Isaya 52
52
Mulimu u ta pilisa Jerusalema
1 #
Sin 21.2,27 Jerusalema, tiya mi u be yo
mutuna hape!
Munzi wa Mulimu o kenile,
u kabe ka liapalo ze nde!
Muhedeni h'a sa na ku kena
mwa minyako ya hao hape.
2Jerusalema, itutule, u lukuluhe!
Zuha mwa liluli,
mi u ine mwa lubona lwa hao.
A mu tamulule mawenge a mi tamile,
lihapiwa za Sione!
3Muñ'a Bupilo u li kwa batu ba hae,
“Ha ku na mali a zwisizwe ku mi leka,
kono nihakulicwalo mu bile batanga.
Ha ku na tifo ye ka lifiwa
ku mi lukulula,
kono nihakulicwalo mu ta lukuluha.
4Mu kile mwa pila mwa Egepita,
mu li balicaba,
mi mwamulaho mwa nyandiswa
ki Asiria ku si na libaka.
5 #
Baro 2.24
Cwale nto ye swana i s'e ezahalile
ni mwa Babilona.
Mu lihapiwa hona mo ku si na libaka.
Ba ba mi busa ba ipahamisa
mi ba tundamezi ku ni shwaula.
6Kono mwa nako ye taha
mu ta lemuha kuli ki na Mulimu
ni kuli ni bulezi ku mina.”
7 #
Nah 1.15; Baro 10.15; Baef 6.15 Ki ko kunde cwañi ku bona
numwana ya zwa kwa malundu,
a tisa litaba ze nde,
ili litaba za kozo!
A biha ku tula, mi a li ku Sione,
“Mulimu wa hao ki mulena!”
8Ba ba libelela munzi ba huwa.
Ba huwa hamoho ka tabo!
Ba bona ka meeto a bona luli
Muñ'a Bupilo h'a kutela mwa Sione!
9A mu huwe ka tabo,
mina mabumbuywa a Jerusalema!
Muñ'a Bupilo u omba-ombile batu
ba hae.
U pilisize munzi wa hae.
10Muñ'a Bupilo u itusisize maata
a hae a kenile!
U pilisize sicaba sa hae,
mi lifasi kamukana li boni taba yeo.
11 #
2 Bakor 6.17
A mu zwe mwa Babilona hona fa,
mina kaufela ba ba lwezi ze kenile!
Mu si ke mwa swala ze hanisizwe.
Mu ipuluke
mu nze mu li ba ba kenile
mi mu zwe mwa munzi.
12Ka nako ye ha mu na ku zwa
ka lubilo.
Ha mu na ku lika ku toba!
Muñ'a Bupilo,
Mulimu wa mina,
u ta mi etelela
mi a mi sileleze mwa maneku kaufela.
Mutanga ya nyanda
13Muñ'a Bupilo u li,
“Mutang'a ka u ta kondisa
musebezi wa hae.
U ta ba yo mutuna,
ya kutekiwa hahulu.
14Batu ba bañata
ne ba mbwetukile
ha ba mu bona.
N'a sinyehile hahulu sifateho,
mane n'a sa bonahali kuli ki mutu.
15 #
Baro 15.21
Kono cwale macaba a mañata
a ta ikomokela ka yena,
mi malena ha ba na ku bulela.
Ba ta komoka feela.
Ba ta bona ni ku utwisisa
nto ye ne ba si ka ziba kale.”
Lozi Interconfessional Bible, Catholic Edition © Bible Society of Zambia, 2009.