Isaya 41
41
Sepiso ye tiile ya Mulimu wa Isilaele
1Mulimu u li,
“A mu kuze, mi mu ni teeleze,
mina manaha a kwahule!
Mu itukiseze ku kenya taba ya mina
mwa kuta.
Mu ta fumana nako ya ku bulela.
A lu kopaneñi, lu t'o bona ya lukile.
2“Ki mañi ya tisize muhali yo
ya zwa kwa upa, ya til'o tula,
mi ya zamaya a nz'a hapa
kw'a ya kaufela?
Ki mañi ya mu konisa ku tula malena
ni macaba?
U ba lelekisa inge liluli feela,
ka lilumo la hae!
Masho a hae a ba hasanya sina bucwañi
mwa moya!
3Wa ba matisa,
mi u zamaya mo ku si na kozi,
ka bubebe, inge ya sa hati fafasi!
4Ki mañi ya ezize kuli zeo li ezahale?
Ki mañi ya lukisize litaba
ka mukwa wo?
Na, Muñ'a Bupilo,
ne ni li teñi kwa makalelo,
mi ni ta ba teñi ni kwa mafelelezo,
na, Mulena Mulimu.
5“Batu ba manaha a kwahule ba boni
ze ni ezize.
Ba saba, mane ba ngangamiswa
ki sabo.
Cwale ba kopana hamoho.
6Likwala ba tusana
ni ku susuezana.
7Mubeti u li ku mutuli wa gauda,
‘U ezize hande!’
Ya loleka maswaniso,
u susueza ya a ngongotela.
Yo muñwi u li,
‘Ku nwiselizwe hande,’
mi ba tiisa siswaniso mwa sibaka
sa sona ka limapo.
8 #
2 Lita 20.7; Jak 2.23 “Kono mina Maisilaele,
batanga ba ka,
ki mina sicaba se ni ketile,
baikulu ba mulikan'a ka Abrahama.
9Ni mi zwisize kwa mafelelezo
a lifasi.
Ni mi bizize, mu li mwa malulu
a kwahule,
mi na li ku mina,
‘Mu batanga ba ka.’
Ha ni si ka mi hana,
kono ni mi ketile.
10Mu si ke mwa saba.
Ni inzi ni mina.
Ni Mulimu wa mina.
Mu si ke mwa kuñiswa ki se siñwi.
Ni ta mi fa maata, ni mi tuse.
Ni ta mi sileleza, ni mi pilise.
11“Ba ba mi nyemezi,
mina batu ba ka,
ba ta swabiswa,
ba ikutwe ba tompolozwi.
Ba ba mi lwanisa ba ta shwa.
12Ba ba mi tiseza ndwa,
ha ba sa na ku bonwa
mwa lifasi.
13Ki na Muñ'a Bupilo,
Mulimu wa mina.
Ni tiisa maata a mina,
mi ni mi bulelela, ni li,
‘Mu si ke mwa saba.
Ni ta mi tusa.’ ”
14Muñ'a Bupilo u li,
“Niha mu li ba banyanyani,
ba ba fokola, Isilaele,
mu si ke mwa saba. Ni ta mi tusa.
Na, Mulimu ya Kenile wa Isilaele,
ki na ya mi pilisa.
15Ni ta mi eza sina sipuliso,
sipuliso se sinca
se si na ni mishengela.
Mu ta pula malundu
mane mu a ululule.
Malundunyana ona
a fetuhe maluli feela.
16Mu ta a nepakela mwahalimu,
a ngiwe ki moya,
mi a ta hasanywa ki liñungwa.
Kono mina mu ta iketa,
kakuli ni Mulimu wa mina.
Mu ta ni lumba, na,
Mulimu ya Kenile wa Isilaele.
17“Batu ba ka ha ba tokwa mezi
mi b'a bata,
mimizo ya bona i nze i omelelizwe
ki linyolwa,
fohe na, Muñ'a Bupilo,
ni ta alaba tapelo ya bona.
Na, Mulimu wa Isilaele,
ha ni na ku ba tuhela ni kamuta.
18Ni ta bubisa linuka mwa malundu
a omelezi,
ni linukana mwa misindi.
Lihalaupa ni ta li fetula masa
mi naha ye omile i be linukana.
19Ni ta melisa likota za sidare
mwa naheñi,
ni za akesha ni za sikwa ni za olive.
Mishitu i ta mela mwa naha ye otile,
mishitu ya kiprese ni mipulanga.
20Batu ba ta li bona zeo,
mi ba zibe kuli ki na, Muñ'a Bupilo,
ya li ezize.
Ba ta utwisisa
kuli Mulimu ya Kenile wa Isilaele
ki yena ya ezize kuli li ezahale.
Muñ'a Bupilo u lwanisa milimu ya buhata
21Muñ'a Bupilo, Mulena wa Isilaele, u bulela cwana, u li,
“Mina milimu ya macaba,
mu kenye taba ya mina.
Mu tise buikalabelo bo bu tiile
bo mu na ni bona!
22Mu tahe kwanu,
mi mu kananise se si ta ezahala.
Mu taluseze kuta ka ze ezahalile,
mi mu lu bulelele mo li ta felela
kamukana,
kuli lu li zibe ha li ezahala.
23Mu lu bulelele ze ka taha kwapili
mi fohe lu ta ziba kuli mu milimu!
Mu eze nto ye nde,
kamba mu tise ziezi.
Mu lu sabise, mi lu ikomokele!
24Mina, ha mu batu,
mi ze mu eza kamukana
ha li na tuso.
Ba ba mi lapela ba nyenyisa!
25“Ni ketile mutu ya ina kwa upa.
Ni ta mu tisa ku t'o lwanela
kwa mutulo.
U hatikela babusi inge sileze,
sina mubupi h'a hatikela lizupa.
26Ki ufi ku mina ya lu bulelezi taba,
i si ka ezahala kale,
kamba ya lemuhile kuli i ta ezahala,
kuli lu bulele kuli,
‘Kanti mu nepile?’
Ha ku na ya bulezi linzwi ku mina.
Ha ku na ya mi utwile
mu nze mu bulela!
27Na, Muñ'a Bupilo, ki na wa pili
ya taluselize Sione litaba.
Ni lumile numwana kwa Jerusalema
ku y'o li,
‘Batu ba hao ba taha!
Ba taha kwa hae!’
28Ha ni talima mwahal'a milimu,
ne ku si na ya n'a na ni
s'a ka bulela.
Ne ku si na ya n'a ka alaba puzo
ye ne ni buza.
29Milimu ye kaufela ha i na tuso.
Ha ku na ni se sikana
se i kona ku eza.
Maswaniso a yona a fokola.
H'a na maata!”
Lozi Interconfessional Bible, Catholic Edition © Bible Society of Zambia, 2009.