Mututo 33

Taelo ya ku funduka

1 # Sim 12.7; 26.3; 28.13 Muñ'a Bupilo a li ku Mushe, “U funduke mwa sibaka mo, ni batu b'o zwisize mwa Egepita, mu ye mwa naha ye ni sepisize ku i fa Abrahama, Isaka ni Jakobo, ha ni ize ku bona, ‘Ni ta fa naha ye kwa baikulu ba mina.’ 2Ni ta tangeta lingeloi. Ni ta leleka Makanana, Maamori, Mahiti, Maperizi, Mahivi ni Majebusi. 3Mu ya mwa naha ye nde ye nunile. Kono na, ha ni na ku ya ni mina, kakuli mu sicaba se si omelezi litoho, mi ni ka swana na mi bulaela mwa nzila.”

4Batu ha ba utwa litaba ze maswe zeo, ba kala ku lila, mi ha ku na ni yo mukana ku bona ya n'a apezi za mikabo hape. 5Muñ'a Bupilo a kile a bulela ku Mushe, a li, “U bulelele sicaba sa Isilaele, u li, ‘Mu sicaba se si toho-tata. Ha ne ni ka ya ni mina, nihaili nakonyana feela, ne ni ka mi feza kaufel'a mina. Cwale, a mu tubule mikabo ya mina, mi ni ta ziba se ni ka eza ku mina.’ ” 6Cwalehe, ku zwa fa Lilundu la Horebe, sicaba sa Isilaele ha si si ka apala mikabo hape.

Tende ya Kopano

7Mushe n'a twaezi ku bapulelanga tende kwand'a mafulo, ili kwahulenyana. Kih'a i biza Tende ya Kopano. Mutu ufi ni ufi ya n'a lakaza ku buza Muñ'a Bupilo n'a zwelanga kwande ku ya kwa Tende ya Kopano. 8Mw'a n'a yelanga Mushe kaufela kwa tende, batu kamukana ne ba yema, yo muñwi ni yo muñwi mwa munyako wa tende ya hae ku talimela Mushe mane a be a y'o kena mwa tende. 9Mushe ha n'a s'a keni mwahali, ne ku tahanga lilu le ne li t'o yema kwa munyako wa tende, mi Muñ'a Bupilo n'a bulelanga ni Mushe a li mwa lilu mo. 10Mi batu kamukana ha ne ba bona lilu kwa munyako wa tende, ne ba yemanga, mi yo muñwi ni yo muñwi n'a inamanga ku kandelela ka likute a li fa munyako wa tende ya hae. 11Muñ'a Bupilo n'a nz'a bulelanga ni Mushe ba nze ba talimani, sina mutu ni mulikan'a hae. I be Mushe n'a kutela kwa mafulo. Kono mutangana ya n'a li mutusi wa hae, ili Joshua mwan'a Nuni, yena, n'a sa zwangi mwa tende.

Mulimu u sepisa ku ba teñi

12Mushe a li ku Muñ'a Bupilo, “Ki niti kuli u ni bulelezi kuli ni etelele sicaba se, kono ha u si ka ni bulelela y'o ni ta zamaya ni yena. Nihakulicwalo u ize, ‘Ni ku ziba hande hahulu, mi wa ni tabisa.’ 13Cwalehe, haiba na ku tabisa, ni kupa kuli u ni bulelele milelo ya hao kuli ni ku zibe, mi ni zwelepili ni nze ni ku tabisa. Hape, u hupule kuli sicaba se ki sicaba sa hao.”

14Muñ'a Bupilo a li, “Ni ta ya ni mina, mi mu ta ba ni buiketo.”

15Mushe a li ku yena, “Haiba u sa yi ni luna, u si ke wa lu siisa sibaka se. 16Hakulicwalo, mutu a ka ziba cwañi kuli u lata sicaba sa hao, ni na cwalo, haiba u sa yi ni luna? Ha u ka ya ni luna, batu ba hao hamoho ni na cwalo, lu ta ikutwa lu shemubilwe mwahal'a mishobo ye mwa lifasi kamukana.”

17Muñ'a Bupilo a li ku Mushe, “Ni ta eza hona m'o bulelezi, kakuli ni ku ziba hande hahulu, mi wa ni tabisa.”

18Mushe a buza, a li, “Na lapela, Muñ'a ka, a ku ni bonise kanya ya hao.”

19 # Baro 9.15 Muñ'a Bupilo a alaba, a li, “Ni ta fitisa bunde bwa ka kaufela fapil'a hao, mi ni ta bulela libizo la ka fapil'a hao, ili Muñ'a Bupilo. Ni ta bonisa makeke ni sishemo ku ye ni lata.” 20Muñ'a Bupilo a zwelapili, a li, “Ha u na ku bona pata ya ka, kakuli ha ku na mutu ya ka bona pata ya ka, mi hape a pila.” 21A zwelapili, a li, “Bona, sibaka ki se, kwatuko a ka, f'o ka yema fa licwe. 22Kanya ya ka ha i fita, ni ta ku beya mwa lwandala lwa licwe, mi ni ta ku kwahela ka lizoho la ka, mane ni be ni ku fitelele. 23Kiha ni ta zwisa lizoho la ka, mi u ta ni bona kwamulaho, isiñi kwa pata ya ka.”

Currently Selected:

Mututo 33: Lozi09

Highlight

Copy

Compare