Mututo 21

Pabalelo ya batanga

(Mul 15.12-18)

1“Milao y'o ka fa Maisilaele ki ye. 2#Malivi 25.39-46 Ha u leka mutanga wa Muheberu, u ta sebeza lilimo ze silezi. Ka silimo sa busupa u ta lukululwa a sa lifi se siñwi. 3Haiba u tile a li likwasha, a kute a li likwasha cwalo. Kono haiba u tile a nyezi, u ta zamaya ni musal'a hae. 4Haiba muñ'a hae u mu file musali, mi a pepa ni yena bashimani kamba basizana, musali yo ni bana ba hae ki ba muñ'a hae. Ku ta lukuluha munna feela. 5Kono mutanga a ka swana a alaba, a li, ‘Ni lata muñ'a ka, musal'a ka ni bana ba ka. Ha ni lati ku lukuluha.’ 6Fohe, muñ'a hae u ta mu tisa ku Mulimu, a mu tise kwa munyako kamba kwa mitiyo ya kwa munyako, mi a mu punye lisuba kwa zebe ka limao. Cwale i ta ba mutang'a hae ku isa lifu.

7“Mutu h'a ka lekisa mwan'a hae wa musizana ku y'o ba mutanga, h'a na ku lukuluha, sina batanga ba banna. 8Haiba a sa tabisi muñ'a hae, ya n'a hupula ku mu eza yo muñwi wa basali ba hae, a ka na a lumela kuli bahabo ba mu lukulule ka tifo. H'a na ku ba ni tukelo ya ku mu lekisa kwa bazwahule kakuli fo i ta ba ku mu foseza. 9Haiba a lela ku mu fa mwan'a hae wa mushimani, u lukela ku mu eza sina mwan'a hae wa musizana. 10Haiba a nyala musali yo muñwi hape, u swanezi ku zwelapili mwa ku fa musali wa pili lico ni liapalo ze likani, hamohocwalo ni litukelo za musali yo muhulu. 11H'a sa mu fi litukelo za hae zeo, u lukela ku mu lukulula, kono ku si na mali a' ka amuhela.

Milao ka za ku nata ni ku holofaza

12 # Malivi 24.17 “Mutu kaufela ya ka nata yo muñwi mi a mu bulaya, ni yena u ta bulaiwa. 13#Lipa 35.10-34; Mul 19.1-13; Josh 20.1-9 Kono haiba pulao i tahile ka kozi, mutu a sa leli ku bulaya, yo a ka na a sabela mwa sibaka se ni ta mi lukiseza. 14Kono haiba mutu a nyema, mi a lela ni ku bulaya yo muñwi ka mabomu, niha mu ka mu zwisa kwa katala ka ka kuli a y'o bulaiwa, ku lukile.

15“Mutu kaufela ya nata ndat'ahe kamba m'ahe u ta bulaiwa.

16 # Mul 24.7 “Ya ka eza ka tata ku uzwa mutu yo muñwi, i ka ba ka muhupulo wa ku mu lekisa kamba ku mu luwa feela, u ta bulaiwa.

17 # Malivi 20.9; Mat 15.4; Mar 7.10 “Ya tapaula ndat'ahe kamba m'ahe u ta bulaiwa.

18“Mwendi batu ba ka lwana, mi yo muñwi a nata yo muñwi ka licwe kamba ka ñondo, kono a sa mu bulayi. H'a na ku fiwa mulatu, haiba ya natilwe a y'o kula feela, 19mi mwamulaho a kona ku zuha ni ku zamaya-zamaya fande, nihaikaba ka ku sebelisa lutaa. Ya mu natile u ta mu lifela bakeñisa ku mu sinyeza nako, mi u ta mu babalela ku fitela a fola.

20“Mutu h'a ka nata mutang'a hae, wa munna kamba wa musali, ka mulamu, mi mutanga yo a shwa hona fo, u ta fiwa mulatu. 21Kono haiba mutanga a ka pila lizazi mutumbi kamba mazazi a mabeli, muñ'a hae h'a na ku fiwa mulatu. Mutanga ki liluwo la hae.

22“Banna ha ba lwana, mi ba holofaza musali ya itwezi kuli mane a sinyehelwe ki mulwalo wa hae, nih'a ka pila yena mutu yo ya mu holofalize u ta lifiswa ka mw'a ta batela kaufela muñ'a musali, mi u ta lifa ka mo ba ta lelela baatuli. 23Kono h'a ka shwa, fohe u ta lifiswa bupilo ka bupilo, 24#Malivi 24.19-20; Mul 19.21; Mat 5.38 mi ni liito ka liito, liino ka liino, lizoho ka lizoho, lihutu ka lihutu, 25sitombo sa mulilo ka sitombo sa mulilo, liñiba ka liñiba, muupa ka muupa.

26“Mutu h'a ka nata mutang'a hae wa munna kamba wa musali fa liito, mi a li punya, u ta lukulula mutanga yo, i be tifo ya liito la hae. 27Haiba a mu loba liino, ni teñi u ta mu lukulula, i be tifo ya liino la hae.

Buikalabelo bwa bañi ba lika

28“Komu ha i ka bulaya munna kamba musali ka ku mu taba ka manaka, i ta pobaulwa ka macwe, mi nama ya yona ha i na ku ciwa. Kono muñ'a yona h'a na ku beiwa mulatu. 29Kono haiba komu ne i se i na ni mukwa wa ku pumba, mi muñ'a yona n'a s'a zibisizwe, kono a i tuhela i sa kwalelwi mwa mulaka, ha i ka bulaya munna kamba musali, i ta pobaulwa ka macwe, mi ni yena muñ'a yona u ta bulaiwa. 30Nihakulicwalo, haiba ku ka tomwa tifo ya ku mu pilisa, u ta lifelela tifo ye tomilwe kuli a ipilise. 31Haiba komu i bulaya mushimani kamba musizana, ku sa itusiswa ona mulao wo. 32Haiba komu i bulaya mutanga wa munna kamba wa musali, muñ'a komu u swanezi ku lifela muñ'a mutanga muwaya-waya wa mali a silivela a eza mashumi a malalu. Haili komu yona i pobaulwe ka macwe.

33“Mwendi mutu a ka siya musima u nz'o atami, kamba h'a sin'o yepa, a u tuhela a sa u seleli, mi kwa t'o wela mwateñi komu kamba mbongolo. 34U swanezi ku lifa simunanu seo, mi mali ao u ta a fa muñ'a yona. Haili folofolo ye shwile, yona, i ta ba ya hae. 35Komu ya mutu ha i ka bulaya komu ya yo muñwi, batu ba babeli bao ba ta lekisa komu ye pila, mi ba ta ikabela mali. Ba ikabele cwalo ni nama ya ye shwile. 36Kono haiba ne ku zibahala kuli komu ne i pumba, mi muñ'a yona h'a si ka i kwalela mwa mulaka, u swanezi ku lifa. A life komu ye pila bakeñisa ye shwile, mi ye shwile yeo i be ya hae.

Currently Selected:

Mututo 21: Lozi09

Highlight

Copy

Compare