Mututo 28

Liapalo za baprisita

(Mut 39.1-7)

1“Mwa sicaba sa Isilaele ku ketwe muhulwan'a hao Aruni ni bana ba hae, ili bo Nadabi, Abihu, Eliazare ni Itamare. Ba tiswe ku wena ku t'o ba baprisita ba ka. 2U ezeze Aruni, muhulwan'a hao, liapalo ze kenile, kuli a kutekehe, mi a swanelwe. 3U laele likwala kaufela be ni file butali, kuli ba ezeze Aruni liapalo ze ta mu kenisa h'a ni ezeza musebezi wa baprisita. 4Liapalo ze ba ta eza ki ze, ili siapalo sa fa sifuba, efoda, siapalo se sitelele, hembe ye kabisizwe ka bukwala, tukwe ni lukanda. Ba ezeze muhulwan'a hao Aruni, ni bana ba hae cwalo, liapalo ze kenile, kuli ba ni sebeleze ba li baprisita. 5Likwala ba sebelise gauda, ni lisila le li ezizwe ka bwanda bwa boya bwa ngu bo butala, bo bupuzwa ni bo bufubelu, mi ba sebelise ni lisila la line ye nde.

Efoda

6“Ba eze efoda ya gauda ni ya lisila le li ezizwe ka boya bwa ngu bo butala, bo bupuzwa ni bo bufubelu ni ka lisila la line ye nde, ili lisila le li kabisizwe ka bukwala. 7Efoda yeo i be ni tusila to tubeli fa maheta, kafa ni kafa, fo i ta kopanyezwa. 8Ni lukanda lo lunde lo lu lukilwe lu kopanywe ku yona ku eza nto i liñwi, i be mulukelo o swana, o ezizwe ka gauda ni lisila la boya bwa ngu la mibala ye mitala, ye mipuzwa ni ye mifubelu ni lisila la bwanda bo bu otilwe bwa line ye nde. 9U nge macwe a mabeli a butokwa mi u cakule fateñi mabizo a bana ba Isilaele. 10U cakule mabizo a silezi fa licwe le liñwi, ni a silezi a siyezi ku la bubeli, ka mo ba tatamanela. 11Ka bukwala bwa mubeti wa macwe, ni bwa mucakuli wa maswayo, u cakule fa macwe a mabeli ao mabizo a bana ba Isilaele, mi u beye macwe ao mwa tukwati twa gauda. 12U tu beye fa tusila to tu fa maheta a efoda, i be kupuzo ya bana ba Isilaele. Kamukwaocwalo, Aruni u ta lwala mabizo a bona fa maheta a hae, kuli Muñ'a Bupilo a ba hupule. 13U ta eza hape tukwati to tubeli twa gauda. 14U ta eza ni mawenge a gauda a mabeli a bondilwe sina muhala, o' ta nguneka kwa tukwati to.

Poniso ya Katulo

(Mut 39.8-21)

15“U ta eza fa sifuba Poniso ya Katulo. I ta kabiswa hande, sina musebezi wa fa efoda. I eziwa ka gauda ni lisila la boya bwa ngu le li tala, le li puzwa ni le lifubelu, ni ka lisila la bwanda bwa line ye nde ye otilwe. 16I likanelele mwa butelele ni mwa bukuswani, mi i tatahanyiwe habeli ku eza butelele bwa singandi kafa ni kafa. 17U beye fateñi macwe ka mibamba ye mine. Mwa mubamba wa pili, u beye licwe la rubi, la topazo ni la kalabunkele. 18Mwa mubamba wa bubeli, i be licwe la emeralda, la safiro ni la daimani. 19Mwa mubamba wa bulalu, i be la yasinto, la agata ni la ametisto. 20Mwa mubamba wa bune, i be la berilo, la onikisi ni la jaspe. Ao a kweswe fahalimw'a tukwati twa gauda. 21Ku be ni macwe a lishumi ka a mabeli fo ku ta cakulwa mabizo a bana ba Isilaele. A ta cakulwa inge maswayo, le liñwi ni le liñwi li be ni libizo la lo luñwi lwa masika a lishumi ka a mabeli. 22U eze liñetwani za gauda luli, ze bondilwe sina mihala, za ku beya fa Poniso ya Katulo. 23Hape u beye maseka a mabeli a gauda, mi u a tame kwahalimu a lisila la fa sifuba kafa ni kafa. 24U tame liñetwani za gauda ze peli kwa maseka ao. 25U tamelele mafelelezo a liñetwani zeo kwa tukwati, mi ka mukwa wo, u a kopanyeze fapil'a tusila twa fa maheta a efoda. 26Cwale u eze hape maseka a mabeli a gauda, mi u a tame kwatas'a lisila la fa sifuba, kafa ni kafa mwahali, kwatuko a efoda. 27U eze hape maseka a mabeli a gauda, mi u a tame fapili, kwatas'a tusila twa fa maheta a efoda, fakaufi ni muluko, ili fahalimw'a lukanda lo lu lukilwe ka bukwala. 28Maseka a fa lisila la fa sifuba a ka tamiwa kwa maseka a efoda ka muhala o mutala, kuli lisila la fa sifuba li fite fahalimw'a lukanda li si ke la comoha.

