Amosi 2
2
Moabi
1 #
Isa 15.1—16.14; 25.10-12; Jer 48.1-47; Ezek 25.8-11; Zefa 2.8-11 Muñ'a Bupilo ya Pahami u li, “Batu ba Moabi ba fosize hañata-ñata, mi kabakaleo ni ka ba utwisa butuku. Ba tompolozi masapo a mulena wa Edomo ka ku a cisa. 2Ni ka tisa mulilo mwa naha ya Moabi ku t'o cisa makwakwa a Kerioti. Batu ba Moabi ba ka shwela mwa lilata la ndwa, masole ha ba nze ba huweleza ni litolombita li nze li lila. 3Ni ka bulaya mubusi wa Moabi ni bazamaisi ba naha kaufela.”
Juda
4Muñ'a Bupilo ya Pahami u li, “Batu ba Juda ba se ba fosize hañata-ñata, mi kabakaleo ni ka ba utwisa butuku. Ba shwauzi lituto za ka mi ha ba si ka buluka milao ya ka. Ba kelusizwe ki yona milimu ya buhata ye ne ba sebeleza bo kukw'a bona. 5Cwale ni ka lumela Juda mulilo ku t'o cisa makwakwa a Jerusalema.”
Katulo ya Mulimu ku Isilaele
6Muñ'a Bupilo ya Pahami u li, “Batu ba Isilaele ba fosize hañata hahulu, mi kabakaleo ni ka ba utwisa butuku. Ba lekisanga batu ba ba si na mulatu kabakala ku sa lifa likoloti za bona, ili babotana ba ba sa koni ku lifa nihaili teko ya makatulo a mabeli. 7Ba hatelela ba ba fokola, ba ba sa koni ku itusa, mi ba kashaka babotana mwa nzila. Mutu ni ndat'ahe ba kopanela musali a li muñwi wa mutanga, mi ka mukwa wo ba silafaza libizo la ka le li kenile. 8Kwa libaka za bona kaufela za lisebelezo ba lobalanga fa liapalo za kale za swalelele ya likoloti ze si ka lifelwa kale ki babotana. Mwa tempele ya mulimu wa bona ba nwa waine ye ba amuhile ba likoloti za bona.
9 #
Mul 3.8-11
“Mi n'e li kabakala mina, batu ba ka, ha ne ni sinyize Maamori, ili banna ba ba ne ba li ba batelele sina likota za sidare, ba batata inge likota za oke. 10Ni mi zwisize mwa Egepita, ni mi etelezi mwa lihalaupa ka lilimo ze mashumi a mane mi ni mi file naha ya Maamori kuli i be ya mina. 11#Lipa 6.1-8 Ni ketile ba bañwi kwa bana ba mina ku ba bapolofita, ni ba bañwi ba micaha ya mina ku ba Manazareni. Batu ba Isilaele, kana taba ye ha si ya niti, nji? Ku bulezi, na, Muñ'a Bupilo. 12Kono mu nwisize Manazareni waine, mi mu laezi bapolofita kuli ba si ke ba bulela manzwi a ka. 13Mi cwale ni ka mi pyatela hona fo, mi mu ka tonga sina sikocikala se si longile hahulu lico. 14Nihaiba ba ba lubilo hahulu ha ba na ku punyuha. Ba ba maata ba ka felelwa ki maata a bona, mi masole ha ba na ku ipilisa. 15Ba masho ba ka saba, ba ba lubilo ha ba na ku punyuha, mi ba lipizi ha ba na ku ipilisa. 16Ka lona lizazi leo, nihaili masole ba ba bundume ka ku fitisisa ba ka lata lilwaniso za bona mi ba sabe.” Muñ'a Bupilo ya Pahami u bulezi.
Lozi Interconfessional Bible, Catholic Edition © Bible Society of Zambia, 2009.