Malivi 9

Aruni u eza litabelo

1Mazazi a lisebelezo za ku ba beya fa buprisita ha s'a felile, habusa Mushe a biza Aruni ni bana ba hae, ni bazamaisi ba Isilaele. 2A li ku Aruni, “Nga pohwana ni poho ya ngu, ili ze si na fo li nyazahala, mi u li ezeze Muñ'a Bupilo sitabelo. Pohwana i be ya sitabelo sa swalelo ya libi, mi ngu, yona, i be ya sitabelo sa ku cisa. 3Cwale u bulelele batu ba Isilaele kuli ba nge poho ya puli ya sitabelo sa ku zwisa libi, namani ni ngunyana za silimo si li siñwi, ili ze si na fo li nyazahala. Zona li be za sitabelo sa ku cisa. 4Poho ni ngu li be za sitabelo sa ku tiisa bulikani. Ba li ezeze Muñ'a Bupilo sitabelo, hamoho ni limpo za lico ze kopanyizwe ni mafula. Ba swanezi ku eza cwalo kakuli Muñ'a Bupilo u ta iponhaza ku bona kacenu.”

5Ba tisa linto kamukana ze ne ba laezwi ki Mushe kwa munyako wa Tende ya Kopano, mi nyangela kaufela ya kopanela kwateñi ku lapela Muñ'a Bupilo. 6Mushe a li, “Muñ'a Bupilo u mi laezi ku eza linto zeo kaufela, ili kuli kanya ye bonahaza kuli u teñi i kone ku bonahala ku mina.” 7#Maheb 7.27 Cwale Mushe a li ku Aruni, “U ye kwa katala, u y'o eza sitabelo sa swalelo ya libi ni sa ku cisa, ili ku zwisa libi za hao ni za batu. U eze sitabelo sa ku zwisa libi za batu, sina mw'a laelezi Muñ'a Bupilo.”

8Aruni a ya kwa katala, mi a bulaya pohwana ye n'e li ya sitabelo sa hae sa ku zwisa libi. 9Bana ba hae ba mu tiseza mali, yena a cupwa mwateñi munwana, kih'a lamba a mañwi a ona fa manaka a kwa malulu a katala, mi a sela a n'a siyezi kaufela kwatas'a katala. 10Cwale a nga lisuzo, lipio, ni lisuzo kaufela la fa sibiti, a li ciseza fa katala sina mw'a n'a laelezwi Mushe ki Muñ'a Bupilo. 11Kono nama ni litalo, zona, a y'o li ciseza kwand'a mafulo.

12A bulaya folofolo ya sitabelo sa hae sa ku cisa. Bana ba hae ba mu tiseza mali, mi a' sela kaufela fa maneku a mane a katala. 13Ba mu fa toho ni lilama ze ñwi za folofolo, mi a li ciseza fa katala. 14Cwale kih'a tapisa za mwa mba kaufela ni lilupi, mi a li ciseza fa katala, ili fahalimw'a limpo kaufela za sitabelo sa ku cisa.

15Mwamulaho a zeo a eza sitabelo sa batu. A nga puli ye ne na ni ku eziwa sitabelo sa ku zwisa libi za batu, a i bulaya, mi a i eza sitabelo sina mw'a n'a ezelize sitabelo sa hae sa ku zwisa sibi. 16Hape a tisa folofolo ya sitabelo sa ku cisa, mi a i eza sitabelo ka ku latelela milao. 17A eza sitabelo sa mpo ya lico, a ñwata mwa bupi bwa buloto, mi a bu ciseza fa katala. Se n'e li sa ku ekeza kwa litabelo za ku cisa za ka zazi ni zazi. 18#Malivi 3.1-11 Cwale a bulaya poho ni ngu ya poho ku ezeza batu sitabelo sa ku tiisa bulikani. Bana ba hae ba mu tiseza mali, mi yena a' sela fa maneku a mane a katala. 19Aruni a nga lisuzo la poho ni la ngu. 20A beya lisuzo fahalimw'a lifuba za lifolofolo zeo, mi kaufel'a zona a li isa kwa katala. A ciseza lisuzo fa katala. 21A nga lifuba ni lilupi za bulyo, a fitisa mpo yeo ku Muñ'a Bupilo ka libizo la baprisita sina mw'a n'a laelezi Mushe.

22 # Lipa 6.22-26 Aruni ha s'a felize ku eza litabelo kamukana, a nanulela mazoho a hae fahalimw'a batu, a ba tohonolofaza, mi cwale kiha s'a shetumuka. 23Mushe ni Aruni ba kena mwa Tende ya Kopano, mi ha ba zwa mwateñi ba tohonolofaza batu. Cwale, kanya ya Muñ'a Bupilo ya bonahala ku bona kaufela. 24Kapili-pili Muñ'a Bupilo a lumela mulilo, wa t'o cisa limpo kaufela ni lisuzo le ne li fa katala. Batu ha ba u bona, ba huweleza kaufela, mi ba inama ba talimezi fafasi.

Currently Selected:

Malivi 9: Lozi09

Highlight

Copy

Compare