Buka ya Pili ya Makabaeusi 12
12
Jonatani u eza bulikani ni Basipata
1Jonatani h'a bona kuli lika ne li zamaya hande kwa neku la hae, a keta batu mi a ba luma kwa Roma ku y'o tiisa ni ku ncafaza bulikani bwa bona ni Baroma. 2Hape a lumela Basipata ni ba libaka ze ñwi mañolo a swana. 3Lindumeleti bao ba ya kwa Roma, ba y'o kena mwa Kuta ya Baroma, mi ba li, “Jonatani muprisita yo muhulu ni sicaba sa Majuda ba lu lumile kuli lu t'o ncafaza tumelelano ya bulikani ni swalisano ya mina sina sapili.” 4Baroma ba ba fa mañolo a ku isa kwa babusisi ba bahulu ba libaka za bona kuli ba kone ku zamaya ka kozo mwa naha ha ba ya kwa Judea.
5Ki le liñolo la Jonatani l'a n'a ñolezi Basipata. Lona li li, 6“Na Jonatani muprisita yo muhulu, bazamaisi ba sicaba, baprisita ni sicaba kamukana sa Majuda, lu kopana hamoho ku lumelisa mina banabahabo luna Masipata. 7Kale-kale ne ku na ni liñolo le ne li kile la lumelwa ku Oniasi muprisita yo muhulu ki Areiosi yo muñwi wa malena wa mina ili le li talusa kuli mina mu banabahabo luna luli, sina mo li boniseza liñolo leo.” 8Oniasi a amuhela lindumeleti bao ka likute mi a lumela za mwa liñolo leo mo ne ku talusizwe hande za bulikani ni swalisano. 9Ka neku la luna lu sa li tokwi lu nze lu tiiswa lipilu ki libuka ze kenile ze lu na ni zona 10Kono lu iketezi ku mi lumela manzwi a ku tiisa sinca mukowa ni bulikani, ili kuli lu si ke lwa ba batu ba sili ku mina kakuli se ku fitile nako ye telele ku zwa fo mu kile mwa lu ñolela liñolo leo. 11Kikabakaleo ka linako kaufela ni mwa mazazi a ketilwe ni a mikiti ha lu mi libali mwa litabelo ni litapelo ze lu eza, kakuli kwa lukela mi kwa tokwahala ku hupulanga banabahabo luna. 12Lu tabile bakeñisa maata ni butumo bwa mina. 13Cwale haili luna lu se lu tahezwi ki miliko ye miñata, lindwa ze ñata mane ni malena ba ba lu beile mwahali ba lu lwanisize. 14Ne lu sa lati ku mi kataza ka za lituso, kamba ku kataza balikani ba luna ka nako ya lindwa zeo. 15Kono cwale ka tuso ya Mulimu lu pilisizwe kwa lila za luna, mane bona ki bona ba ba kokobelizwe. 16Mi lu ketile Numeniusi mwan'a Antiokusi, ni Antipata mwan'a Jasoni, mi lu ba lumile kwa Baroma ku y'o tiisa sinca tumelelano ya luna ya bulikani ni swalisano. 17Hape lu ba laezi kuli ba fite ku mina, ba mi lumelise mi ba mi fe liñolo le, la ku talusa sinca za mukowa wa luna ni mina. 18Lu ka taba hahulu haiba mu ka lu alaba.
19“Liñolo le li tatama ki le li swana ni le ne li lumezwi ku Oniasi, le li li,
20“‘Na, Areiosi mulena wa Sipata, ni lumelisa Oniasi muprisita yo muhulu. 21Ku se ku fumanwi mwa libuka ze ama Masipata ni Majuda kuli ki bana hamoho, mi ba simuluha ku Abrahama. 22Cwale ha u bona, luna se lu zibile cwalo, lu ta taba haiba mu ka lu zibisa mo mu pilela. 23Manzwi a luna ku mina ki a: mitapi, limunanu za mina ni liluwo la mina ki za luna, mi ni za luna ki za mina. Cwale lu laela lindumeleti za luna ku t'o mi taluseza manzwi a.’ ”
Jonatani mwa Siria. Simoni mwa Filisita
24Jonatani n'a zibile kuli bazamaisi ba mpi ya Demetriusi ba taha hape ni mpi ye tuna hahulu ku t'o ba lwanisa. 25Cwale a funduka mwa Jerusalema ku y'o ba katanyeza mwa naha ya Mahamati ili ku ba paleliswa ku kena mwa naha ya habo. 26A luma matwela mwa mafulo a bona. Bona ba t'o mu bulelela kuli lila ne li itukiseza ku lwanisa Majuda busihu. 27Cwale lizazi ha se li likela a laela batu ba hae ku libelela ba nze ba sweli lilwaniso, ni kuli ba itukiseze ku lwana ka nako ifi kamba ifi haiba ba lwaniswa busihu. Hape a beya balibeleli ku potoloha mafulo kamukana. 28Lila ha se li ziba kuli Jonatani ni batu ba hae ba itukiselize ku lwana, lila zeo za saba, mi kabakala ku tula lipilu za tumbula mulilo mwa mafulo a zona. 29Jonatani ni batu ba hae ha ba bona kuli lila li tukisize mulilo, ba tokwa ku ziba kuli lila za baleha, kono ba tona cwalo ku fitela kakusasana. 30Cwale Jonatani, niha n'a likile ku latelela lila, a palelwa ku ba swala, kakuli ne ba se ba silile Nuka ya Eleuterusi. 31Cwale Jonatani a kenela Maarabe ba ba bizwa Mazabadea, mi a ba tula ni ku hapa tutu ya bona. 32Kih'a fulalela mafulo, a ya kwa Damaseka mi a zamaya mwa naha kaufela.
