Ruth 4
4
Kasamentu di Boaz ku Ruth
1Mientrastantu Boaz a bai porta di siudat, kaminda nan sa reuní. E no a sinta ei ku el a mira e pariente, ku el a papia di dje, pasa. Boaz a bis'é: ‘Amigu, bin tende.’ E hòmber a kai sinta. 2Despues Boaz a yama dies ansiano di e siudat i a kombidá nan tambe bin sinta aserka. Ora nan a sinta 3el a bis'é: ‘Noemi, ku a bolbe di Moab, ke bende e pida tera ku tabata pertenesé na nos pariente Elimelèk. 4Mi a pensa ku ta bon pa pone bo na altura pa por si akaso ta interesá bo, bo kumpr'é awor, den presensia di esnan ku ta sintá aki i di e ansianonan di siudat. Si ta asina bo ke kumpli ku bo deber di pariente, hasié, pero si bo no ke, bisa mi pa mi sa. Pasobra aparte di bo, ta ami so ta bini na konsiderashon pa kumpra.’ E hòmber a bisa: ‘Mi ke kumpra.’ 5Boaz a bisa: ‘Dia ku bo kumpra e tera di Noemi, di mes bo ta tuma Ruth, e biuda moabita, pa bo kasá. Asina e tera ta keda komo herensia riba nòmber di su defuntu.’ 6E hòmber a rospondé: ‘Den e kaso ei mi no por kumpra, pasobra lo mi perhudiká mi mes herensia. Hasi ábo uso di mi derecho, pasobra ami no por.’
7Den e tempu aya tabata kustumber na Israel ku esun ku tabata bende òf interkambiá tabata kita un pia di sandalia duna e otro na momento di transakshon pa duna esaki balides legal. Asina nan tabata seya e kombenio. 8Ora e pariente a bisa Boaz pa Boaz kumpr'é, el a kita un pia di sandalia. 9E ora ei Boaz a bisa e ansianonan i tur esnan presente: ‘Boso ta testigu ku mi ta kumpra di Noemi tur loke tabata pertenesé tantu na Elimelèk komo na Kilion i Maglon. 10Asin'akí tambe mi ta tuma Ruth, e moabita, biuda di Maglon, pa mi kasá. Di e manera akí e tera ta keda herensia di e defuntu pa su nòmber sigui biba den su famia i siudat.#Deuteronomio 25:5-6 Boso ta testigu.’ 11E ansianonan i tur ku tabata presente na e porta a kontestá: ‘Sí, nos ta testigu. SEÑOR hasi pa e muhé ku drenta den bo kas ta manera Raquel i Lea,#Génesis 29:31—30:24 ku a forma pueblo di Israel, i pa abo ta un hòmber poderoso den Efrata i bira famoso den Betlehèm. 12SEÑOR duna bo hopi yu ku e mucha muhé akí pa bo desendientenan ta mes hopi ku esnan di Pèrèsh, yu hòmber di Tamar i Huda.’#Génesis 38:27-30
13Asin'ei Boaz a kasa ku Ruth. E tabatin relashon kuné i Dios a perkurá pa e sali na estado i haña un yu hòmber. 14E ora ei e muhénan a bisa Noemi: ‘Alabá sea SEÑOR ku awe a duna bo un ñetu pa sòru pa bo i mare e por bira famoso den Israel. 15Lo e duna bo ánimo pa biba atrobe i lo kuida bo den bo behes, pasobra e ta yu di bo suegra, ku tantu ta stima bo i ku ta bal pa bo mas ku shete yu.’ 16Noemi a pone e yu riba su skochi i a tuma riba dje pa kri'é. 17I e muhénan, bisiña di Noemi, tabata bisa: ‘Noemi a haña un yu.’ Nan a yam'é Obed. E ta tata di Ishai, i Ishai ta tata di David.
E antepasadonan di David
18-22Di tata pa yu e liña di famia di Pèrèsh pa David#1 Krónikanan 2:10-14; Mateo 1:3-6 ta: Pèrèsh, Hèsron, Ram, Aminadab, Nashon, Salmon, Boaz, Obed, Ishai, David.
Currently Selected:
Ruth 4: BPK13
Highlight
Share
Copy
Want to have your highlights saved across all your devices? Sign up or sign in
Papiamentu Bible with DC © Bible Society in Netherlands Antilles and Aruba, 2012, 2013