Mututo 27

Katala

(Mut 38.1-7)

1“U ta eza katala ka kota ya akeshya. Ka swanezi ku likana mwa butelele ni mwa bupala. I be mapeka a mabeli mwa butelele ni mwa bupala. Ku ya mwahalimu i be lipeka ni licika. 2U eze mishengela mwa malulu a kona a mane. I be nto i liñwi ni katala. Kaufel'a kona ka apeswe ka kopa. 3U eze ni mikeke ya ku olelisa mulola, ni mafocolo, ni lipiza, ni lipahekiso ni mañetana a mulilo. Lisebeliso kaufela za katala li eziwe ka kopa. 4U ezeze katala lukwakwa ka mawaile a indilwe a kopa. Mwa maneku a mane a lona u beye miswalelo ya kopa ya ku lu lwalisa. 5U lu beye fakaufi ni katala, kuli lu cikimane katala. 6U ezeze katala mitiyo ya likota za akeshya, ya ku ka lwalisa, ye apesizwe ka kopa. 7I ta comekiwa mwa miswalelo yeo ye kwa matuko a katala, ha ka lwaliwa. 8Katala kao ka be ni sikisi mwahali, ili se si ezizwe ka mabala. U ka eze ka mukwa o n'o bonisizwe fa lilundu.

Lapa la Tabelenakele

(Mut 38.9-20)

9“U ezeze Tabelenakele lapa. Kwa neku la mboela, u eze masila a line ye otilwe, ili masila a eza mapeka a mashumi a ketalizoho neku li li liñwi. 10A swelwi ki mitiyo ye mashumi a mabeli ya kopa, ili mitiyo ye ka tomwa mwa matomelo a mashumi a mabeli a ezizwe ka kopa, ni liñomeliso kwa mitiyo ni litupa za yona za silivela. 11Kamukwaoswana, kwa mutulo, ku be ni masila a eza mapeka a mashumi a ketalizoho mwa butelele, a swelwi ki mitiyo ye mashumi a mabeli ya kopa ye tomilwe mwa matomelo a mashumi a mabeli a kopa, ni liñomeliso kwa mitiyo ni litupa za yona za silivela. 12Kwa neku la wiko, ku be ni masila a eza mapeka a mashumi a mabeli ni a ketalizoho mwa butelele, a swelwi ki mitiyo ye lishumi ye tomilwe mwa matomelo a lishumi. 13Kwa neku la upa, ko ku na ni munyako, lapa li be la mapeka a mashumi a mabeli ni a ketalizoho hape. 14Neku le liñwi la munyako ku be ni lisila le li eza mapeka a supile ni licika le li swelwi ki mitiyo ye milalu ye tomilwe mwa matomelo a malalu. 15Kwa neku le liñwi ni kona ku be ni lisila la mapeka a supile ni licika ni mitiyo ye milalu ni matomelo a malalu. 16Haili fa munyako kasibili, ku be ni lisila la mapeka a lishumi, le li ezizwe ka bwanda bwa boya bwa ngu bo butala, bo bupuzwa ni bo bufubelu ni ka line ye nde ye otilwe. Hape i be lisila le li kabisizwe ka bukwala. Lona li swaliswe ka mitiyo ye mine ye tomilwe mwa matomelo a mane hape. 17Misumo kaufela ye potolohile lapa, i ta ngunganyiwa ka litupa za silivela. Liñomeliso za mitiyo li ta ba za silivela, ni matomelo a yona a kopa. 18Butelele bwa lapa i ta ba bwa mapeka a mashumi a ketalizoho ni bupala bwa mapeka a mashumi a mabeli ni a ketalizoho. Butelele bwa ku ya mwahalimu bona bu be bwa mapeka a mabeli ni licika. Masila a teñi a ezwe ka line ye nde, ye otilwe. Matomelo, ona, i be a kopa. 19Lisebeliso kamukana ze ka sebeliswa mwa Tabelenakele, ni mwahal'a lisebelezo, ni limapo za Tabelenakele kaufela ni za lapa li eziwe ka kopa.

Pabalelo ya lampi

(Malivi 24.1-4)

20“U bulelele batu ba Isilaele kamukana ba ku tiseze mafula a olive a mande a kenile a ku tumbulisa lampi, kuli i ne i nze i tuka. 21Aruni ni bana ba hae ki bona ba ba ka beya lampi ye mwa tende, mw'a ta kopanelanga Mulimu ni batu ba hae, kwand'a lisila, fapil'a matapa. Honafo, fapil'a Mulimu, i ta tuka ku zwa manzibwana ku fitela kakusasa. Taelo ye i swanezi ku bulukiwa ki Maisilaele ni lusika lwa bona kuya kuile.”

Currently Selected:

Mututo 27: Lozi09

Highlight

Copy

Compare