Estere 4
4
Morodekai u kupa tuso ku Estere
1Morodekai ha s'a utwile ze n'e ezizwe kaufela, a pazula liapalo za hae ka pilu ye butuku. Cwale a apala masaka, a toza toho ya hae ka mulola wa fa liiso, a zamaya-zamaya mwahal'a munzi a nz'a lila ka tata ni ka pilu ye butuku. 2Mane a t'o fita kwa munyako wa ndu ya bulena. H'a si ka kena kakuli ku kena mwahali ne ku tokwahala liapalo ze nde. 3Mwa manaha kamukana mo ne ku talusizwe mulao wa mulena, ne ku na ni sililo se situna mwahal'a Majuda. Ba itima lico, ba sikoka, ba bokolola, mi buñata bwa bona ba apala masaka, mi ba lobala mwa mulola.
4Basizana ba Estere ni likombwa za hae ha ba t'o mu bulelela z'a n'a eza Morodekai, a filikana hahulu. A lumela Morodekai liapalo kuli a li apale bakeñisa ku apala masaka, kono h'a si ka li amuhela. 5Cwale Estere a biza Hataki, yo muñwi wa likombwa za kwa lapa ya n'a ketilwe ki mulena ku ba mubeleki wa hae, mi a mu bulelela kuli a ye ku Morodekai a y'o buzisisa se ne si ezahala, ni kuli kikabakalañi. 6Hataki a ya ku Morodekai mwa patelo ya munzi kwa munyako o ya kwa ndu ya bulena. 7Morodekai a mu taluseza lika kaufela ze n'e ezahalile ku yena, ni f'a n'a kuma mali a n'a sepisize Hamani kuli u ta a beya mwa pulukelo ya bulena, haiba ku ta bulaiwa Majuda kamukana. 8Kih'a fa Hataki liñolo la mulao le ne li ñozwi hona mo mwa Shushani, ili le ne li laela pulao ya bona. Morodekai a mu kupa kuli a li ise ku Estere, ku y'o mu taluseza mo li inezi lika, ni kuli yena a y'o shemba-shemba mulena, ni ku y'o mu kupa kuli a shwele batu ba hae makeke. 9Hataki a eza cwalo. 10Mi Estere a mu kutiseza ku Morodekai ka manzwi a, a li, 11“Haiba mañi ni mañi, munna kamba musali, a ka ya mwa lapa le li mwahali ku y'o bona mulena a si ka bizwa, mutu yo u swanezi ku shwa. Wo, ki ona mulao. Mutu kaufela, ku kala ka baelezi ba mulena ku y'o feleleza ka batu ba mwa macaba, u ziba cwalo. Ha ku na mukwa wa ku potoloha mulao wo, konji mulena h'a ka nanula malumu wa hae wa gauda. Fohe, mutu yo h'a sa bulaiwa. Kono s'e li kweli mulena a sa ni bizi.”
12Morodekai n'a y'o utwa manzwi a Estere. 13Cwale a mu lumelela temuso ye, a li, “U si ke wa isepisa kuli wena u ta banduka kwa Majuda ba bañwi, kabakala kuli u inzi mwa ndu ya bulena. 14Haiba u kuza feela cwalo ka nako ye cwana, lihalimu li ta tusa Majuda ni ku ba pilisa, kono wena u ta shwa, mi mba ya ndat'aho i ta fela. Kono ya ziba ki mañi! Mwendi n'e li kabakala yona nako ye ha u ezizwe muoli!”
15Estere a lumelela kalabo ye ku Morodekai, a li, 16“Zamaya, u y'o kopanya Majuda kamukana ba ba mwa Shushani. Mu y'o itima lico, mi mu ni hupule. Mu si ke mwa y'o ca kamba ku nwa se siñwi ka mazazi a malalu, musihali ni bushihu. Basizana ba ka, hamoho ni na, lu ta eza cwalo. Zeo ha li se li felile, ni ta ya ku mulena, nihaike ki ku tula mulao. Haiba ni swanezi ku shwa ka ku eza cwalo, ni ta shwa.”
17Cwale Morodekai a nanuha, mi a y'o eza lika kaufela z'a n'a bulelezwi ki Estere.
Lozi Interconfessional Bible, Catholic Edition © Bible Society of Zambia, 2009.