Buka ya Pili ya Makabaeusi 15
15
Antiokusi u amuhela litulo ni ku lwanisa Tirifo
1Antiokusi, mwan'a Mulena Demetriusi, h'a li mwa lioli za mwa liwate, a ñolela Simoni muprisita, ni mubusi wa sicaba sa Majuda, ni kwa sicaba kaufela. 2Liñolo leo ne li ñozwi cwana:
“Na, Mulena Antiokusi, ni lumelisa Simoni muprisita yo muhulu ni mueteleli, hamoho ni sicaba sa Majuda. 3Batu ba ba maswe ba sinyize mubuso wa bo ndat'a luna mi cwale ni hupula ku u kutisa ili kuli ni te ni u tiise sina mo n'o inezi pili. Cwale ni se ni kopanyize mpi ye tuna ni ku lukisa lisepe za ndwa. 4Ni lelile ku kena ka mulelo wa ku kena mwa naha kuli ni lwanise lila ze i sinyize ni ku shandaula minzi ye miñata mwa mubuso wa ka. 5Cwalehe, kabakaleo ni tiisa kuli litumelelano, za ku mi zwisa mwa mutelo ze n'e ezizwe ki malena bo ni yolile, hamohocwalo ni litumelelano ze ñwi ze ne ba mi ezelize, li ine cwalo.
6“Ni mi fa maata a kuli mu ikezeze mali a mina o mu ka itusisa mwa naha ya mina. 7Ni laela kuli Jerusalema ni sibaka se si kenile li lukuluhile. Lilwaniso ze mu ezize kamukana, ni makwakwa o mu yahile, ni ze mu na ni zona, li belele za mina cwalo. 8Likoloti kamukana ze mu na ni zona kwa mulonga, ka nako ye kamba za kwapili, li ka takulwa ku kala hona fa. Ha li na ku lifiwa kuya kuile. 9Ha se lu ka be lu kutisize mubuso wa luna, lu ta hulisa hahulu wena, sicaba sa henu, mane ni yona Tempele kasibili, ili kuli mu bubane hahulu mwa lifasi kamukana.”
10Ka silimo sa mwanda ka ze mashumi a supile ni ze ne, Antiokusi a funduka ku y'o lwanisa lila ze n'e li mwa naha ya bo kukw'a hae. Makuta a mpi kamukana a kena ku yena, mi ku Tirifo kwa siyala feela ba sikai. 11Antiokusi a lelekisa Tirifo, ya n'a sabezi mwa Dori kwa likamba la liwate. 12N'a zibile kuli n'a tahelwa ki bumaswe, ni kuli masole ba hae ne ba mu sabezi. 13Antiokusi a toma mafulo fapil'a Dori a na ni masole ba likiti ze mwanda ka mashumi a mabeli ni masole ba lipizi ba likiti ze supile ka si li siñwi. 14A beya munzi mwahali, mi ni lisepe za ndwa za kwala kwa likamba ili kuli a kone ku lwanisa muleneñi fa likamba ni kwa liwate, ku paleliswa batu kamukana ku kena kamba ku zwa mwateñi.
Lindumeleti ba kuta. Bulikani ni Roma bwa tiiswa
15 #
1 Mak 12.16
Ka nako yeo Numeniusi ni b'a n'a zamaile ni bona ba fita ku zwa kwa Roma, ba lwezi mañolo a ñolezwi malena ni linaha ze ñata ka mazwi a:
16“Na Lusiusi, mueteleli wa Baroma, ni lumelisa Mulena Pitolemi. 17Hape ni ku zibisa kuli lindumeleti za Majuda ne ba tile ku luna ka silikani ni kutwano ku t'o tiisa sinca bulikani ni swalisano ya luna ya kale. Ba tile ka libizo la muprisita yo muhulu Simoni ni sicaba sa Majuda. 18Ba tisize tebe ya gauda ya bukiti bo bu eza likilo ze mashumi a mane ka ze ne. 19Cwale kiha lu boni kuli lu lukela ku ñolela malena ni linaha ze ñwi ku ba lemusa kuli ba si ke ba ba kataza, ku ba lwanisa, kamba ku lwanisa naha kapa minzi ya bona, ni kuli ba si ke ba tusana ni lila za bona. 20Lu se lu amuhezi tebe ya bona. 21Cwale haiba ku na ni batu ba ba maswe ba ba zwa mwa naha ya bona mi ba sabezi ku mina, mu ba kutise ku Simoni yena muprisita yo muhulu kuli a ba fe mulatu ka ku latelela mulao wa bona.”
