Buka ya Pili ya Makabaeusi 13
13
Simoni u nga sibaka sa bueteleli
1Simoni a utwa kuli Tirifo u kopanyize mpi ye tuna ku t'o lwana ni ku sinya naha ya Judea. 2H'a bona mo ne ba ngangamisezwa batu ki sabo ye tuna, a ya kwa Jerusalema mi a y'o kopanya batu hamoho. 3A ba tiisa lipilu ka kelezo ye, a li, “Mwa ziba hande ili mina mo ni nyandezi, na, ni banabahesu hamoho ni ba mba ya ndat'a luna ku sebeleza Mulao ni sibaka se si kenile. Hape mwa ziba lindwa ni butata bo lu boni fo li kuma. 4Kikabakaleo banabahesu kamukana ba shwile, ili ku shwela Isilaele, mi na, ki na feela a li muñwi ya siyezi. 5Cwale ku si ke kwa ba cwalo ku na, kuli ni pilise bupilo bwa ka, ka nako ifi kamba ifi ya manyando, kakuli na, ha ni yo munde ku fita banabahesu. 6Cwale ni ka kutiseza lila bumaswe bakeñisa sicaba ni sibaka se si kenile, basali ba mina, ni bana ba mina, kabakala kuli bahedeni se ba kopani hamoho kuli ba lu timeze.”
7Lipilu za batu kamukana za tiya ni ku taba ha ne ba teelelize kwa manzwi a hae. 8Bona ba mu alaba ka ku huweleza, ba li, “Ki wena muzamaisi wa luna ya keni mwa sibaka sa banabahenu bo Judasi ni Jonatani. 9U lu lwanele mwa lindwa za luna kamukana, mi lu ta eza s'o ta lu bulelela kaufela.” 10Cwale a kopanya batabani kamukana mi a akufela ku y'o feleleza mamota a Jerusalema, ili ku sileleza munzi kamukana. 11Kih'a lumela mpi ye ñwi kwa Jopa, ili ye n'e zamaiswa ki Jonatani mwan'a Abisalomi, mi yena a y'o leleka bañi ba munzi, a ina mwateñi.
Simoni u paleliswa Tirifo ku kena mwa Judea
12Cwale Tirifo a zwa mwa Pitolemaisi a na ni mpi ye tuna ku y'o lwanisa naha ya Judea. A taha ni Jonatani a nz'a libelelwa. 13Simoni a toma mafulo mwa Adida ku libana ni libala. 14Tirifo ha s'a ziba kuli Simoni u ngile sibaka sa mwanahabo Jonatani, ni kuli u itukiselize ku mu lwanisa mwa ndwa, a luma batu ku yena ka manzwi a, a li, 15“Mwanahenu Jonatani n'a na ni sikoloti sa mali a mulonga ili a n'a sebelisa mwa musebezi wa mulonga. Cwale kikabakaleo lu mu bulukile kwanu. 16Haiba u ka lu lumela mali a muwaya-waya a eza mwanda, hamoho ni bana ba hae ba babeli kuli i be swalelele, ya ku sepisa kuli ha lu ka lukulula Jonatani a si ke a lu fetuhela, fohe, lu ta mu lukulula.”
17Simoni niha n'a ziba kuli manzwi ao n'e li a buhata, a lumela mali ni bashimani kabakala ku saba kuli batu ne ba ka li, 18“Simoni u bulaisize Jonatani kabakala ku sa fa Tirifo mali ni bashimani.” 19Kabakaleo a lumela mali ao, hamoho ni bashimani, kono Tirifo a sinya sepiso ya hae, mi a hana ku lukulula Jonatani.
20Ku zwa fo, Tirifo a kena mwa naha kuli a lwane ni ku sinya naha. A liba ka nzila ya Adora, kono Simoni ni mpi a mu katanyeza kw'a n'a lika ku kenela kaufela. 21Batu ba mwa Sisabelo sa mwa Jerusalema ba tundamena ku lumelanga mañusa ku Tirifo ku mu susueza kuli a tahe ku bona ka nzila ya mwa naheñi, mi a ba lumele lituso. 22Tirifo a kopanya balwani ba hae ba ba pahami fa lipizi kamukana kuli a ye, kono ka lona lizazi leo busihu kwa taha silami se situna sa litwa. Sa kwahela naha kamukana mane a palelwa ku zamaya mwa litwa. Cwale a siya mafulo mi a ya kwa Galilea. 23Ha s'a li fakaufi ni Basikama, a bulaya Jonatani mi a bulukwa hona mo. 24Cwalo Tirifo a kuta mi a ya mwa naha ya habo.
Jonatani u bulukwa ki Simoni kwa Modeini
25Simoni a luma batu ku y'o bata, mane ba y'o fumana, masapo a mwanahabo yena Jonatani mi a mu buluka mwa Modeini, ili munzi wa bo kukw'a hae. 26Sicaba sa Isilaele kamukana sa eza sililo ku silisa Jonatani, ba nze ba bokolola ka mazazi a mañata. 27Fa libita la bo ndat'ahe ni banabahabo, Simoni a yaha fateñi muyaho wa kupuzo o mutelele o kona ku bonahala kwahule. A itusisa macwe a betilwe hande kwamulaho ni fapili. 28Hape a yaha fateñi bo nalumbwa ba batuna ba supile ba ba talimani, ili kupuzo ya ndat'ahe, m'ahe ni banabahabo ba bane. 29A potolosa bona ka misumo ye mituna, mi ku yona yeo a beta fateñi liswaniso za lilwaniso za kupuzo ye sa feli, mi kwatukw'a zona lisepe ze kona ku bonwa ki batu kamukana ba ba fita mwa liwate. 30Wo ki ona muyaho wa kupuzo w'a n'a yahile mwa Modeini, mi u sa li teñi kwateñi ni kacenu le.
