Mututo 34

Matapa a bubeli a macwe

(Mul 10.1-5)

1Muñ'a Bupilo a li ku Mushe, “U bete matapa a mabeli a macwe a swana ni a pili, mi ni ta ñola fateñi ze ne ni ñozi fa matapa a pili a n'o tubile. 2U itukise kamuso kakusasa, mi u kambame fa Lilundu la Sinai, u t'o kopana ni na fa ngo ya lona. 3U si ke wa taha ni mutu. Ku si ke kwa bonahala mutu mwa maneku a lilundu kamukana. Ku si ke kwa ba ni komu kamba ngu ye ta fulela fakaufi ni lilundu.” 4Cwale Mushe a beta matapa a mabeli a macwe a swana ni a pili, mi habusa kakusasa a kambama fa Lilundu la Sinai, a nz'a lwezi matapa ao a mabeli sina mw'a n'a mu laelezi Muñ'a Bupilo.

5Muñ'a Bupilo a shetumuka ka lilu, a t'o yema ni yena hona fo, mi a bulela libizo la hae, la Muñ'a Bupilo. 6#Mut 20.5-6; Lipa 14.18; Mul 5.9-10; 7.9-10 Muñ'a Bupilo a fita fapil'a hae, mi a bulela libizo la hae, a li, “Muñ'a Bupilo, Muñ'a Bupilo ki Mulimu ya tezi sishemo ni makeke, ya liyeha ku halifa, mi ya bonisa lilato le li sa fetuhi ni busepahali. 7U bulukela batu ba likiti lisepiso za hae, mi u swalela bumaswe, ku sa luka, ni sibi. Kono h'a na ku libala kapa ku palelwa ku fa mulatu kwa bana ni baikulu ku isa kwa lusika lwa bulalu ni lwa bune kabakala libi za bashemi ba bona.”

8Mushe kapili a inamela fafasi, a kandelela mi a lapela. 9A li, “Haiba wa ni tabela luli, na ku kupa kuli u ye ni luna, Muñ'a Bupilo. Batu ba, ba na ni litoho-tata, kono u lu swalele bumaswe bwa luna ni sibi sa luna, mi u lu amuhele lu be liluwo la hao.”

Bulikani bwa ncafazwa

(Mut 23.14-19; Mul 7.1-5; 16.1-17)

10Muñ'a Bupilo a li, “Ni tuha ni iswala bulikani ni mina. Ni ta eza likezo ze tuna fapil'a batu ba hao kaufela, ili likezo ze si ka eziwa kale mwa lifasi kamukana, ni mwahal'a mishobo ifi kamba ifi. Batu kaufela ba ba inzi ni wena ba ta bona s'a ta eza Muñ'a Bupilo, kakuli ni tuha ni mi ezeza kezo ye komokisa. 11U utwe milao ye ni ta ku fa yona kacenu. Pili u si ka fita, ni ta leleka Maamori, Makanana, Mahiti, Maperizi, Mahivi ni Majebusi. 12U tokomele kuli u si ke wa eza litumelelano ni batu ba naha ye u kena ku yona, kakuli ka ku eza cwalo u ka ipizeza bumai. 13#Mul 16.21 Kono se mu swanezi ku eza, ki ku tataula tutala twa bona, ku tubaka macwe a bona a kenile ni ku lemaka likota za bona ze kenile.

14“U si ke wa lapela mulimu u sili, kakuli libizo la Muñ'a Bupilo ki Lifufa. Ni Mulimu ya na ni lifufa. 15U si ke wa eza tumelelano ifi kamba ifi ni batu ba mwa naha mo, kakuli ha ba eza sina mahule mwa ku lapela milimu ya bona ni ku i ezeza litabelo, ba ka ku mema, mi u ka swana u ca kwa lico ze ba tabezi milimu ya bona. 16U ka swana wa nga bana ba bona kuli ba nyalwe ki bana ba hao ba bashimani, mi basali ba bazwahule bao ba ka eza likezo za buhule mwa ku sebeleza milimu ya bona. Ba ta kelusa bana ba hao kuli ba si ke ba sepahala ku na, mi ba sebeleze milimu ya habo basali ba bona.

17 # Mut 20.4; Malivi 19.4; Mul 5.8; 27.15 “U si ke wa ikezeza milimu ya ku sulula fa sipi ye shengunukisizwe.

