Isaya 40
40
Manzwi a sepo
1“Mu omba-ombe batu ba ka,”
ku bulela Mulimu.
“Mu ba omba-ombe!
2Mu tiise batu ba Jerusalema lipilu.
Mu ba bulelele kuli ku nyanda
kwa bona ku likani,
ni kuli cwale libi za bona
li se li swalezwi.
Ni ba utwisize butuku ka libi za bona
kamukana.”
3 #
Litu 48.10; Bar 5.7;
Mat 3.3; Mar 1.3; Joa 1.23 #Luk 3.4-6 Linzwi le li huwa li li,
“Mu lukiseze Muñ'a Bupilo nzila
mwa naheñi!
Mu bakanyeze Mulimu wa luna nzila
mwa lihalaupa!
4Mulapo kaufela u ta yumbelwa.
Malundu kamukana a ta ulululwa.
Malundunyana a ta fetuha libala.
Naha ya matulungundu
i ta patamiswa hande.
5Kihona maata a Muñ'a Bupilo
a ta bonahazwa,
mi batu kamukana ba t'a bona.
Muñ'a Bupilo kasibili u sepisize
cwalo.”
6 #
Jak 1.10-11; 1 Pit 1.24-25 Linzwi la huweleza, li li, “Bulela!”
Na buza, na li, “Ni ta bulelañi?”
“Bulela kuli batu kaufela ba swana
ni bucwañi.
Ha ba pili nako ye telele ku fita
lipalisa za mwa naheñi.
7Bucwañi bwa nyana,
ni lipalisa za letuka,
Muñ'a Bupilo h'a li lumelela moya
o fuka fahalimw'a zona.
Haili batu, ha ba si ka tiya ku fita
bucwañi!
8Ee, bucwañi bwa nyana ni lipalisa
za letuka,
kono linzwi la Mulimu wa luna
li ta tiya kuya kuile!”
9Jerusalema, kambamela fa lilundu
le litelele.
Talusa litaba ze nde!
Sione, tiisa ku biza.
Talusa litaba ze nde!
Tiisa ku bulela. U si ke wa saba.
Bulelela ba minzi ya Juda
kuli Mulimu wa bona wa taha!
10 #
Isa 62.11; Sin 22.12 Muñ'a Bupilo u taha ku t'o busa
ka maata.
U taha ni batu b'a pilisize.
11 #
Ezek 34.15; Joa 10.11 U ta babalela mutapi wa hae
sina mulisana.
U ta kopanya lingunyana hamoho,
a li lwale mwa mazoho a hae,
mi m'a zona u ta ba etelela hande.
Mulimu wa Isilaele ya sa likanyiwi
12Kana mutu a ka likanya liwate
mwa mazoho,
kamba lihalimu ka singandi
sa lizoho la hae, nji?
Kana mutu a ka beya mubu wa lifasi
mwa komoki,
kamba ku likanya malundu
ni malundunyana fa sikala?
13 #
Baro 11.34; 1 Bakor 2.16 Kikuli mutu a ka bulelela
Muñ'a Bupilo s'a swanezi ku eza?
Ki mañi ya ka mu luta,
kamba ku mu eleza?
14Mulimu u lelisananga ni mañi
kuli a zibe ni ku utwisisa,
kamba ku ituta mo li swanezi
ku ezezwa lika?
15 #
But 11.22; Litu 10.16, 17 Ku Muñ'a Bupilo macaba
ha si se siñwi.
A swana ni lilotoli la mezi.
Ni lioli ze kwahule li bubebe
sina liluli.
16Lifolofolo kaufela ze mwa mishitu
ya Lebanoni
ha li likani ku ezeza Mulimu wa luna
sitabelo,
ni likota za yona ki ze nyinyani
kwa ku tumbulisa mulilo.
17Ku yena macaba ha si sika,
ni hanyinyani.
18 #
Lik 17.29
Mulimu u ka likanywa ni mañi?
Mu ka talusa cwañi mw'a inezi?
19H'a swani ni siswaniso
se si betilwe ki batu,
se si kwahezwi ka gauda ki mambuti
mi si yemiswa fa sitomelo sa silivela.
20 #
But 13.11-19
Mutu ya palelwa silivela ni gauda
u keta kota ye sa sumpiwi.
U bata mubeti wa sikwala
ku eza siswaniso se si si ke sa wa.
21Kana ha mu zibi?
Ha mu si ka utwa, nji?
Kwaikale, ne mu si ka bulelewa, naa?
Ha mu si ka utwa
mo li kalezi lifasi, nji?
22Li ezizwe ki ya inzi fa lubona
lwa hae
fahalimw'a lifasi ni kwabuse
bwa lihalimu.
Batu mwa lifasi ba bonahala bunyinyani
sina butwa!
Lihalimu u li otolozi
sina lisila la ku pumisa,
sina tende mo ba ina batu.
23U kokobeza babusi ba ba maata,
mi u ba fetula linto feela.
24Ba swana ni limela ze nyinyani,
ze sa z'o suñiwa, li si na mibisi.
Muñ'a Bupilo h'a lumela moya,
za oma mi li fefuka sina bucwañi.
25Mulimu ya Kenile a ka likanywa
ni mañi?
Kana u teñi ya swana ni yena, nji?
26 #
Bar 3.34, 35 A mu talime kwa lihalimu!
Ki mañi ya ezize linaleli ze mu bona?
Ya li etelela sina masole,
u ziba palo ya zona,
mi u li biza ka mabizo
kaufel'a zona!
Maata a hae ki a matuna.
Ha ku na ye ka lateha ku zona!
27Cwale Isilaele, u bilaelelañi
kuli Muñ'a Bupilo h'a zibi
manyando a hao,
mi h'a isi pilu kwa ku ku lukiseza
lika?
28Ha u zibi, nji?
Ha u si ka utwa, naa?
Muñ'a Bupilo ki Mulimu wa Kamita.
U bupile lifasi kamukana.
H'a katali kamba ku fokola.
Ha ku na ya utwisisa mihupulo
ya hae.
29U tiisa ba ba fokola,
ni ba ba katezi.
30Nihaili ba banca ba fokolanga.
Mitangana ba kona ku kenwa
ki mukatala.
31Kono ba ba sepile ku tusiwa
ki Muñ'a Bupilo
ba ta fiwa maata a manca.
Ba ta fufela mwahalimu
sina limbande.
Ha ba ta mata,
ha ba na ku katala.
Ha ba ta zamaya,
ha ba na ku fokola.
Lozi Interconfessional Bible, Catholic Edition © Bible Society of Zambia, 2009.