Mututo 30

Katala ka insense

(Mut 37.25-28)

1“U ta eza katala fo ku ta cisezwa insense. U ka eze ka likota za akeshya. 2Ka likane mwa butelele ni mwa bukuswani, ili licika la lipeka kafa ni kafa, mi ku ya mwahalimu ka likane ni lipeka li li liñwi. Manaka a kona a be nto i liñwi ni kona. 3U ka kwahele fahalimu mwa maneku a kona a mane kaufela ni manaka a kona cwalo ka gauda ye nde, mi u ka potolose ka lutingo lwa gauda. 4U ka ezeze miswalelo ye mibeli ya gauda ya ku ka lwalisa, mi u i beye kwatas'a lutingo, mwa maneku a mibeli. Ki yona ye ka swala mitiyo ya ku ka lwalisa. 5U eze mitiyo yeo fa kota ya akeshya, mi u i apese ka gauda. 6Katala kao u ka beye fapil'a lisila le li lepelela fapil'a likwati le li na ni matapa a kupuzo, le li kwahezwi ka sikwahelo sa lona. Se ki sona sibaka ko ni ta kopanelanga ni wena. 7Aruni u ka na cisezanga fateñi insense ye na ni muunko o munde, ka zazi ni zazi kakusasa, h'a t'o lukisa lilampi. 8U swanezi ku i cisa hape h'a t'o tumbula lilampi ka swalala. Mpo ye ya insense i swanezi ku zwelapili cwalo mwa masika kaufela ku si na se si ka i cinca. 9U si ke wa ciseza fateñi insense ye hanisizwe, kamba sitabelo sa folofolo ye ka ciswa, kamba mpo ya lico, mi u si ke wa sululela ku yona mpo ya ze nwiwa. 10Aruni u ka ezezanga sebelezo ya tifo ni swalelo ya libi fa manaka a kona hañwi ka silimo ni silimo. Hañwi ka silimo, ka mali a folofolo ye tabiwa bakeñisa sibi ni swalelo, u ta peta kutisano ya sicaba ni Mulimu wa sona. Ku eziwange cwalo ni mwa masika a taha. I ta ba katala ka ka kenile ka ku fitisisa ka ka sumekezwi Muñ'a Bupulo.”

Mutelo wa Tempele

11Muñ'a Bupilo a li ku Mushe, 12“Ha u ta bala batu ba sicaba sa Isilaele, mutu ni mutu u ta lifela Muñ'a Bupilo tifo ya bupilo bwa hae, kuli ba si ke ba tahelwa ki kozi ha ku nze ku sa baliwa batu. 13#Mut 38.25-26; Mat 17.24 Mutu ni mutu ya baliwa u swanezi ku lifa tifo ye batahala, ye likanyizwe ka tikanyo ya sikala sa Tempele. Mutu ni mutu u swanezi ku zwiseza Muñ'a Bupilo mpo yeo. 14Mutu ni mutu ya ta balwa mwa sipalo seo, i be munna ya na ni lilimo ze mashumi a mabeli kapa ku fita, u ta lifela Muñ'a Bupilo mali ao. 15Mufumi h'a na ku lifa mali a mañata kamba mubotana ku lifa a manyinyani ku fita se si tomilwe, ha mu t'o lifela Muñ'a Bupilo tifo ya bupilo bwa mina. 16U ta amuhela mali ao kwa sicaba sa Isilaele, mi u ta a sebelisa kwa lisebelezo za mwa Tende ya Kopano. Ku ta hupulisa Muñ'a Bupilo sicaba sa Isilaele, mi i ta ba tifo ya bupilo bwa mina.”