33Ka yona nako yeo, Simoni ni yena a funduka mi a zamaya mane a be a y'o fita mwa Ashikeloni ni libaka ze ñwi ze ne li silelelizwe. Cwale a liba kwa Jopa mi a akufa ku y'o u hapa. 34N'a s'a utwile kuli bañi ba ona ne ba se ba itukiselize ku u fa batusi ba Demetriusi. Kih'a beya mwateñi masole ku u libelela.
Musebezi wa miyaho mwa Jerusalema
35Jonatani ha s'a kutile a kopanya bahulu ba sicaba mi a lelisana ni bona ku yaha makwakwa mwa Judea. 36A lela ku hulisa mamota a Jerusalema. Hape a eza suuba se si lumbile hahulu mwahal'a Sisabelo ni muleneñi, ili ku kauhanya Sisabelo kwa muleneñi, ni ku si sileleza kuli batu ba si ke ba lekisana ni ba mwa Sisabelo. 37Ba kopana hamoho ku yaha munzi sinca. Kalulo ye ñwi ya limota la kwa upa ne i wile, mi a yaha sinca sibaka se ne si bizwa Kafenata. 38Ka yona nako yeo Simoni a yaha sinca Adida mwa naha ye patami, a u beya mwa lukwakwa, mi a toma likwalo za minyako ze na ni lipakiso.
Jonatani u swalwa ki lila za hae
39Mulelo wa Tirifo ne li kuli a be mulena wa Asia, ili kuli ha s'a yolile a tule Mulena Antiokusi. 40N'a na ni sabo ya kuli mwendi Jonatani n'a si ke a mu lumelela ku eza cwalo, kamba mane mwendi a ka swana a mu lwanisa. Cwale kih'a funduka mi a taha kwa Beti-Sheani ka sepo ya ku fumana mikwa ya ku mu swala kuli a mu bulaye.
41Jonatani ni yena a funduka ku y'o mu katanyeza a na ni masole ba likiti ze mashumi a mane ba ba ziba hande ndwa mi a t'o fita kwa Beti-Sheani. 42Cwale Tirifo, h'a mu bona ni mpi ya hae ye tuna, a saba ku mu lwanisa kapili. 43Mane a mu amuhela ka likute, a mu lumba hahulu kwa balikani ba hae kaufela mane a mu fa ni limpo, mi a bulelela makuta a hae kuli ba mu kuteke sina yena. 44A li ku Jonatani, “U kataliselizeñi batu ba kaufela ku si na ndwa mwahal'a luna? 45U ba kutise kwa hae, u iketele feela ba sikai ba ba ka ku sileleza mi u ye ni na kwa Pitolemaisi. Ni ta y'o ku fa ona ni minzi ye miñwi ya masabelo, hamoho ni makuta a masole ba ba siyezi, ni manduna cwalo. Cwale ni ta kuta kwa hae, kakuli ki sona se ne ni tezi kwanu.” 46Jonatani a mu sepa mi a eza sina mw'a n'a bulelezi. A lukulula masole ba hae, mi bona ba kutela kwa naha ya Judea. 47Cwale yena a siyalelwa ki batu ba likiti ze talu mi ku bona bao ba likiti ze peli a ba siya mwa Galilea, ibe yena a ya ni ba sikiti feela. 48Kono Jonatani a sa kena feela mwa Pitolemaisi, batu ba mwateñi ba mu kwalela mwahali, mi ba mu swala, ni ku bulaya b'a n'a tile ni bona kaufela ka mikwale.
49Tirifo a lumela makuta a masole ba mahutu ni ba lipizi kwa Galilea ni mwa Libala le Lituna ku y'o yundisa batusi ba Jonatani kamukana. 50Batusi ba Jonatani ba ziba hande kuli Jonatani u swelwi mi ba hupula kuli u bulailwe ni b'a n'a ile ni bona. Cwale ba itiisa lipilu mi ba zamaya hamoho ku y'o lwana. 51Kono lila za bona, ha ba bona mo ne ba itukiselize ku itwanela, ba kuta. 52Batu ba Jonatani kaufela ba y'o fita mwa naha ya Judea ba iketile hande ka kozo, ba nze ba lila Jonatani ka sabo ni maswabi a matuna. Cwale batu ba Isilaele kaufela ba kena mwa sililo seo. 53Bahedeni ba ba ne ba pila mwa matuko kamukana, ba kala ku bata mikwa ya ku yundisa Majuda ka yona ba nze ba li, “Cwale ha u bona kuli ha ba sa na mueteleli, kamba muyemeli. Ki yona nako ya luna ya ku ba lwanisa mane lu ba yundise kuli ba si ke ba hupulwa hape mwahal'a batu kaufela ba mwa lifasi.”
Currently Selected:
Buka ya Pili ya Makabaeusi 12: Lozi09
Highlight
Copy
Compare
Share
Want to have your highlights saved across all your devices? Sign up or sign in
Lozi Interconfessional Bible, Catholic Edition © Bible Society of Zambia, 2009.