Joshua 19
19
Naha ye filwe ba Simioni
1Kalulo ya bubeli ya abelwa ba limba za lusika lwa Simioni. Sibaka sa bona ne si li mwahal'a naha ye n'e filwe ba lusika lwa Juda. 2#1 Lita 4.28-33 Kalulo yeo ne i kopanyeleza cwalo ni Beeresheba, Sheba, Molada, 3Hazara-Shuala, Bala, Azemu, 4Elitoladi, Betuli, Horoma, 5Zikilagi, Beti-Marakaboto, Hazari-Susa, 6Beti-Lebaoti hamoho ni Sharuheni. I n'e li minzi ye lishumi ni ye milalu ni tundiana twa yona.
7Hape, ne ku na ni Aini, Rimoni, Eteri ni Ashana, ili minzi ye mine ni tundiana twa yona. 8Kalulo yeo i n'e kopanyeleleza cwalo ni tundiana ni minzi ye bapani ni yona, ku y'o fita kwa Baalati-Beere ili Rama wa kwa mboela. Ye ki yona naha ye ne ba amuhezi ba limba za lusika lwa Simioni. 9Naha yeo ya lusika lwa Simioni ya nga ni kalulo ye ñwi ya naha ya ba Juda. Ba Juda ne ba filwe naha ye tuna ku fita mo ne ba tokwela, mi kabakaleo ba lusika lwa Simioni ba fiwa kalulo ye ñwi ya naha ya bona.
Naha ye filwe ba Zebuloni
10Kalulo ya bulalu ya abelwa ba limba za lusika lwa Zebuloni. Naha ye ne ba amuhezi ne i y'o fita kwa Sarida. 11Mululwani cwale wa ya kwa wiko kwa Marala, ku fita kwa Dabesheti ni kwa nukana ye kwa upa wa munzi wa Jokineami. 12Mwabuse bwa Sarida, wa fita kwa upa, kwa mululwani wa naha ya Kisiloti-Tabori. Wa y'o fitelela kwa Daberati, mi wa kambamela kwa Jafia. 13Ku zwa fo wa liba cwalo kwa upa ku y'o fita kwa Gati-Hefere ni Eti-Kazini. Kihona mululwani u liba kwa neku la Nea mwa nzila ye ya kwa Rimoni. 14Kwa mutulo, mululwani wa liba kwa Hanatoni, mi wa y'o felela kwa Musindi wa Ifita-Eli. 15Wa ngelela ni Katati, Nahalalo, Shimironi, Idala ni Betelehema. I n'e li minzi ye lishumi ka ye mibeli hamohocwalo ni tundiana twa yona. 16Minzi ye ni tunzinyana twa yona ne i li mwa naha ye n'e amuhezwi ki ba limba za lusika lwa Zebuloni ku ba naha ya bona.
Naha ye filwe ba Isakare
17Kalulo ya bune ya abelwa ba limba za lusika lwa Isakare. 18Sibaka sa bona ne si kopanyeleza minzi ya bo Jizireele, Kesulota, Shunemi, 19Hafaraimi, Shioni, Hanaharati, 20Rabiti, Kishioni, Ebezi, 21Remeti, Eni-Ganimu, Eni-Hada ni Beti-Pazezi. 22Mululwani wa y'o fita cwalo ni kwa Tabori, Shahazuma ni Beti-Shemeshi, ku y'o felela kwa Jordani. U n'o ngelela minzi ye lishumi ka ye silezi ni tunzinyana twa yona. 23Minzi ye ni tunzinyana twa yona i n'e li mwa naha ye n'e amuhezwi ki ba limba za lusika lwa Isakare ku ba ya bona.
