Isaya 53
53
1 #
Joa 12.38; Baro 10.16 Batu ba alaba, ba li,
“Ki mañi ya n'a ta kolwa
se lu biha ka nako ye?
Ya n'a ta bona lizoho
la Muñ'a Bupilo mo ki mañi?
2I ne i li tato ya Muñ'a Bupilo
kuli mutang'a hae a hule sina kota
ye toma mubisi mo ku omile.
N'a sa kutekehi, mi n'a si na bunde
kuli lu kone ku mu lemuha.
Ne ku si na se si kateleha ku yena,
se ne si ta lu yaululela ku yena.
3Lu mu nyaziselize ni ku mu hana.
U nyandile habutuku.
Ne ku si na ni ya n'a ka mu talima.
Lu mu kendile inge ne si mutu.
4 #
Mat 8.17
“Kono u nyandile mwa sibaka
sa luna,
mi u lwezi butuku bo ne lu swanezi
ku utwa luna.
Nako kaufela ne lu hupula kuli
manyando a hae n'e li mulatu
o n'o tisizwe ki Mulimu.
5 #
1 Pit 2.24
Kono a holofazwa kabakala libi
za luna,
a natiwa kabakala bumaswe
bo ne lu ezize.
Butuku bw'a utwisizwe bu lu lukuluzi,
mi lu folisizwe ki matibili a' fumani.
6 #
1 Pit 2.25
Kaufel'a luna ne lu swana sina lingu
ze latehile,
yo muñwi ni yo muñwi wa luna
a nz'a ikela ka nzila ya hae.
Mi Muñ'a Bupilo a mu lwesa mulatu,
ili mulatu o ne lu lukela ku lweswa
luna kaufela.
7 #
Sin 5.6
#Lik 8.32-33 “A ezwa ka buhali,
kono a bu amuhela ka bunolo.
H'a si ka bulela se siñwi.
Sina ngunyana ye tuha i bulaiwa,
kamba ngu ye kutiwa,
ha ku na s'a bulezi.
8A tamiwa, a atulwa,
mi a iswa kwa ku y'o shwa,
mi ha ku na ya bilaezi ka ze
ne mu tahela.
A bulaiwa kabakala libi za sicaba
sa luna.
9 #
1 Pit 2.22
A y'o bulukwa mwa libita ni lisinyi.
A y'o pumbekwa ni bafumi,
niha n'a si na mulatu w'a n'a ezize,
kamba ku bulela buhata feela.”
10Muñ'a Bupilo u li,
“I n'e li tato ya ka kuli a nyande.
Lifu ne li li sitabelo
se si tisa swalelo.
Kabakaleo u ta bona baikulu ba hae.
U ta ba ni bupilo bo butelele,
mi ki ka yena mulelo wa ka
ha u ka konda.
11Mwamulaho a bupilo
bwa manyando,
u ta ba ni tabo hape.
U ta ziba kuli h'a nyandile
i ne si feela-feela.
Ki mutang'a ka ya lukile.
U ta lwala mulatu wa ba bañata,
mi a ba eze batu ba ka
ba ba sepahala.
12 #
Mar 15.28; Luk 22.37 Kabakaleo ni ta mu fa sibaka
se si kutekeha,
sibaka mwahal'a batu ba batuna
ba ba maata.
U latile ku itombola bupilo bwa hae,
mi u ikabezi bumai ni lisinyi.
U ngile sibaka sa baezalibi
ba bañata,
mi u nyandezi milatu ya bona.”
Lozi Interconfessional Bible, Catholic Edition © Bible Society of Zambia, 2009.