Amosi 3
3
1Mina batu ba Isilaele, mu teeleze kwa manzwi a bulezi Muñ'a Bupilo ya Pahami bakeñisa mina, ili sicaba kamukana s'a zwisize mwa Egepita, u li, 2“Mwa macaba kaufela a mwa lifasi ki mina feela ni zibile ni ku mi babalela hande. Kikabakaleo libi za mina li ze tuna, mi kabakaleo ni ka mi utwisa butuku.”
Musebezi wa mupolofita
3Kana batu ba babeli ba ta kala musipili hamoho ba si ka lumelelana fo ba ta kopanela?
4Kana tau ha i itileli feela mwa mushitu konji ha i bulaile se siñwi?
Kana mwan'a tau h'a honi feela mwa sipulu haisi h'a sweli se siñwi?
5Kana nyunywani ya kona ku swalwa mwa katwa ku si na sico sa ku i teyisa?
Kana katwa ka ka mwashuka feela ku si na se si ka fasuzi?
6Kana tolombita ya ndwa i ka lila feela mwa muleneñi batu ba sa sabi?
Kana munzi u ka kenelwa ki kozi i sa tiswi ki Muñ'a Bupilo?
7Muñ'a Bupilo ya Pahami h'a ezi milelo y'a hupuzi a sa i sinuleli batanga ba hae, bona bapolofita.
8Tau ha i lila, ki mañi ya sa sabi?
Muñ'a Bupilo ya Pahami h'a bulela, ki mañi ya si ke a tumisa manzwi a hae?
Bumai bwa Samaria
9Mu zibise ba ba pila mwa mandu a bulena a bo Ashidodi ni Egepita, mu li, “Mu kopane hamoho mwa malundu a potolohile Samaria, mu bone mufili-fili ni bumaswe bo bu eziwa mwateñi.”
10Muñ'a Bupilo ya Pahami u li, “Batu ba, ba taza mandu a bona a matuna ka tutu ye ba nga ka tata ni ka busholi. Ha ba zibi ni mo ku sepahalelwa. 11Mi cwale sila si ka beya naha ya bona mwahali, si sinye makwawa a bona, mi si lutulule miyaho ya bona ye mituna, ye minde.”
12Muñ'a Bupilo ya Pahami u li, “Sina mulisana mw'a yangwelela mahutu a mabeli kamba zebe i liñwi ya ngu ye cilwe ki tau, kamukwaocwalo ni mwa Samaria ku piliswa batu ba sikai feela, ba ba ipumulezi mwa lipula za bona ze na ni buiketo. 13Mu teeleze cwale, mi mu lemuse ba lusika lwa Jakobo,” ku bulela Mulena, Muñ'a Bupilo ya Maata Kaufela. 14#2 Male 23.15 “Ka lona lizazi le ni utwisa batu ba Isilaele butuku kabakala libi za bona, ni ta sinya tutala twa Betele. Malulu a tutala a ta lobakiwa mi a wele fafasi. 15Ni ta lutulula mandu a maliha ni a litabula. Mandu a kabisizwe ka manaka a litou a ka fetuha matota, mi mandu a matuna kamukana a ta sinyiwa.”
Lozi Interconfessional Bible, Catholic Edition © Bible Society of Zambia, 2009.