Naha ye filwe ba Asere
24Kalulo ya buketalizoho ya abelwa ba limba za lusika lwa Asere. 25Sibaka sa bona ne si ngelela Helikati, Hali, Beteni, Akisafi, 26Alameleki, Amadi ni Mishali. Kwa wiko museto n'o fita kwa Karimele ni Shikori-Libinata. 27Cwale kwa upa, mululwani wa liba kwa Beti-Dagoni, mane ku y'o fita kwa Zebuloni ni kwa Musindi wa Efita-Eli, u nz'o libile kwa mutulo, kwa Beti-Emeki ni Neyeli. Wa zwelapili cwalo ku liba mutulo kwa Kabule, 28Eberoni, Rehobo, Hamoni ni Kana, mane ku y'o fita kwa Sidoni o Mutuna. 29Mululwani cwale wa y'o fetuha ku liba Rama, ku fita kwa Tire, munzi o mwa lukwakwa lo lu tiile. Cwale kiha u y'o fetuha ku liba Hosa ni ku y'o felela kwa Liwate la Mediteranea. Wa kopanyeleza Mahalabi ni Akizibi, 30Uma, Afeka, ni Rehobo. Ye, ki minzi ye mashumi a mabeli ka ye mibeli hamohocwalo ni tundiana twa yona. 31Munzi ye i n'e filwe ba limba za lusika lwa Asere ku ba ya bona.
Naha ye filwe ba Nafetali
32Kalulo ya busilela ya abelwa ba limba za lusika lwa Nafetali. 33Mululwani wa yona n'o zwa kwa Helefi kwa kota ya oke ye yemi fakaufi ni Zaananimi, ku zwa Adama-Nekebi ni Jabineeli ku y'o fita kwa Lakumu mane ku y'o felela kwa Nuka ya Jordani. 34Museto cwale wa fetuha ku liba wiko kwa Azinotu-Tabori, mi ku zwa fo wa ya kwa Hukoko, ku y'o fita kwa Zebuloni kwa mboela, Asere ili kwa wiko, ni Juda kwa upa kwa Jordani. 35Minzi ye ne li mwa makwakwa i n'e li Zidimi, Zere, Hamati, Rakati, Keniroti, 36Adama, Rama, Hazori, 37Kedeshi, Ederei, Eni-Hazori, 38Ironi, Migidala-Eli, Heremi, Beti-Anati ni Beti-Shemeshi, ili minzi ye lishumi ka ye supile ni ye mibeli hamoho ni minzinyana ya yona. 39Minzi ye, ni tundiana twa yona, ne i li mwa naha ye ne filwe ba limba za lusika lwa Nafetali ku ba ya bona.
Naha ye filwe ba Dani
40Kalulo ya busupa ya ablewa ba limba za lusika lwa Dani. 41Sibaka sa yona ne si nga Zora, Eshitaoli, Iri-Shemeshi, 42Shaalabimi, Ajaloni, Itila, 43Eloni, Timina, Ekeroni, 44Eliteki, Gibetoni, Baalati, 45Jehudi, Beni-Beraki, Gati-Rimoni, 46Me-Jarikoni ni Rakoni hamohocwalo ni naha ye bapani ni Jopa. 47#Baat 18.27-29 Batu ba Dani ha ba se ba taezi mwa naha ya bona, ba ya kwa Leshemi, mi ba u lwanisa. Ba u hapa ni ku bulaya batu ba mwateñi. Cwale ba ikungela ona, mi ba yaha mwateñi. Munzi wa Leshemi ba u beya libizo la Dani. Ba u beeleza libizo la kukw'a bona, Dani. 48Minzi ye, ni tunzinyana twa yona, n'e li mwa naha ye n'e filwe ba limba za lusika lwa Dani ku ba ya bona.
Naha ye filwe ba Joshua
49Maisilaele ha ba se ba felize ku aba likalulo zeo za naha, ba fa Joshua, mwan'a Nuni, kalulo ye ñwi ya naha kuli i be ya hae. 50Sina mw'a n'a laelezi Muñ'a Bupilo, ba mu fa munzi w'a n'a kupile, ili Timinati-Sera mwa naha ya malundu a Eferaimi. A yaha munzi sinca mi a ina mwateñi.
51Muprisita Eliazare, Joshua mwan'a Nuni, ni bahulu ba sicaba sa limba za masika a Isilaele, ba fana libaka ze za naha ka ku laula fapil'a Muñ'a Bupilo, hona mo mwa Shilo, kwa munyako wa Tabelenakele. Ba feza ku aba naha.
Lozi Interconfessional Bible, Catholic Edition © Bible Society of Zambia, 2009.