Ruth 3
3
Bondat di Boaz
1Un dia Noemi a bisa Ruth: ‘Mi yu, mi tin ku buska un kasamentu pa bo, pa bo forma un hogar i biba felis. 2Manera bo sa, Boaz, ku ta doño di trabou di e hendenan ku bo a traha kuné, ta nos famia. Tende, awe tardesitu e ta bai den kunuku pa bencha grano. 3Baña, perfumá bo kurpa, bisti bo bistí di mas bunita i bai aya. No laga Boaz ripará ku bo t'ei promé ku e kaba di kome i bebe. 4Paga bon tinu na unda e ta kai drumi. E ora ei bo ta bai, bo ta lanta e paña ku ta tapa su pianan i bo ta drumi einan. Djei e mes lo bisa bo kiko bo mester hasi.’ 5Ruth a rospondé: ‘Lo mi hasi tur loke bo a bisa mi.’
6Ruth a bai den kunuku i a hasi manera su suegra a mand'é. 7Boaz a kome i bebe barika yen. Djei el a kai drumi banda di un monton di sebada. Ketu ketu Ruth a yega serka, el a hisa e paña for di Boaz su pianan i kai drumi.
8Meianochi Boaz a spièrta di gòlpi, lanta sinta i topa ku un muhé drumí na su pia. 9Boaz a puntr'é: ‘Ta ken bo ta?’ El a kontestá: ‘Ami ta Ruth, bo sirbidó. Si tòg ta bo deber pa sòru pa mi, lo bo n' kasa ku mi?’#3:9 lo bo n' kasa ku mi?; literalmente: mi ke pa bo tapa mi ku rant di bo mantel. Segun kustumbernan di e tempu ei e akto ei tabata nifiká ku e hòmber a aseptá pa kasa ku e muhé. 10Boaz a bisa: ‘SEÑOR bendishoná bo, mi yu. Awor mas ku nunka bo a demostrá bo fieldat, pasobra bo por a skohe un otro hòmber mas hóben ku mi, pober òf riku, ma bo no a hasié. 11Mi yu, no preokupá bo. Lo mi hasi pa bo tur loke bo pidi mi. Henter pueblo sa ku bo ta un muhé balente. 12Mi sa ku mi tin ku sòru pa bo, pero tene kuenta ku tin un pariente mas yegá ku mi. 13Keda aki awe nochi. Si resultá mañan mainta ku e ke kumpli ku su debernan di famia, ta bon, pero si e no ke, mi ta primintí bo dilanti di SEÑOR, ku ami lo kumpli. Drumi numa te mainta.’ 14Asina Ruth a drumi na pia di Boaz te mainta. Ora ku tabata skur ainda i ku bo no por a mira ken ta ken el a lanta, pasobra 15Boaz a bis'é: ‘Mira pa niun hende haña sa ku tabatin un muhé aki.’ Promé ku e bai Boaz a bis'é: ‘Bini ku bo mantel aki, habrié i ten'é duru.’ Ora Ruth a hasi esaki, Boaz a basha seis be un kantidat di sebada pa e bai kuné. Despues Boaz a bolbe siudat. 16Ora Ruth a yega serka su suegra, Noemi a puntr'é: ‘Kon a bai bo, mi yu?’ I Ruth a kont'é tur loke Boaz a hasi p'e. 17El a agregá: ‘Tur e sebada akí el a duna mi i el a bisa mi ku mi no por bolbe man bashí serka mi suegra.’ 18Noemi a bisa: ‘Mi yu, warda trankil kon kos ta desaroyá. E hòmber akí lo no sosegá awe tanten e no resolvé e asuntu akí.’
Currently Selected:
Ruth 3: BPK13
Highlight
Share
Copy
Want to have your highlights saved across all your devices? Sign up or sign in
Papiamentu Bible with DC © Bible Society in Netherlands Antilles and Aruba, 2012, 2013