Mututo 29

Aruni ni bana ba hae ba sumekelwa sebelezo ya Muñ'a Bupilo

(Malivi 8.1-36)

1“S'o ka eza ku kenisa Aruni ni bana ba hae kuli ba ni sebeleze mwa sebelezo ya buprisita ki se. U nge nkomwana ya poho ni lipoho za lingu ze peli, ze si ka holofala. 2U nge ni lico ze si ka umelwa, linkwa ze lubilwe ka oli ze si ka umelwa, ni linkwa za sipapati ze si ka umelwa ze selilwe mafula. Linkwa zeo, li eziwe ka bupi bo bu nekile bwa buloto. 3U li beye mwa sizuma, mi u t'o ni fela zona mwa sizuma ha u tisa pohwana ni lipoho za lingu ze peli.

4“Kiha u ta tahisa Aruni ni bana ba hae kwa munyako wa Tende ya Kopano, ba tape. 5Cwale u nge liapalo, u apese Aruni hembe, ni siapalo se sitelele se si ya kwatas'a efoda, ni efoda ni lisila la fa sifuba, mi u mu tame lukanda. 6U mu apese tukwe kwa toho, mi fa tukwe u tame poniso ya ku itahisa ka ku kena. 7Cwale u nge mafula a ku mu tozisa, mi u mu toze ona kwa toho.

8“U tahise ni bana ba hae, mi u ba apese lihembe. 9U ba tame makanda mwa liteka, ni likepesi kwa litoho za bona. Ba ta ba baprisita ka taelo ya ka ya kamita. Ki ona mukwa o' ta beya Aruni ni bana ba hae fa musebezi wa buprisita.

10“U tise nkomwana ya poho fapil'a Tende ya Kopano. Aruni ni bana ba hae ba beye mazoho a bona fa toho ya yona. 11U bulaele poho hona fo fapil'a Muñ'a Bupilo, kwa munyako wa Tende ya Kopano. 12Cwale u nge mali a poho, mi u a sase ka munwana wa hao fa manaka a katala. Kihona u ta sulelela mali kamukana kwatas'a katala. 13Ku zwa fo, u nge muteto, sikoto sa lisuzo la kwa sibiti ni lipio ze peli ni lisuzo la zona. Zeo u li ciseze fa katala ka limpo. 14Kono u cise nama ya yona, litalo la yona ni za mwa mba kwand'a mafulo. Se, ki sona sitabelo se si zwisa sibi.

15“U nge ye ñwi ya lipoho za lingu, mi Aruni ni bana ba hae ba ta beya mazoho a bona fa toho ya yona. 16U i bulaye, u nge mali a yona, mi u a hase mwa maneku kaufela a katala. 17U pumake poho yeo lisuma-suma. U tapise mala ni mahutu a yona, mi u li beye fahalimw'a litunula ze ñwi ni toho ya yona. 18#Baef 5.2; Bafil 4.18 Kihona u ta cisa ngu yeo kamukana fa katala. Se, ki sona sitabelo se si cisezwa Muñ'a Bupilo. Ki mpo ye eziwa ka mulilo, ya muunko o tabisa Muñ'a Bupilo.

19“Hape u nge poho ya ngu ye siyezi. Ku yona Aruni ni bana ba hae ba ta beya mazoho a bona fa toho ya yona. 20U i bulaye, mi u nge mali a yona a mañwi. U a toze kwa ngo ya zebe ya Aruni ni bana ba hae kwa bulyo, ni fa minwana ye mituna ya kwa bulyo, ni fa minwana ye mituna ya kwa mahutu, ili kwa liutu la silyo. Ki hona u ta hasa mali mwa maneku kaufela a katala. 21U nge mali a mañwi a fa katala ni mafula a ku tozisa, mi u hase Aruni ni liapalo za hae, hamohocwalo ni bana ba hae ni liapalo za bona. Kamukwaocwalo, yena ni bana ba hae ni liapalo za bona ba ta sumekelwa sebelezo ya ka.

22“U nge lisuzo la poho ya ngu, lisuzo la kwa muhata, muteto, lisuzo la kwa sibiti, lipiyo ze peli ni lisuzo la zona, ni silupi sa bulyo, kakuli ye ki poho ye itusiswa kwa ku tahisa baprisita. 23Kwa linkwa ze si ka umelwa, mwa sizuma fapil'a Muñ'a Bupilo, u nge sinkwa si li siñwi ili se si lubilwe ka mafula, ni sinkwa si li siñwi sa sipapati. 24U beye lico zeo kamukana mwa mazoho a Aruni ni a bana ba hae, mi li tahiswe sina limpo ka ku nanulelwa Muñ'a Bupilo. 25Cwale u nge lico zeo, u li ciseze fa katala fahalimw'a limpo ze cisizwe, ku tahiseza Muñ'a Bupilo muunko o tabisa. Ki mpo ye ezezwa Muñ'a Bupilo ka mulilo.