Demetriusi wa Bubeli u utwana ni Simoni
31Tirifo a beteka Mulena Antiokusi ya n'a sa li mucaha, mi a mu bulaya. 32A ikungela bulena. A busa naha ya Asia, mi a tisa bumaswe bo butuna mwa naha.
33Simoni a yaha makwakwa a mwa Judea, a' potolosa ka litawala ze telele, ni mamota a matuna a na ni minyako ni lipakiso, kihona a beya mwateñi lico ze ñata. 34Hape a luma lindumeleti ku Mulena Demetriusi ku y'o mu kupa kuli a lukulule naha, kakuli s'a n'a ezize Tirifo n'e li ku sinya naha. 35Mulena Demetriusi a alaba ka za kupo ya hae mwa liñolo le li li,
36“Na, Mulena Demetriusi, ni lumelisa Simoni muprisita yo muhulu ni mulikan'a malena, ni manduna ni sicaba sa Majuda kaufela. 37Ku lu tabisize ha lu til'o amuhela mpo ya kuwani ya bulena ya gauda ni nzalu ye mu lu lumezi, mi cwale lu itukiselize ku eza kozo ye tiile ni mina. Ni ñolela bazamaisi kuli mu lukuluhile kwa mutelo. 38Lika kaufela ze lu mi sepisize li swanezi ku ezahala, mane ni minzi ye mu silelelize ki ya mina cwalo. 39Lu swalela milatu kamukana ye ne ezwa ka mulelo kamba ka ku sa lela, ku fitela kacenu le, mane ni ona mali a mutelo wa naha o mu si ka zwisa. Ni mitelo ye miñwi ye ne mu telanga mwa Jerusalema kaufela, ha mu sa na ku i tela. 40Haiba ku na ni ba ku mina ba ba lukela ku kena mwa bupolisa ba kene. Mi ku be ni kozo mwahal'a luna.”
41Mulao wa ku lukulula Maisilaele kwa bahedeni n'o tomilwe ka silimo sa mwanda ka mashumi a supile. 42Batu ba kala ku ñola mañolo ni litumelelano ni ku tiisa kuli, “Se ki silimo sa pili sa puso ya Simoni muprisita yo muhulu, muzamaisi yo muhulu wa mpi, ni mueteleli wa Majuda.”
Gezeri u hapwa ki Simoni
43 #
2 Mak 10.32-38
Ka yona nako yeo Simoni a beya munzi wa Gezeri mwahali ka makuta a hae. A lukisa mishini ya ndwa, a i tisa kwa munzi mi a t'o i toma kwateñi. A lwanisa tawala i liñwi mi a i hapa. 44Batu ba ba ne ba li mwa mishini ya ndwa ba tulela mwa munzi mi kwa y'o ba ni mufili-fili o mutuna. 45Bañi ba munzi hamoho ni basali, mane ni bona bana cwalo, ba pahama fa mamota, ba pazuzi liapalo za bona mi ba lila ka ku huweleza ku kupa kuli Simoni a ba lumelele ku koza. 46Ba li, “U si ke wa likanyisa bumaswe bwa luna, kono u lu eze ka musa wa hao.”
47Simoni a lumela ku eza ni bona tumelelano ya kozo, mi a tuhela ku ba lwanisa. A ba leleka mwa munzi, a kenisa mandu a n'a na ni milimu ya maswaniso, mi cwale a kena mwateñi ka lipina za ku lumbeka. 48A felisa bumaswe bo ne bu li mwateñi, mi a beya mwateñi batu ba ba ne ba buluka Mulao. Ha s'a u silelelize, a ikahela ndu ya hae mwateñi.
Simoni u hapa Sisabelo sa mwa Jerusalema
49Batu ba mwa Sisabelo sa mwa Jerusalema ne ba hanisizwe ku yanga mwa naha ni ku kuta ku t'o leka kapa ku lekisa. Cwale kamukwaocwalo, ba felelwa ki lico, mi buñata bwa ku bona ba bulawa ki tala. 50Ba kupa ku koza ku Simoni, mi yena a ba lumelela, kono nihakulicwalo a ba leleka mwateñi mi a kenisa Sisabelo kwa bumaswe bwa sona. 51Majuda ba kena mwateñi ka la bumashumi a mabeli ni a malalu la kweli ya bubeli mwa silimo sa mwanda ka mashumi a supile ni si li siñwi ba nze ba opela lipina za buitumelo. Ba lwala ni linzalu, ba liza lihalepa ni milai ni likambeliso ze ñwi. Kwa opelwa lipina za ku lumbekwa ni za litapelo, kakuli sila se situna ne si tubilwe mi si latezwi kwande a Isilaele. 52Simoni a eza lizazi leo lizazi la mukiti o eziwa hañwi ka silimo. A tiisa lukwakwa lwa Lilundu la Tempele le ne li inzi fakaufi ni Sisabelo, mi a ina mwateñi ni batu ba hae. 53Simoni ha s'a bona kuli mwan'a hae Joani s'a hulile, a mu keta ku ba muzamaisi wa makuta a mpi kaufela ni ku ina mwa Gezeri.
Currently Selected:
Buka ya Pili ya Makabaeusi 13: Lozi09
Highlight
Copy
Compare
Share
Want to have your highlights saved across all your devices? Sign up or sign in
Lozi Interconfessional Bible, Catholic Edition © Bible Society of Zambia, 2009.