Joshua 13
13
Naha ye sa na ni ku ngiwa
1Joshua cwale n'a s'a supezi hahulu. Muñ'a Bupilo a li ku yena, “U s'o supezi hahulu, kono ku sa na ni naha ye tuna ye swanezi ku ngiwa. 2Ye siyezi i kuma fa lifasi la Mafilisita kamukana, ni naha ya Mageshuri kaufela. 3Naha ye, ye kalela kwa nukana ya Shihori, kwa museto wa Egepita ku y'o fita kwa mutulo kwa museto wa Ekeroni, i n'e hupulelwa kuli ki ya Makanana. Babusi ba Mafilisita ne ba yahile mwa Gaza, Ashidodi, Ashikeloni, Gati ni Ekeroni. Naha hape i ne i kopanya ni naha ya Maavi kwa mboela. 4I kopanya ni naha ya Kanana kamukana ku zwa Meara ya Masidoni ku y'o fita kwa Afeki ni museto wa Maamori. 5Hape i kopanya ni naha ye fakaufi ni Lebanoni kwa upa, ku zwa fa Baale-Gadi kwatas'a Lilundu la Heremoni, mane ku y'o fita ko i kalela nzila ya Hamati. 6#Lipa 33.54 Fo, ki ku kopanyeleza Masidoni kamukana ba ba pila mwa naha ya malundu, mwahal'a malundu a Lebanoni ni Mizirefoti-Maimi. Ni ta ba zwisa, sicaba sa Isilaele ha si nze si sutelela. U swanezi ku kauhanyeza sicaba sa Isilaele naha, kuli i be ya sona, sina mo ni ku laelezi kuli u eze cwalo. 7Cwalehe, naha yeo u i abele masika a supile ni a mabeli, ni kalulo ye ñwi ya lusika lwa Manase, kuli i be ya bona.”
Naha ye filwe kwa masika a Rubeni, Gadi ni Manase
8 #
Lipa 32.33; Mul 3.12 Masika a Rubeni ni Gadi, ni kalulo ye ñwi ya lusika lwa Manase ba amuhela naha ya bona kwa upa wa Nuka ya Jordani. Ye, ki yona y'a n'a ba file Mushe, mutang'a Muñ'a Bupilo. 9Naha ya bona ne i kalela kwa Aroere mwa mafelelezo a Musindi wa Arinoni ni kwa munzi mwahal'a musindi wo, ni libala kaufela la Medeba ku y'o fita kwa Diboni. 10I ne i ngelezi cwalo ni minzi ye n'e buswa ki Sihoni mulena wa Maamori, ya n'a busa kwa Heshiboni, mane ku y'o fita kwa museto wa Maamoni. 11I n'e kopanyelelize ni Giliadi, ni naha mo ne ba yahile Mageshuri ni Maamakati, ni Lilundu la Heremoni kaufela, ni Bashani kamukana mane ku y'o fita kwa Salika. 12Kwa y'o ngelelwa cwalo ni mubuso wa Ogo ya n'a busa kwa Ashitaroti ni Ederei. Ogo n'e li yena a nosi ku ba Refaimi ya n'a siyezi. Mushe n'a tuzi batu ba, ni ku ba leleka. 13Nihakulicwalo, Maisilaele, bona, ne ba si ka leleka Mageshuri ni Maamakati. Batu ba, ba sa pila mwa Isilaele ni kacenu.
14 #
Mul 18.1
Kono Mushe n'a si ka fa ba lusika lwa Livi mubu. Bona ne ba na ni ku amuhela litabelo za ku cisa, ze n'e ezezwanga Muñ'a Bupilo, ike ki yona mpo ya bona, sina mw'a n'a bulelezwi Mushe ki Muñ'a Bupilo.
15Mushe n'a file kalulo ye ñwi ya naha kwa limba za lusika lwa Rubeni kuli i be ya bona. 16Naha ya bona i ne i kalela kwa Aroere mwa mafelelezo a Musindi wa Arinoni, ni munzi o mwa musindi, ni libala kaufela le li potolohile Medeba. 17Kwa kopanyelezwa ni Heshiboni ni minzi kamukana ye mwa libala ili Diboni, Bamoti-Baale ni Beti-Baale-Meoni, 18Jaazi, Kedemoti, Mefaati, 19Kiryataimi, Sibima ni Zereti-Shahara fa lilundu mwa libala, 20Beti-Peori, njetumuko ya Lilundu la Pisiga, Beti-Jeshimoti, 21ni minzi ye miñwi kaufela ye mwa libala, minzi kamukana ya Mulena Sihoni wa Maamori ya n'a busa kwa Heshiboni. Mushe a mu tula, hamohocwalo ni babusi ba Midiani, ili bo Evi, Rekemi, Zuri, Huri ni Reba. Bao kamukana ne ba yahile mwa naha. I n'e li babusi ba ba mwatas'a Sihoni. 22Mwahal'a batu ba ba ne ba bulailwe ki Maisilaele ne ku na ni Balaami wa mulauli, mwan'a Beori. 23Nuka ya Jordani i n'e li yona museto wa lusika lwa Rubeni. Ye, ki yona minzi ni minzinyana ye ne filwe ba mba ya lusika lwa Rubeni ku ba ya bona.
24Mushe n'a file cwalo kalulo ya naha ku ba limba za lusika lwa Gadi kuli i be ya bona. 25Naha ya bona i ne i ngelela Jazeri ni minzi ya Giliadi kamukana ni kalulo ya naha ya ba Amoni, ku y'o fita kwa Aroere, o kwa upa wa Raba. 26Ne i kalela kwa Heshiboni, ku y'o fita kwa Ramati-Mizipe ni kwa Betonimi, ku zwa Mahanaimi mane ku y'o fita kwa mululwani wa Debiri. 27Mwa Musindi wa Jordani i ne i ngelela ni Beti-Arama, Beti-Nimira, Sukoti ni Zafoni, ni naha ye siyezi ya mubuso wa Sihoni, mulena wa Heshiboni. Museto ona i n'e li Nuka ya Jordani ku y'o fita kwa Lisa la Galilea, mi naha ne i liba kwa upa. 28Ye ki yona minzi ni minzinyana ye n'e filwe kwa limba za lusika lwa Gadi kuli i be ya bona.
29Hape Mushe n'a file ba bañwi ba lusika lwa Manase kalulo ye ñwi ya naha ka ku ya ka limba za bona. 30Naha ya bona ne i kalela kwa Mahanaimi, ku ngelela ni Bashani kaufela ni mubuso wa Ogo, mulena wa Bashani, hamohocwalo ni minzi ye mashumi a silezi ya Jairi ye mwa Bashani. 31Ya kopanyeleza ni kalulo ya Giliadi, ni Ashitaroti cwalo ni Ederei, minzi ye mwa mubuso wa Ogo mwa Bashani. Ye, i ne i filwe kwa kalulo ya limba za baikulu ba Makiri, mwan'a Manase.
32Mo, ki mona mw'a n'a ezelize Mushe mwa Mabala a Moabi, ni mw'a n'a kauhanyelize naha ye kwa upa wa Jeriko ni Jordani. 33#Lipa 18.20; Mul 18.2 Kono Mushe n'a si ka fa naha ku ba lusika lwa Livi. A ba bulelela feela kuli Muñ'a Bupilo, Mulimu wa Isilaele, ki yena ya ta ba liluwo la bona.
Lozi Interconfessional Bible, Catholic Edition © Bible Society of Zambia, 2009.