Malivi 1
1
Limpo ze ciswa mutumbi
1Muñ'a Bupilo a biza Mushe a nz'a li mwa Tende ya Kopano, mi a mu fa milao. 2Se ne ba swanezi ku mamela Maisilaele mwa litabelo za bona, ki milao ye tatama.
“Mutu kaufela h'a eza sitabelo sa folofolo, i ka be ye ñwi ya likomu, ya lingu, kamba ya lipuli za hae. 3Haiba a eza ye ñwi ya likomu za hae sitabelo sa ku cisa, u swanezi ku tisa poho ye si na fo i nyazahala. U lukela ku i tisa kwa munyako wa Tende ya Kopano ili kuli Muñ'a Bupilo a i amuhele. 4U ta beya lizoho la hae fa toho ya yona, mi kihona i ta amuhelwa, i be sitabelo sa swalelo ya libi za hae. 5Cwale a bulaele poho hona fo, mi baprisita ba mba ya Aruni ba ta nga mali a yona, mi ba a fitise ku Muñ'a Bupilo. Kihona ba ta a sela fa maneku a mane a katala ka ka kwa munyako wa Tende. 6Cwale u ta buwa folofolo yeo ni ku i pumaka. 7Baprisita ba ta lukisa likota fa katala ni ku tukisa mulilo. 8Cwale kihona ba ta nga lisuma za nama ya folofolo yeo hamoho ni toho ni lisuzo la yona, ba li beye fa mulilo. 9Mutu yo u lukela ku tapisa za mwa mba kaufela ni litaku za kwa mulaho, mi cwale muprisita u ta ciseza sitabelo seo kaufela fa katala. Muunko wa sona sico se u tabisa hahulu Muñ'a Bupilo.
10“Haiba mutu a eza sitabelo sa ye ñwi ya lingu kamba lipuli za hae, i lukela ku ba ya poho, mi ili ye si na fo i nyazahala. 11U ta i bulaela kwa neku la mutulo wa katala, mi baprisita ba ta sela mali a yona fa maneku a mane a katala. 12Ha s'a pumakile nama yeo, kihona muprisita a ta beya lilama kamukana hamoho ni toho ni lisuzo la yona cwalo fa mulilo. 13Mutu yo u lukela ku tapisa za mwa mba kaufela, ni litaku za kwa mulaho, mi muprisita u ta fitisa sitabelo seo ku Muñ'a Bupilo ni ku si ciseza fa katala kaufel'a sona. Muunko wa sitabelo sa sico se u tabisa hahulu Muñ'a Bupilo.
14“Haiba mutu a eza sitabelo sa ku cisa ka nyunywani, nyunywani yeo i lukela ku ba liiba kamba nkwilimba. 15Muprisita u ta i beya fa katala, a i pume mulala ni ku ciseza toho ya yona fa katala. Mali a yona, ona, a ta lotisezwa kwa neku le liñwi la katala. 16Muprisita u ta zwisa siuyelo ni mafufa cwalo, mi a li latele kwa neku la upa wa katala, ili fo ku sululelwanga mulola. 17U ta i swala kwa mafufa, a i pazule a sa i kauhanyelezi lilama, mi a sa nyuntuli ni mafufa a yona. Cwale, kihona a ta i ciseza fa katala. Muunko wa sitabelo sa sico se u tabisa hahulu Muñ'a Bupilo.
Currently Selected:
Malivi 1: Lozi09
Highlight
Copy
Compare
Share
Want to have your highlights saved across all your devices? Sign up or sign in
Lozi Interconfessional Bible, Catholic Edition © Bible Society of Zambia, 2009.
