Buka ya Pili ya Makabaeusi 16
16
Bana ba Simoni ba tula Kendebaeusi
1Cwale Joani a funduka mwa Gezeri mi a y'o bihela ndat'ahe, yena Simoni, z'a n'a eza Kendebaeusi. 2Simoni h'a utwa cwalo a biza bana ba hae ba bahulu, bo Judeasi ni Joani, mi a li ku bona, “Na, ni banabahesu hamoho ni ba mba ya ndate cwalo, lu lwanisize lila za Isilaele ku kala kwa bunca bwa luna ku fitela kacenu le. Ze ne lu eza kamukana ne li konda, mi lu pilisize Isilaele kwa lila za hae hañata. 3Ka nako ye ha ni se ni supezi cwana, mi mina se mu hulile, mu nge sibaka sa ka ni sa banabahesu. Cwale mu ye mu y'o lwanela sicaba sa luna, mi tuso ya Muñ'a Bupilo i be ni mina.”
4Cwale Joani a keta banna ba mwa naha ba likiti ze mashumi a mabeli ba lindume, ni ba lipizi cwalo. Bao ba funduka ku y'o lwanisa Kendebaeusi mi ba y'o lobala mwa Modeini. 5Habusa ba pakela, ba fita mwa libala mi ba katanyezwa ki mpi ye tuna ya masole ba mahutu ni ba lipizi. Ne ku na ni mulapo o n'o ba fitile mwahali. 6Joani a suteleza mpi ya hae a libani ni lila, mane ka ku bona kuli batu ne ba saba ku sila nukana yeo, yena kasibili a kala ku sila. Batu ba hae ha ba bona cwalo, ni bona ba sila, ba mu latelela. 7A alula mpi ya hae ka makuta a mabeli, mi a beya likuta la masole ba lipizi fahali, kakuli lila ne li na ni lipizi ze ñata hahulu. 8Litolombita za lila mi Kendebaeusi a tulwa ni mpi ya hae cwalo. Kwa shwa ni ku holofala ba bañata, mi ba ba ne ba siyezi ba sabela mwa makwakwa. 9Judeasi mwanahabo Joani a holofala, kono Joani yena a lelekisa lila mane ku fitela Kendebaeusi a y'o kena mwa Kedroni, ili munzi w'a n'a tiisize ka lukwakwa. 10Ba mata cwalo mane ba y'o kena mwa litawala za mwa matuko a Azoto, mi Joani a sinya litawala zeo. Lila za shwelwa ki batu ba likiti ze lishumi. Cwale Joani ni batu ba hae ba kutela kwa hae ba iketile.
Lifu la Simoni ni ku yola kwa mwan'a hae Joani
11Pitolemi mwan'a Abubusi a ketwa ku ba yena muzamaisi yo muhulu wa mpi ya mwa Libala la Jeriko. N'a na ni silivela ni gauda ye ñata hahulu. 12N'e li mukwenyan'a muprisita yo muhulu. 13A kala ku ba ni muna, mi a lakaza kuli a be yena muñ'a naha kaufela. Cwale a kala ku ba ni mulelo wa ku bulaya Simoni ni bana ba hae. 14Simoni ha n'a zamaya a tatuba minzi ya mwa naha ya Judea ni ku talima za zamaiso ya yona, a taha ni mwa Jeriko a na ni bana ba hae bo Matatiasi ni Judeasi. Fo ne li ka silimo sa mwanda ka mashumi a supile ni ze supile, ili mwa kweli ya bulishumi ka i liñwi, yona kweli ya Shebati. 15Mwan'a Abubusi yo, a ba puma-puma ka ku ba amuhela ni ku ba kenya mwa lukwakwanyana lw'a n'a yahile, lo lu bizwa Doki. A ba ezeza mukiti wa lico a nz'a patile mwateñi batu ba babulai. 16Simoni ni bana ba hae ha ba se ba kozwi, Pitolemi ni batu ba hae ba yema, ba swala lilwaniso mi ba matela ku Simoni, ba mu bulaya ni bana ba hae ba babeli, hamoho ni batu ba hae ba bañwi. 17A eza kezo ye maswe ya lunya mi a kutisa bunde ka bumaswe.
18Pitolemi a ñolela mulena liñolo la ku mu bihela kezo yeo, ka muhupulo wa kuli a lumelwe mpi, ni kuli minzi ni naha yeo li be za hae. 19Hape a luma batu ba bañwi kwa Gezeri ku y'o bulaya Joani, mi a lumela balaeli ba mpi liñolo la taelo ya kuli ba tahe ku yena, ili kuli a t'o ba fa mipuzo ni limpo za silivela ni gauda. 20Hape a luma ba bañwi ku y'o hapa Jerusalema ni Lilundu la Tempele. 21Kono mutu yo muñwi a mu laka mi a y'o lemusa Joani mwa Gezeri kuli ndat'ahe hamoho ni banabahabo ba bulailwe. Hape a ekeza, a li, “Pitolemi u lelile ku t'o bulaya ni wena cwalo.” 22Joani h'a utwa cwalo a swaba hahulu, kono a swala batu ba ba ne ba bata ku t'o mu bulaya, mi yena a ba bulaya, kakuli n'a s'a zibile mulelo wa bona wa pulao.
23Cwale buñata bwa likezo za Joani li ñozwi mwa buka, ili lindwa z'a n'a lwanile, bundume bwa hae, minzi y'a n'a silelelize ka mamota ni lika ze ñwi kaufela z'a n'a ezize. 24Buka ye i talusa za hae ku kala ka lizazi l'a kile a yola ndat'ahe ku ba yena muprisita yo muhulu.
Currently Selected:
Buka ya Pili ya Makabaeusi 16: Lozi09
Highlight
Copy
Compare
Share
Want to have your highlights saved across all your devices? Sign up or sign in
Lozi Interconfessional Bible, Catholic Edition © Bible Society of Zambia, 2009.