26“U nge sifuba sa poho ya ngu ye itusisizwe kwa ku beya Aruni mwa musebezi wa buprisita, mi u si tahise ka ku si nanulela mwahalimu sina sitabelo ku Muñ'a Bupilo. Ye ki yona kabelo ya hao ku yona folofolo yeo.

27“Kwa poho yeo ye itusisizwe kwa ku beya Aruni ni bana ba hae mwa musebezi wa buprisita, u tahise sifuba ka ku si nanulela mwahalimu sina sitabelo hamohocwalo ni silupi se si beezwi baprisita. 28Ka taelo ya ka ye si na ku fela, lilama zeo li ta ba za Aruni ni bana ba hae, ili mpo ye zwa kwa sicaba sa Isilaele. Ki silama se si ketezwi baprisita seo ba sicaba sa Isilaele ba si fananga kwa limpo za bona za buitumelo. Ki mpo ya bona ku Muñ'a Bupilo.

29“Liapalo ze kenile za Aruni li ta fiwa bana ba hae ha s'a shwile, kuli ba toziwe ni ku tiiswa ba nze ba li apezi. 30Mwan'a Aruni ya ka mu yola ku ba muprisita, u ta li apala mazazi a supile h'a ka ya mwa Tende ya Kopano ku y'o sebeza mwa Sibaka se si Kenile.

31“Hape u ta nga poho ya ngu ye itusiswa ha ku tiiswa baprisita, mi u ta i apehela mwa sibaka se si kutekeha. 32Aruni ni bana ba hae ba ka cela nama yeo ni linkwa ze mwa sizuma kwa munyako wa Tende ya Kopano. 33Ba ta ca ze sebelisizwe ku ba tiseza swalelo ha ne ba tiiswa ni ku keniswa. Ki baprisita feela ba ba lukela ku ca lico zeo, kakuli li kenile. 34Haiba nama ye ñwi, kamba linkwa li si ka ciwa i sa li kakusasa, li swanezi ku ciswa. Ha li sa na ku ciwa, kakuli li kenile.

35“U eze Aruni ni bana ba hae ka mo ni ku laelezi. Mukiti wa ku ba beya mwa musebezi wa buprisita u ta nga mazazi a supile. 36Ka zazi ni zazi u tise poho kuli i be sitabelo sa libi, sa swalelo ya libi. Ha u eza sitabelo sa swalelo, u zwisa sibi fa katala. Cwale u toze katala ka oli, mi u ka sumekele Muñ'a Bupilo. 37U ka ezeza katala litabelo za swalelo ka mazazi a supile, mi u ka sumekele Muñ'a Bupilo. Mi cwale katala ka ta be ka kenile ka ku fitisisa, mi se si ta ka ngunyuta kaufela si ta kena.

Litabelo za zazi ni zazi

(Lipa 28.1-8)

38“Ao, ki ona litabelo ze u ta ni ezeza fa katala. Ka zazi ni zazi, kuya kuile, u swanezi ku taba lingunyana ze peli za silimo si li siñwi. 39U swanezi ku taba ngu ye ñwi kakusasa ni ye ñwi ka swalala. 40Hamoho ni ngu ya pili, u swanezi ku tisa likomoki ze ne za bupi bo bu nekile bwa buloto bo bu lubilwe ka mafula a mande a likana likomoki ze talu ze nyinyani. Hape, u swanezi ku sela likomoki ze talu ze nyinyani za waine, ili mpo ya ze nwiwa. 41U lukela ku taba ngu ya bubeli ka swalala ni ku i tahisa ka mukwa o swana ni wa kakusasa, hamoho ni mpo ya lico ni ya ze nwiwa, ku eza muunko o tabisa, ili mpo ye ezezwa Muñ'a Bupilo ka mulilo. 42Mpo ye, ye ciswa, i swanezi ku eziwa ki masika kamukana kwa munyako wa Tende ya Kopano fapil'a ka, na, Muñ'a Bupilo, kuya kuile. Ki fona fo ni ta kopanelanga ni batu ba ka ni ku bulela ni wena. 43Ni ta kopana ni sicaba sa Isilaele hona moo, mi sibaka seo si ta eziwa se si kenile ka maata ni butuna bwa ka. 44Ni ta kenisa Tende ya Kopano, hamoho ni katala cwalo, mi ni ta tahisa Aruni ni bana ba hae ku ba baprisita ba ka. 45Ni ta pila mwahal'a sicaba sa Isilaele, mi ni ta ba Mulimu wa sona. 46Ba ta ziba kuli ki na Muñ'a Bupilo, Mulimu wa bona, ya ba zwisize mwa Egepita ku t'o pila mwahal'a bona. Ki na Muñ'a Bupilo, Mulimu wa bona.

Currently Selected:

Mututo 29: Lozi09

Highlight

Copy

Compare