2 Bakorinte 9
9
Ku tusa balumeli ba bañwi
1Ni bona kuli ha ku tokwahali kuli ni mi ñolele bakeñisa lituso ze lumelwa balumeli ba ba mwa Judea. 2Ni ziba kuli mu tabela ku tusa, mi ni itumbile ka mina kwa batu ba mwa Masedonia. Na li, “Banabahesu ba ba mwa Akaya ba itukiselize ku tusa, mane ba kalile ñohola.” Ku tukufalelwa kwa mina ku susuelize ba bañata ku bona. 3Nihakulicwalo, ni mi lumelela banabahabo luna, ki bao, kuli ku itumba kwa luna ka mina ku si ke kwa fetuha manzwi feela a buhata. Kono, sina ha ni se ni bulezi, ni lakaza kuli mu fumanwe mu se mu itukisize. 4Hakusicwalo, batu ba kwa Masedonia ha ba ka taha ni na, mi ba t'o fumana kuli ha mu si ka itukisa, lu ta swaba hahulu ka ku mi sepa cwalo, lu sa buleli se siñwi ka ona maswabi a mina! 5Cwale kiha ni hupuzi kuli i ne i ka ba nto ye nde ku kupa banabahabo luna bao kuli ba itangete, na ni si ka fita kale, mi ba lukise mpo-tuna ye mu se mu sepisize. Kamukwaocwalo, ha ni fita, i ta be i s'e lukisizwe kale, mi i ta bonisa kuli mu fana ka pilu ye tabile, isiñi ka ku hapelezwa.
6Mu hupule kuli ya cala hanyinyani, u ta kutula hanyinyani. Ya cala hahulu, u ta kutula hahulu. 7#Litu 20.10-15 Hakulicwalo, yo muñwi ni yo muñwi a fe sina mw'a hupulezi, isiñi ka ku honona kamba ku hapelezwa, kakuli Mulimu u lata ya fana ka tabo. 8Mulimu u na ni maata a ku mi fa za mifuta-futa ka buñata kuli kamita mu be ni ze mu tokwa kaufela, mane mu siyalelwe ki se si ta mi konisa ku peta misebezi ye minde kamukana. 9#Lipi 112.9 Sina mo ku ñolezwi kuli,
“U fa babotana ze ñata.
Musa wa hae ki wa kamita.”
10 #
Isa 55.10
Mulimu ya abela balimi peu ni buhobe bwa ku ca, u ta mi fa ni mina peu kaufela ye mu tokwa, mi u ta i hulisa, kuli bufani bwa mina bu ate. 11U ta mi fumisa kuli mu kone ku tusa ka linako kaufela, ni kuli ba bañata ba itumele ku Mulimu ka limpo ze mu fana ka luna. 12Kakuli lituso ze mu eza ze, ha li tusi feela balumeli ba ba tokwile, kono li tisa ka buñata litapelo za buitumelo ku Mulimu. 13Musebezi wo, u ta bonisa se mu li sona, mi ba bañata ba ta lumba Mulimu ka ku sepahala kwa mina mwa Litaba ze Nde za Kreste, ze mu lumezi, ni ka bufani bo mu ba fa za mina ni ku li abela ba bañwi kamukana. 14Ba ta mi lapelela ka lilato le lituna kabakala sishemo se situna s'a mi bonisize Mulimu. 15Ku iswe buitumelo ku Mulimu ka mpo ya hae ye sa konwi ku taluswa!
Currently Selected:
2 Bakorinte 9: Lozi09
Highlight
Copy
Compare
Share
Want to have your highlights saved across all your devices? Sign up or sign in
Lozi Interconfessional Bible, Catholic Edition © Bible Society of Zambia, 2009.