Mukeke wa kopa wa ku tapela

17Muñ'a Bupilo a li ku Mushe, 18#Mut 38.8 “U ta eza mukeke wa kopa wa ku tapela, ni lilaho la teñi li be la kopa. U u beye mwahal'a Tende ya Kopano ni katala mi u sele mezi mwateñi. 19Mezi ao a ta sebeliswa ki Aruni ni bana ba hae ku tapa kwa mazoho ni kwa mahutu. 20Ha ba ya mwa Tende ya Kopano, kamba ku sutelela kwa katala, ku t'o eza musebezi wa bona wa buprisita, ili ku t'o fa Muñ'a Bupilo mpo ye ciswa ka mulilo, ha ba na ku bulaiwa haiba ba tapile ka mezi ao. 21Ba swanezi ku tapa kwa mazoho ni mahutu, kuli ba si ke ba shwa. Wo ki mulao o ba swanezi ku tokomela, bona ni bana ba bana ba bona kuya kuile.”

Mafula a ku toza ni insense

22 # Mut 37.29 Muñ'a Bupilo a li ku Mushe, 23“U nge miinko ye nunka hande hahulu, ya bukiti bwa likilo ze lishumi za mira ya mezi, ze ketalizoho za sinamone ye nunka hande, ze ketalizoho za likota ze nunka hande. 24U nge hape likilo ze lishumi za kasiya. Kamukana zona li likanyizwe ka tikanyo ya sikala sa Tempele. U nga ni likomoki ze tuna ze ketalizoho za mafula a olive. 25Ka zona ze, u eze mafula a kenile a ku toza, sina mafula a ezwa ki mutu wa sikwala. I be mafula a kenisizwe. 26Ka ona, u toze Tende ya Kopano, ni likwati la matapa a kupuzo. 27U toze tafule ni ze ku yona kamukana, sipahekelo sa lilampi ni ze ku sona kaufela, ni katala fo ku cisezwa insense. 28U toze ni katala fo ku cisezwa litabelo ni lisebeliso za kona kamukana, mukeke wa ku tapela ni lilaho la ona cwalo. 29Ka mukwaocwalo u ta be u kenisize lika ze, mi li ta ba ze kenile ka ku fitisisa. Se si ta li ngunyuta kaufela si ta ba se si kenile. 30Ki hona u ta toza Aruni ni bana ba hae, mi u ta ba sumekela sebelezo ya ka ya buprisita. 31U ta bulelela sicaba sa Isilaele, u li, ‘Mafula ao a kenile, a ku toza, i ta ba a kenile cwalo, kuya kuile, ku mina ni kwa masika a mina kamukana. 32A si ke a toziwa mutu feela, mi mu si ke mwa zwaka ka mukwa o swana ku eza mafula a bata ku swana ni ona. A kenile, mi mu swanezi ku a nga kuli a kenile. 33Mutu ufi ni ufi ya ka eza mafula a swana ni ona, kamba ku a sebelisa ku mutu ya si muprisita, u ta kauhanywa kwa banabahabo.’ ”

34Muñ'a Bupilo a li ku Mushe, “U nge tikanyo ye swana kwa miinko ye minde ye, ili sitakati, liketa ze nunka hande, galabano, miinko ye miñwi ye minde, ni libano le linde. 35Ka zona, u eze insense ye swana ni y'a ka eza mutu wa sikwala. I lungiwe ka lizwai, mi i be nto ye nde, ye kenile. 36U sile kalulo ye ñwi ya yona ku eza bupi bo bu nekile hande, mi u i sebelise fapil'a likwati le li na ni matapa a kupuzo, mwa Tende ya Kopano, mwa sibaka mo ni ta kopanelanga ni wena. Insense yeo, mu i nge ku ba ye kenile ka fu fitisisa. 37Mu si ke mwa zwaka ka mukwa o swana ku ikezeza insense ya mina. Mu i nge kuli i kenile ku Mulena. 38Haiba mutu a ka ikezeza insense ye swana ni yona, mi a i sebelisa sina sende, u ta kauhanyiwa kwa banabahabo.”

Currently Selected:

Mututo 30: Lozi09

Highlight

Copy

Compare