22Muzamaisi wa naha ya Roma yo, a lumela Mulena Demetriusi liñolo le li swana. A ñolela cwalo ni malena bo Demetriusi, Atalusi, Ariaratesi, ni Arasakesi. 23N'a li lumela ni kwa linaha kamukana ze ze tatama, ili Sampusamesi, Sipata, Delosi, Mindosi, Sikoni, Kalia, Samosi, Pamfilia, Lisia, Halikanasusi, Rodi, Faseli, Kosi, Side, Aradusi, Gotina, Kanidusi, Sipera ni Sirene. 24Hape ba ñola liñolo le li swana ni lona le, la Simoni muprisita yo muhulu.
Antiokusi wa Busupa u lwanisa Dori mi u fetuhela Simoni
25Ka yona nako yeo Antiokusi ha n'a inzi kwa mandamino a Dori, a zwelapili ku lwanisa munzi wo ka tata. A toma limishini za ndwa, mi a kwalela Tirifo mwahali, ni ku paleliswa batu ku kena kapa ku zwa mwateñi. 26Simoni a mu lumela banna ba likiti ze peli ba lindume kuli ba y'o mu tusa kwa ndwa. Hape a mu lumela silivela, gauda, ni lilwaniso ze ñata. 27Kono Antiokusi a hana ku li amuhela. Bakeñisacwalo, yena a sinya litumelelano za hae za kale z'a n'a ezize ni Simoni, mi a lela ku mu fetuhela. 28Antiokusi a luma Atenobiusi, yo muñwi wa Balikani ba hae, kuli a ye ku Simoni, a y'o li, “Wena u ngile Jopa, Gezeri, ni Sisabelo sa mwa Jerusalema, ye li minzi ya mwa naha ya ka. 29U sinyize libaka za yona, mi u sinyize hahulu naha, mane hape u ngile libaka ze ñata za naha ya ka. 30Cwale u kutise minzi y'o hapile ni mali a mitelo y'o fumani kwand'a Judea. 31Hakusicwalo u ni life mali a muwaya-waya a silivela a eza litalenta ze mianda i ketalizoho, ili a ku lifa mwa sibaka sa mitelo yeo, ni lisinyehelo z'o ezize. Hape u life mali a mañwi a muwaya-waya a eza litalenta ze mianda i ketalizoho, ili a mitelo ya minzi. Hakusicwalo lu ka t'o ku lwanisa.”
32Atenobiusi, yo muñwi wa Balikani ba Mulena, h'a fita mwa Jerusalema mi a bona maata ni bufumu bo bunde mwa macelo a Simoni a silivela ni gauda, ni babeleki ba hae ba bañata, a mbwetuka feela a sa buleli se siñwi. A bulela manzwi a mulena. 33Simoni a mu alaba, a li, “Ha lu si ka nga naha ya ba sili, kapa ku nga tutu ya ku sili, kono lu yolile lifa la bo kukw'a luna, ili ze lu kile lwa amuhiwa ki lila za luna ku si na libaka. 34Cwale ha lu se lu na ni nako ye swanela, lu kutisa sanda sa bo kukw'a luna. 35Haili ka za Jopa ni Gezeri y'o bata, yeo ki yona minzi ye ne kataza hahulu batu ni ku sinya hahulu libaka ze ñwi za naha ya luna. Lu itukiselize ku i lifela mali a muwaya-waya a eza mwanda.”
36Ndumeleti yo ha si ka bulela se siñwi kono a kuta kapili a nyemile hahulu, mi a y'o bihela mulena z'a n'a bulezi Simoni ni za maata ni lika kamukana z'a n'a boni. Mulena h'a utwa cwalo a halifa hahulu.
Kendebaeusi u lwanisa Judea
37Mwahal'a nako yeo Tirifo a kena mwa sisepe mi a sabela kwa Orthosia. 38Mulena a keta Kendebaeusi kuli a be muzamaisi wa mpi ya kwa likamba la liwate, mi a mu fa mpi ya masole ba mahutu ni ba lipizi. 39A mu laela ku libisa mpi ya hae kwa Judea, mi a mu laela hape kuli yena a y'o tiisa Kedroni ni ku sileleza minyako ya ona. Ku tuha fo a lwanisa batu, mulena h'a sa y'o lelekisa Tirifo.
40Kendebaeusi a fita kwa Jamunia mi a kala ku nyandisa batu kapili, a y'o lwanisa Judea, ni ku swala batu ku ba beya mwa tolongo, mi a bulaya ba bañwi. 41A beya Kedroni mwa lukwakwa mi a beya mwateñi masole ba lipizi ni makuta a ba mahutu, kuli ba n'o zwanga mwateñi ku y'o lwanisa ni ku swala batu ba Judea mwa linzila ka sipundumukela sina mw'a n'a laelezi mulena.
Currently Selected:
Buka ya Pili ya Makabaeusi 15: Lozi09
Highlight
Copy
Compare
Share
Want to have your highlights saved across all your devices? Sign up or sign in
Lozi Interconfessional Bible, Catholic Edition © Bible Society of Zambia, 2009.