kamba ya siapalo sa boya, kapa fa litalo, kamba fa sika sifi ni sifi se si ezizwe ka litalo. 49Haiba ki o mutalanyana kapa o mufubelunyana, wo ki muuta o yambukela, mi u swanezi ku boniswa ku muprisita. 50Muprisita u ta u tatuba, mi u ta beya siapalo seo ku sili ka mazazi a supile. 51U ta si tatuba hape ka lizazi la busupa, mi haiba muuta wo u ekezehile, sibyana seo ha si si ka kena. 52Muprisita u ta si cisa kakuli ki muuta o yambukela, mi u swanezi ku feliswa ka mulilo.

53“Kono muprisita wa kona ku tatuba ni ku fumana kuli muuta wo ha u si ka ekezeha fa sibyana seo. 54Cwale u ta laela kuli siapalo seo si tapiswe, si beiwe ku sili ka mazazi a supile. 55Kihona a ta si tatuba hape mi haiba muuta ha u si ka cinca mubala, niha u si ka ekezeha, si sa silafezi. U swanezi ku cisa siapalo seo, niha i ka ba kuli sibaka se si sinyehile ki sa fapili kamba sa mwamulaho. 56Kono haiba muprisita h'a si tatuba hape a fumana kuli muuta u omile, u ta pukula feela sona siemba seo sa lisila kamba sa litalo se si na ni muuta. 57Cwale haiba muuta wo u bonahala hape u ekezeha, fohe muñ'a siapalo seo a si cise. 58Haiba a tapisa sibyana seo, mi mubala wo wa fela, a si tapise hape. Si ta ba se si kenile ka mulao.

59“Cwalehe, wo ki ona mulao wa muuta wa fa libyana, i ta ba sibyana sa boya kamba sa lisila la line, kapa kalulo ifi ni ifi ya siapalo sa line kamba sa boya kapa sika kaufela se si ezizwe ka litalo.

Currently Selected:

Malivi 13: Lozi09

Highlight

Copy

Compare