Joshua 12
12
Malena ba ba tuzwi ki Mushe
1 #
Lipa 21.21-35; Mul 2.26—3.11 Sicaba sa Isilaele sa tula mi sa nga naha ye kwa upa wa Jordani, ku kalela kwa Musindi wa Arinoni ku ya kwa Musindi wa Jordani mane ku y'o fita kwa Lilundu la Heremoni. Malena ba babeli ne ba tuzwi ki Maisilaele. 2Yo muñwi n'e li Sihoni, mulena wa Maamori, ya n'a yahile mwa Heshiboni. Mubuso wa hae n'o kalela kwa Aroere, kwa mukulo wa Libala la Arinoni, ni ku zwa mwahal'a libala, mane ku y'o fita kwa Nuka ya Jaboki ili ona museto wa Maamoni. Ye kaufela ki kalulo ya naha ya Giliadi. 3Mubuso wa hae n'o sa zwelapili kwa upa wa Musindi wa Jordani, ku zwa kwa Lisa la Galilea ku liba kwa Beti-Jeshimoti, kwa upa wa Liwate la Lizwai, mane ku y'o fita kwa mboela kwatas'a Lilundu la Pisiga.
4Ba tula cwalo ni Ogo, mulena wa Bashani, ya n'a li yo muñwi wa mafelelezo wa Marefaimi. N'a yahile kwa Ashitaroti ni Ederei. 5Mubuso wa hae n'o kopanya ni Lilundu la Heremoni ni naha ya Saluka ni ya Bashani kamukana, ku y'o fita kwa naha ya Mageshuri ni kwa miseto ya Maamakati, hamohocwalo ni kalulo ya Giliadi, ku ba ku y'o fita kwa naha ya Sihoni, mulena wa Heshiboni.
6 #
Lipa 32.33; Mul 3.12 Mushe ni sicaba sa Isilaele ba tula malena ba. Mushe mutang'a Mulena a fana naha ya bona ku ba lusika lwa Rubeni, Gadi, ni kalulo ya lusika lwa Manase, ya ba kabelo ya bona.
Malena ba ba tuzwi ki Joshua
7Joshua ni sicaba sa Isilaele ba tula malena kamukana ba ba ne ba pila mwa naha ye kwa wiko wa Jordani, ku kalela kwa Baale-Gadi mwa Musindi wa Lebanoni, ku y'o fita kwa Lilundu la Halaki ku liba kwa neku la Seiri. Joshua a alulela masika a Isilaele naha yeo, kuli i be naha ya bona kuya kuile. 8Kalulo yeo, i ne i kopanyeleza naha ya malundu, mahwatata, Musindi wa Jordani, naha ye kwatas'a malundu, lihalaupa ni naha ya Negeve. Naha yeo i n'e li ya Mahiti, Maamori, Makanana, Maperizi, Mahivi ni Majebusi. 9Mi malena ba ba tuzwi ki ba, ili mulena wa Jeriko ni wa Ai fakaufi ni Betele, 10wa Jerusalema ni wa Heberoni, 11wa Yarumuti ni wa Lakishi, 12wa Egeloni ni wa Gezeri, 13wa Debiri ni wa Gederi, 14wa Horoma ni wa Aradi, 15wa Libina ni wa Adulami, 16wa Makeda ni wa Betele, 17wa Tapua ni wa Heferi, 18wa Afeki ni wa Lasharoni, 19wa Madoni ni wa Hazori, 20wa Shimironi-Meroni ni wa Akisafi, 21wa Taanaki ni wa Megido, 22wa Kadeshi ni wa Jokoneami wa kwa Karimele, 23wa Doro fa likamba la liwate, wa Goyime fakaufi ni Giligali, 24ni wa Tiriza. Hamoho ki malena ba mashumi a malalu ni a li muñwi kaufel'a bona.
Lozi Interconfessional Bible, Catholic Edition © Bible Society of Zambia, 2009.