Estere 3
3
Hamani u lela ku bulaya Majuda
1Mwamulaho a nako ye telelenyana, Mulena Asuerusi a hulisa mutu ya bizwa Hamani ku ba ngambela wa naha. Hamani yo n'a li mwan'a Hamedata, muikulu wa Agagi. 2Mulena a laela manduna ba ba mwa mubuso wa hae, kuli ba bonise likute la bona ku Hamani ka ku kubama ni ku mu kandelela. Kaufel'a bona ba eza cwalo haisi Morodekai ya n'a hanile ku eza cwalo. 3Manduna ba bañwi mwa mulonga ba mu buza se ne si mu hanisa ku peta taelo ya mulena. 4Ba bulela ni yena ka taba yeo ka zazi ni zazi, kono n'a sa ba teelezangi. Kih'a ba taluseza, a li, “Na, ni Mujuda, mi ha ni koni ku kandelela Hamani.” Cwale ba y'o bulelela Hamani taba yeo ba nze ba ipuza, ba li, “Kana Hamani a ka lumelela Morodekai ku eza cwalo?” 5Hamani a nyema hahulu ha s'a lemuhile kuli Morodekai u hana ku kubama ni ku mu kandelela. 6Cwale ha s'a zibile hape kuli Morodekai n'a li Mujuda, kiha s'a lela ku sa utwisa yena Morodekai feela butuku, kono ni bona Majuda kamukana ba ba mwa mubuso wa Peresia.
7Ka silimo sa bulishumi ka ze peli sa puso ya Mulena Asuerusi, mwa kweli ya pili, ili kweli ya Nisani, Hamani a laela kuli taula, ye n'e bizwa Puri, i laule ili kuli ku fumanwe hande lizazi ni kweli ya ku peta mulelo wa hae. Kwa tomwa kuli i be lizazi la bulishumi ka a malalu mwa kweli ya bulishumi ka ze peli ili yona kweli ya Adara.
8 #
But 2.14, 15 Cwale Hamani a y'o bulelela mulena, a li, “Ku na ni sitopa sa batu ba bañwi ba ba hasanezi mwa mubuso wa hao kaufela ili ba ba fumaneha mwa manaha kamukana. Ba latelela milao ye sa swani ni ya batu ba sili. Hape ha ba buluki milao ya mubuso, cwale ha ku lukeli ku ba tuhela cwalo ba nze ba iketile. 9Haiba ku ku tabisa, muñ'a ka, u tome mulao kuli ba bulaiwe. Ha u lumela, ni tiisa niti kuli ni ta kona ku beya mwa pulukelo ya bulena mali a muwaya-waya wa silivela a eza likilo ze likiti ze mianda ye milalu ka mashumi a supile ni ze ketalizoho a zamaiso ya mubuso.”
10Mulena a comola lisale kwa munwana wa hae, le ne li itusiswa kwa ku kanta taelo ya mubuso, mi a li fa sila sa Majuda, yena Hamani mwan'a Hamedata, muikulu wa Agagi. 11Mulena a mu bulelela, a li, “Batu ni mali a bona ki ba hao. U eze m'o latela ka bona.”
12Ka lizazi la bulishumi ka a malalu mwa kweli ya pili, Hamani a biza bañoli ba mulena, mi a t'o ba bulelela zibiso, kuli i taluswe ka lipuo kaufela ze n'e bulelwa mwa mubuso wa hae, mi i lumelwe kwa babusi, babusisi, ni manduna kaufela. Ya ñolwa ka libizo la Mulena Asuerusi, mane ya kantiwa ka lisale la hae. 13Balumiwa ba nga mañolo ao, mi b'a isa mwa manaha kamukana a mwa mubuso. Mañolo n'a talusa kuli ka lona lizazi li li liñwi leo, la bulishumi ka a malalu mwa kweli ya Adara, Majuda kamukana ili ba banca ni ba bahulu, basali ni banana, ba bulaiwe. Ba bulaiwa ku si na makeke, mi liluwo la bona li ngiwe. 14Ze n'e ñozwi mwa zibiso yeo, ne li na ni ku bulelwa patalaza mwa manaha kamukana, kuli yo muñwi ni yo muñwi a ine a nze a itukisize lizazi leo ha li fita.
15Ka taelo ya mulena, balumiwa ba funduka kapili, mi hape mulao wo wa huwelezwa mwa muleneñi wa Shushani. Mulena ni Hamani ba ina mi ba nwa, munzi wa Shushani, ona, u nz'o yemi maefe-efe.
Lozi Interconfessional Bible, Catholic Edition © Bible Society of Zambia, 2009.