Joshua 20
20
Minzi ya Masabelo
1 #
Lipa 35.6-32; Mul 4.41-43; 19.1-13 Cwale Muñ'a Bupilo a li ku Joshua: 2“Bulelela sicaba sa Isilaele, u li, ‘Mu kete minzi ya masabelo, ye ne ni mi bulelezi ka Mushe. 3Mutu ya ka bulaya yo muñwi a sa ezi ka bomu, mi a si ka lela ku mu bulaya, u na ni tukelo ya ku sabela mwateñi batu ba ba bata ku mu bulaya ni yena. 4U na ni tukelo ya ku sabela ku o muñwi wa minzi yeo, ku ya kwa sibaka sa likatulo kwa munyako wa munzi, ni ku y'o taluseza bahulu ba munzi se si ezahalile. Kihona ba ta mu lumelela ku kena mwa hae, mi ba ta mu fa sibaka f'a ka pila, kuli a kone ku ina ni bona. 5Haiba batu ba ba bata ku mu bulaya ba mu latelela kw'a sabezi, ba mwa hae ha ba na ku tisa mutu yo ku bona. Ba ta mu sileleza, kakuli h'a bulaile Muisilaele wa habo i ne si ka ku ziba kamba ka ku nyema. 6U ta ina cwalo mwa munzi wo ku fitela a zekiswa fapil'a nyangela, kamba ku fitela mutu ya li muprisita yo muhulu ka nako yeo a shwa. Fohe, mutu yo u ta kona ku kutela kwa hae habo kw'a n'a sabile.’ ”
7Cwale ba keta munzi wa Kedeshi mwa Galilea, mwa naha ya malundu a Nafetali. Ba keta Sikemi mwa naha ya malundu a Eferaimi ni Kiryati-Ariba kapa Heberoni mwa naha ya malundu a Juda. 8Kwa upa wa Nuka ya Jordani, mwa naha ye lumbile kwa upa wa Jeriko mwa lihalaupa, ba keta Bezeri kwa lusika lwa Rubeni. Ba keta Ramoti mwa Giliadi, kwa lusika lwa Gadi, ni Golani mwa Bashani kwa lusika lwa Manase. 9Ye, ki yona minzi ya masabelo ye ketezwi Maisilaele kamukana, ni muzwahule ufi ni ufi ya yahile ni bona. Mutu kaufela ya n'a bulaya yo muñwi ka kozi, n'a silelezwa mo. N'a si ke a bulaiwa ki batu ba ba ne ba bata ku mu bulaya, kono n'a zekiswa kwateñi fapil'a nyangela.
Lozi Interconfessional Bible, Catholic Edition © Bible Society of Zambia, 2009.