18 # Mut 12.14-20; Malivi 23.6-8; Lipa 28.16-25 “U buluke Mukiti wa Linkwa ze si ka Umelwa. Sina ha ni ku laezi, u ka ca lico ze si ka umelwa ka mazazi a supile mwa kweli ya Abibi, kakuli u zwile ka yona kweli yeo mwa Egepita.

19 # Mut 13.2 “Mweli wa mushimani kaufela kamba mwan'a folofolo wa maizibulo ki wa ka. Mweli wa mushimani kaufela, ni namani ya siina ya maizibulo kwa likomu kamba lingu za mutapi wa hao kamukana ki za ka. 20#Mut 13.13 Kono wa kona ku cinca mbongolo ya hao ya maizibulo ka ngu. Haiba u sa i lekululi, u i lobe mulala. U ta lekulula cwalo ni mweli wa hao wa mushimani.

“Ku si ke kwa ba ni mutu ya ka taha fapil'a ka a si na mpo.

21 # Mut 20.9-10; 23.12; 31.15; 35.2; Malivi 23.3; Mul 5.13-14 “U ta sebeza mazazi a silezi, kono u si ke wa sebeza ka lizazi la busupa, nihaikaba ka nako ya ku lima kamba ya kutulo.

22 # Malivi 23.15-21; Lipa 28.26-31 “U ta buluka Mukiti wa Kutulo ha u nze u ca lico za pili za kutulo ya buloto. Mi u ta buluka ni Mukiti wa Minganda wa kutulo ya miselo kwa mafelelezo a silimo.

23“Batu ba mina ba banna kamukana ba ka tahanga halalu ka silimo fapil'a ka, na, Mulimu wa Isilaele. 24Ha ni se ni lelekisize macaba, wena u si ka fita kale, ni ku ekeza kwa naha ya hao, ha ku na ya ka lika ku tula naha ya hao haiba ka zona linako ze talu zeo za silimo u t'o iponahaza fapil'a ka, na, Muñ'a Bupilo, Mulimu wa hao.

25 # Mut 12.10 “U si ke wa sebelisa lico ze umezwi ha u ni tiseza mpo ya folofolo y'o t'o ni tabela. Hape, u si ke wa lobaza folofolo ifi kamba ifi ye tabezwi Mukiti wa Paseka.

26 # Mul 24.21; 26.2 “U ka tisa mwa ndu ya Muñ'a Bupilo mutamu o munde ka ku fitisisa wa mwa masimu a hao.

“U si ke wa apehisa ngunyana ka mabisi a m'a yona.”

27Muñ'a Bupilo a li ku Mushe, “U ñole manzwi a, kakuli ka ona manzwi a ni eza bulikani ni wena hamoho ni Isilaele.” 28Mushe a ina foo ni Muñ'a Bupilo mazazi ni masihu a mashumi a mane, a si na sa ku ca kamba ku nwa. A ñola fa matapa manzwi a bulikani ili milao ye lishumi.

Mushe u shetumuka fa lilundu

29 # 2 Bakor 3.7-16 Mushe h'a shetumuka fa Lilundu la Sinai, a lwezi matapa a mabeli a kupuzo, n'a sa zibi kuli pata ya hae ne i benya kakuli n'a bulezi ni Muñ'a Bupilo. 30Aruni ni batu kamukana ba talima Mushe, mi ba bona kuli pata ya hae ne i benya, mi ne ba saba ku mu sutelela. 31Kono Mushe a ba biza, mi Aruni ni bahulu ba sicaba ba kutela ku yena. Mushe kih'a bulela ni bona. 32Mwamulaho a fo, batu kamukana ba Isilaele ba sutelela, mi Mushe a ba fa litaelo kaufela z'a n'a mu bulelezi Muñ'a Bupilo fa Lilundu la Sinai. 33Mushe ha s'a felize ku bulela ni bona, a kwahela pata ya hae ka kasila. 34Nako kaufela Mushe ha n'a ya mwa tende fapil'a Muñ'a Bupilo ku y'o bulela ni yena, n'a zwisanga kasila ka ka kwahezi pata ya hae ku fitela a zwa mwateñi. Ha n'a zwa, n'a bulelela sicaba sa Isilaele z'a n'a laezwi ku li bulela kamukana. 35Mi ne ba bona kuli pata ya hae n'e benya. Cwale n'a kwahela hape pata ya hae ku fitela nako ye ñwi h'a ka ya ku y'o bulela ni Muñ'a Bupilo.

Currently Selected:

Mututo 34: Lozi09

Highlight

Copy

Compare