Malivi 10
10
Sibi sa Nadabi ni Abihu
1Bana ba Aruni, bo Nadabi ni Abihu, ba nga yo muñwi ni yo muñwi liñetana la hae l'a tukisezanga mulilo, mi ba beya fateñi mashala a cisa, ni ku ekeza insense, mi hamoho ba u fa Muñ'a Bupilo. Kono mulilo wo n'a si ka kena, kakuli Muñ'a Bupilo n'a si ka ba laela ku eza cwalo. 2Kapili-pili kwa taha mulilo o zwa ku Muñ'a Bupilo, mi wa t'o ba cisa. Ba shwela hona fo fapil'a hae. 3Cwale Mushe a li ku Aruni, “Se, ki sona s'a n'a bulela Muñ'a Bupilo h'a li, ‘Ba ba ni sebeleza kaufela ba swanezi ku kuteka ku kena kwa ka. Ni ta bonahaza kanya ya ka kwa batu ba ka.’ ” Kono Aruni h'a si ka bulela se siñwi.
4Mushe a biza Mishaele ni Elizafani, bana ba Uziele, malum'ahe Aruni, mi a li ku bona, “Mu tahe, mu t'o zwisa litupu za banabahabo mina fapil'a Tende ye Kenile, mi mu y'o li beya kwand'a mafulo.” 5Cwale ba taha, ba t'o nanula litupu zeo mwa liapalo za zona, mi ba li isa kwand'a mafulo, sina mw'a n'a laelezi Mushe.
6Cwale Mushe a li ku Aruni ni bana ba hae, bo Eliazare ni Itamare, “Mu si ke mwa lisela ku kamuna milili ya mina, mi mu si ke mwa pazula liapalo za mina ku bonisa kuli mu mwa sililo. Ha mu eza cwalo mu ta shwa, mi Muñ'a Bupilo u ta nyemela nyangela kaufela. Kono banabahabo mina, ni batu kamukana ba Isilaele ba lumelezwi ku silisa bakeñisa lifu le la mulilo o tisizwe ki Muñ'a Bupilo. 7Mu si ke mwa zwa kwa munyako wa Tende ya Kopano. Ha mu eza cwalo mu ta shwa, kakuli mu tohonolofalizwe ka mafula a Muñ'a Bupilo.” Ba eza sina mw'a n'a bulelezi Mushe.
Milao ya baprisita
8Muñ'a Bupilo a li ku Aruni: 9“Wena ni bana ba hao mu si ke mwa kena mwa Tende ya Kopano ha mu se mu nwile waine kamba bucwala. Haiba mu eza cwalo, mu ta shwa. Wo ki mulao o swanezwi ku bulukwa ki bana ni baikulu ba hao kaufela. 10Mu swanezi ku taluhanya lika ze li za Muñ'a Bupilo ni ze itusiswa feela, ni lika ze kenile ni ze si ka kena. 11Mu swanezi ku luta batu ba Isilaele milao kaufela ye ni ku file ka Mushe.”
12 #
Malivi 6.14-18
Mushe a li ku Aruni ni bana ba hae ba babeli ba ba siyezi, bo Eliazare ni Itamare, “Mu nge limpo za lico ze siyezi ku ze ne li ezelizwe Muñ'a Bupilo sitabelo, mu li eze linkwa ze si ka umelwa, mi mu li cele kwatukw'a katala, kakuli sitabelo se, si kenile hahulu. 13Mu li cele mwa sibaka se si tompeha. Ye, ki yona kabelo ya mina ni bana ba mina ya lico ze filwe Muñ'a Bupilo. Ki sona s'a ni laezi Muñ'a Bupilo. 14#Malivi 7.30-34 Kono wena ni bana ba hao mu lukela ku ca sifuba ni silupi ze ketezwi ku ba mpo ya Muñ'a Bupilo, ili y'a file baprisita. Mu ka li cela mwa sibaka sifi ni sifi se si tompeha. Limpo ze, li filwe wena ni bana ba hao kuli i be yona kabelo ya mina ye zwa kwa sitabelo sa ku tiisa bulikani mwahal'a Mulimu ni sicaba sa hae. 15Ba ka tisanga mpo ya silupi ni sifuba, ili liabelo ze ketezwi Muñ'a Bupilo, ka nako y'a ezezwa sitabelo sa lisuzo. Liabelo za lilama ze, ki za mina kuya kuile, sina mw'a laelezi Muñ'a Bupilo.”
16Mushe a buza ka puli ya sitabelo sa ku zwisa libi, mi a fumana kuli n'e se i cisizwe. Ka kezo yeo a nyemela Eliazare ni Itamare, bana ba Aruni ba ba siyezi, mi a ba buza, a li, 17#Malivi 6.24-26 “Kiñi ha mu si ka cela sitabelo sa ku zwisa libi mwa sibaka se si tompeha? Si kenile hahulu, mi Muñ'a Bupilo u mi file sona kuli mu si ce, ili kuli mu zwise sibi sa nyangela. 18Sina mali a yona ha n'a si ka tiswa mwa Tende ye Kenile, ne mu swanela ku cela sitabelo seo hona moo, sina mo ne ni laelezi.”
19Aruni a alaba, a li, “Wa ziba kuli lika ze, ze sabisa cwalo, li se li ezahalile ku na, nihaike batu ba tisize limpo za bona za sitabelo sa ku zwisa libi ni sa ku cisa ku Muñ'a Bupilo kacenu! Kabe ne ni cile nama ya sitabelo sa ku zwisa libi kacenu, kana Muñ'a Bupilo na ka taba?” 20Mushe h'a utwa cwalo, a lumela.
Currently Selected:
Malivi 10: Lozi09
Highlight
Copy
Compare
Share
Want to have your highlights saved across all your devices? Sign up or sign in
Lozi Interconfessional Bible, Catholic Edition © Bible Society of Zambia, 2009.
