Malivi 2
2
Limpo za lico
1“Mutu kaufela h'a tiseza Muñ'a Bupilo mpo ya lico za bubeke, a kale pili ku sita bubeke bo, bu be bupi. A bu sele mafula a olive ni insense. 2A bu tise kwa baprisita ba mba ya Aruni. Muprisita u ta ñwata mwateñi lizoho le li tezi la bupi ni mafula, mi u ta nga ni insense kaufela, a li ciseze fa katala kaufel'a zona ku bonisa kuli lika kaufela li ketezwi Muñ'a Bupilo. Muunko wa sitabelo se sa lico u tabisa hahulu Muñ'a Bupilo. 3Lico ze siyezi ku zeo ki za baprisita, mi li kenile hahulu kakuli li zwa ku ze ne tiselizwe Muñ'a Bupilo.
4“Haiba mpo yeo ki ya sinkwa se si besizwe mwa libesezo, si swanezi ku ba se si si na mumela. Mpo yeo i be ya linkwa ze kima ze lubilwe ka bupi bo bu kopanyizwe ni mafula a olive, kapa linkwa ze sisani ze lambilwe mafula a olive.
5“Haiba mpo yeo ki ya sinkwa se si besizwe fa pani, si na ni ku lubwa ka bupi bo bu kopanyizwe ni mafula a olive, kono i be bo bu si na mumela. 6Bu lubiwe hahulu, mi bu selwe mafula ha bu ezwa sitabelo.
7“Haiba mpo yeo ki ya buhobe bo bu apehilwe mwa piza, bu na ni ku ba bo bu ezizwe ka bupi ni mafula a olive. 8Wena mufani, u bu tiseze Muñ'a Bupilo, mi u bu fe muprisita ya ta bu isa kwa katala. 9Muprisita u ta nga kalulo ye ñwi ya bona, a i ciseze fa katala kuli inge ki yona mpo kaufela ye tiselizwe Muñ'a Bupilo. Muunko wa sitabelo sa sico se u tabisa hahulu Muñ'a Bupilo. 10Lico za sitabelo ze siyezi kamukana ki za baprisita. Li kenile hahulu kakuli li zwa kwa lico ze filwe Muñ'a Bupilo.
11“Ha ku na mpo ya lico z'o tiseza Muñ'a Bupilo ye ka ezwa ka mumela. U si ke wa beya mumela kamba linosi mwa lico ze tisezwa Muñ'a Bupilo. 12Mpo ya lico za buloto bwa ku tamuna, b'o kutula ka silimo ni silimo, bu tiswe ku Muñ'a Bupilo, kono bu si ke bwa cisezwa fa katala. 13U lunge lico kaufela z'o tisa ka lizwai kakuli li yemela bulikani bwa hao ni Muñ'a Bupilo. 14Ha u tiseza Muñ'a Bupilo mpo ya buloto bwa ku tamuna b'o kutuzi, u tise matuyutuyu kamba bupi bo bu sitilwe. 15U a kopanye ni mafula a olive, mi u beye fateñi insense. 16Muprisita u ta cisa yona kalulo yeo ya lico ni mafula hamoho cwalo ni insense kaufela. Kalulo yeo i be inge ki yona mpo kaufela ye tiselizwe Muñ'a Bupilo.
Currently Selected:
Malivi 2: Lozi09
Highlight
Copy
Compare
Share
Want to have your highlights saved across all your devices? Sign up or sign in
Lozi Interconfessional Bible, Catholic Edition © Bible Society of Zambia, 2009.
