Revelashon 4
4
Rondó di trono di Dios
1Despues di esaki ami, Huan, a mira un porta den shelu ku tabata habrí, i e stèm ku mi a yega di tende papia ku mi ántes, e stèm ku a zona manera tròmpèt, a bisa: ‘Bini aki riba, e ora ei lo Mi laga bo mira kiko mester sosodé despues di esaki.’
2Mesora Spiritu di Dios a poderá di mi. Mi a mira ku tabatin un trono den shelu i ku riba e trono tabatin un hende sintá. 3Esun sintá riba trono tabatin aparensia briante di e piedranan presioso yaspes i rubi. Rondó di e trono tabatin un regenbog ku paresido di brio di esmeralda.#Ezekiel 1:26-28; 10:1 4Rondó di e trono tabatin 24 otro trono i riba e trononan ei tabatin 24 ansiano sintá. Nan tabata na blanku bistí i tabatin un korona di oro riba nan kabes. 5For di e trono rayo di welek tabata kòrta, bos tabata ronka i tabata klap.#Éksodo 19:16; Revelashon 8:5; 11:19; 16:18 Dilanti di e trono tabatin shete flambeu ardiente sendé;#Ezekiel 1:13 esakinan ta e shete spiritunan di Dios.#Zakarías 4:2; Revelashon 1:4 6Dilanti di e trono tabatin algu manera un laman di glas, kla manera kristal.#Ezekiel 1:22
Meimei, rondó di e trono, tabatin kuater ser bibu, ku tabatin yen di wowo di dilanti i di patras. 7E promé ser tabata parse un leon, e di dos un toro yòn, e di tres tabatin un kara manera di hende i e di kuater tabata parse un águila ku tabata bula.#Ezekiel 1:5-10; 10:14 8Kada un di e kuater sernan tabatin seis ala, ku na e banda ariba i e banda abou tabata yen di wowo.#Ezekiel 1:18; 10:12 Sin stòp e sernan tabata bisa di dia i anochi:
‘Santu, santu, santu
ta Señor Dios Todopoderoso,#Isaías 6:2-3
ku tabata, ku ta i ku ta bini.’
9Kada be ku e sernan duna gloria i honor i yama danki na Esun ku ta sintá riba e trono i ku ta biba te den tur eternidat, 10e 24 ansianonan ta kai na rudia pa adorá Esun sintá riba e trono, Esun ku ta biba te den tur eternidat. Nan ta benta nan korona dilanti di e trono, miéntras nan ta grita:
11‘Señor, nos Dios, Bo ta digno
di risibí gloria, honor i poder,
pasobra Bo a krea tur kos;
dor di bo boluntat tur kos a kuminsá eksistí
i ta kreá.’
Currently Selected:
Revelashon 4: BPK13
Highlight
Copy
Compare
Share
Want to have your highlights saved across all your devices? Sign up or sign in
Papiamentu Bible with DC © Bible Society in Netherlands Antilles and Aruba, 2012, 2013