29“Cwalo, Aruni h'a ta kena mwa Sibaka se si Kenile, u ka lwala mabizo a bana ba Isilaele fa lisila la Poniso ya Katulo, fa sifuba sa hae, kuli ka nako kaufela Muñ'a Bupilo a ba hupule. 30#Lipa 27.21; Mul 33.8; Ezra 2.63; Neh 7.65 Mwa Poniso ya Katulo ya fa sifuba u beye Urimi ni Tumimi kuli li be fa sifuba sa Aruni h'a ya fapil'a Muñ'a Bupilo. H'a li fapil'a Muñ'a Bupilo, kamita u ta na lwala cwalo fa sifuba sa hae ze ka tusa ku bonisa sicaba sa Isilaele tato ya Muñ'a Bupilo.

Liapalo ze ñwi

(Mut 39.22-31)

31“U ta eza siapalo se sitelele sa kwatas'a efoda ka lisila le litala la boya bwa ngu. 32Fahal'a sona, si be ni mulala mo ku zwela toho. Mulala wo u ta beiwa lisila le li lukilwe, le li u potoloha, sina wa siapalo sa litalo, kuli si si ke sa pazuha. 33#Litu 45.9 Kwa mungundo wa sona u ta si potolosa ka manjobo a swana sina likobe, ili a matala, a mapuzwa ni a mafubelu a ezizwe ka boya bwa ngu, mi hape u ta beya tulangu twa gauda mwahal'a ona. 34Kamukwaocwalo, ku ta ba ni mubamba wa tulangu twa gauda ni manjobo o' si potolohile kwatas'a mungundo. 35Aruni u ta si apala h'a eza musebezi wa hae wa buprisita. H'a ka ya mwa Sibaka se si Kenile, fapil'a Muñ'a Bupilo, kamba h'a ka zwa ku sona, tulangu tu ta utwahala ha tu lila, mi cwalo h'a na ku bulaiwa.

36“U ta eza kabiso ya gauda ye nde mi u ta falaula fateñi manzwi a li, ‘Ku sumekezwi Muñ'a Bupilo’. 37U i tamelele fapil'a tukwe ka muhala o mutala. 38Aruni u ka i apalanga fa pata ya hae, mi ka mukwa wo u ka lwala bumaswe kamukana bo bu ka be bu ezizwe ki sicaba sa Isilaele ha si fa Muñ'a Bupilo limpo za sona. Aruni u ka na a i apalanga fa pata ya hae kamita, kuli Muñ'a Bupilo a te a tabele limpo.

39“U ta luka hembe fa lisila le linde la line, mi u ta eza tukwe ni lukanda fa lisila le li swana le li kabisizwe ka bukwala.

40“Haili bana ba Aruni u ba ezeze lihembe, makanda, ni likepesi kuli ba kutekehe, ba be ba bande. 41U ta apesa muhulwan'a hao Aruni ni bana ba hae liapalo zeo. Kiha u ta ba toza mafula, mi u ta ba beya mazoho, ba ni sebeleze kuli ba be baprisita. 42U ba ezeze tuputula, to tu zwa mwa teka ku t'o yema mwa lilupi, kuli ba si ke ba ba njenje. 43Aruni ni bana ba hae ba ka na ba li apala nako kaufela ha ba kena mwa Tende ya Kopano, kamba ha ba sutelela kwa katala ku t'o eza musebezi wa buprisita mwa Sibaka se si Kenile, kuli ba si ke ba ba mapunu, mi ba bulaiwe. Wo ki mulao wa kuya kuile ku Aruni ni bana ba baikulu ba hae.

Currently Selected:

Mututo 28: Lozi09

Highlight

Copy

Compare