Mututo 20

Milao ye Lishumi

(Mul 5.1-21)

1Mulimu a bulela manzwi a kaufela, a li, 2“Ki na Muñ'a Bupilo, Mulimu wa hao, ya ku zwisize mwa naha ya Egepita, mwa ndu ya butanga.

3“U si ke wa ba ni milimu i sili. U sebeleze na feela.

4 # Mut 34.17; Malivi 19.4; 26.1; Mul 4.15-18; 27.15 “U si ke wa ikezeza siswaniso se si betilwe kamba siswaniso sifi ni sifi sa libupiwa ze kwahalimu, kamba ze fafasi, kamba ze mwa mezi kwatas'a lifasi. 5#Mut 34.6-7; Lipa 14.18; Mul 7.9-10 U si ke wa kubamela siswaniso sifi ni sifi kamba ku si lapela, kakuli na, Muñ'a Bupilo, ni Mulimu wa hao, mi ni Mulimu ya na ni lifufa. Ba ba ni toya, ni nata bana ba bona mane ku y'o fita kwa lusika lwa bulalu kamba lwa bune. 6Kono ba ba ni lata, mi ba buluka milao ya ka, ni ba bonisa lilato la ka ka nako ni nako, mane ku be ku y'o fita kwa masika a eza likiti.

7 # Malivi 19.12 “U si ke wa sebelisa libizo la Muñ'a Bupilo Mulimu wa hao ka mafosisa, kakuli ni ta fa mulatu mañi ni mañi ya bapalisa libizo la ka.

8 # Mut 16.23-30; 31.12-14 “U hupule Lizazi la Pumulo, mi u li bulukele Muñ'a Bupilo. 9#Mut 23.12; 31.15; 34.21; 35.2; Malivi 23.3 U ta eza misebezi ya hao kamukana mwa mazazi a silezi. 10Kono lizazi la busupa ki lizazi la pumulo, le li bulukezwi Muñ'a Bupilo, Mulimu wa hao. U si ke wa sebeza ka lona lizazi leo, i ka ba wena, kamba bana ba hao, kamba batanga ba hao kamba limunanu za hao, nihaili muzwahule ya yahile ni wena. 11#Sim 2.1-3; Mut 31.17 Muñ'a Bupilo u ezize lihalimu, lifasi, mawate ni ze ku zona kamukana mwa mazazi a silezi, kono ka la busupa a pumula. Ki lona libaka Muñ'a Bupilo h'a fuyauzi Lizazi la Pumulo, mi a li eza la hae.

12 # Mul 27.16; Mat 15.4; 19.19; Mar 7.10; 10.19; Luk 18.20; Baef 6.2,3 “Kuteka ndat'aho mi m'aho, kuli u pile nako ye telele mwa naha y'a ku file Muñ'a Bupilo, Mulimu wa hao.

13 # Sim 9.6; Malivi 24.17; Mat 5.21; 19.18; Mar 10.19; Luk 18.20; Baro 13.9; Jak 2.11 “U si ke wa bulaya mutu.

14 # Malivi 20.10; Mat 5.27; 19.18; Mar 10.19; Luk 18.20; Baro 13.9; Jak 2.11 “U si ke wa buka.

15 # Malivi 19.11; Mat 19.18; Mar 10.19; Luk 18.20; Baro 13.9 “U si ke wa uzwa.

16 # Mut 23.1; Mat 19.18; Mar 10.19; Luk 18.20 “U si ke wa tameleza mutu za buhata.

17 # Baro 7.7; 13.9 “U si ke wa lakaza ndu ya yo muñwi. U si ke wa lakaza musal'a hae, kamba batanga ba hae, kamba pulu ya hae, kamba mbongolo ya hae, kamba sifi ni sifi s'a na ni sona.”

Sabo ya batu

(Mul 5.22-33)

18 # Maheb 12.18-19 Batu ha ba utwa mushika ni mulumo wa tolombita, mi ba bona lumonyi ni musi fa lilundu, ba njanjiswa ki sabo, mi ba y'o yema kwahule. 19Ba li ku Mushe, “Wena u bulele ni luna, mi lu ta utwa. Kono haiba Mulimu a bulela ni luna, lu ta shwa.”

20Mushe a li kwa sicaba, “Mu si ke mwa saba. Mulimu u til'o mi lika feela, kuli mu mu sabange, mi mu si ke mwa fosa.” 21Kono batu ba zwelapili ku yemela kwahule. Mushe, ki yena feela ya n'a tile fakaufi ni lilu le linsu mw'a n'a inzi Mulimu.

Milao ka tutala

22Muñ'a Bupilo a li ku Mushe, “S'o swanezi ku bulelela Maisilaele ki se, u li, ‘Mu se mu boni ha ni bulela ni mina ni li kwa lihalimu! 23Mu si ke mwa ikezeza milimu ya silivela kamba ya gauda ni ku i lapela sina mo mu ni lapelela. 24U ka ni ezeza katala ka mubu, mi u ta ezezanga ku kona litabelo za hao za ku cisa ni za buitumelo, ili lingu za hao ni likomu cwalo. Mwa libaka kamukana mo ni ta ku bulelela kuli u ni lapele, ni ka taha ni t'o ku fuyaula. 25#Mul 27.5-7; Josh 8.31 Haiba u ni yahela katala ka macwe u si ke wa ka yaha ka macwe a betilwe, kakuli ha u sebelisa sipumiso sa sipi ku kona ha ka sa na tuso ku na. 26U si ke wa yaha katala ka ka na ni lipahamelo, kuli mapunu a hao a si ke a bonahala fateñi.’

Currently Selected:

Mututo 20: Lozi09

Highlight

Copy

Compare