Nahum 1
1
Introdukshon
1Mensahe di Dios tokante Nínive.#Isaías 10:5-34; 14:24-27; Sofonías 2:13-15 Relato di e vishon ku Nahum di e pueblo di Elkos a haña.
Dios su furia kontra Nínive
2Dios ta defensor di su honor,
vengativo ta SEÑOR.#Éksodo 20:5-6; Deuteronomio 4:24
Yen di furia E ta tuma vengansa;
vengansa E ta tuma kontra su atversarionan,
E ta sulfurá kontra su enemigunan.
3SEÑOR no ta rabia lihé,
pero E tin forsa poderoso:
SEÑOR no ta keda sin kastigá.
Kaminda E pasa tin warwarú i mal tempu,
nubianan ta stòf ku su pia ta lanta.
4E ta menasá laman i laman ta seka,
awa di tur riu ta disparsé.
Asta kunukunan di yerba bèrdè na Bashan ta kabishá,
kabes di seru di Karmel ta marchitá,
tur flor riba seru di Libanon ta muri.
5Den presensia di SEÑOR#Salmo 97:5; Mikéas 1:4
serunan ta tembla,
seritunan ta tambaliá.
Ora SEÑOR aparesé, tera ta sakudí
i mundu ku tur loke tin riba dje, ta tembla.
6Ken por enfrentá SEÑOR su furia?
Ken por soportá kayente di su rabia?
Su ira ta plama manera vlandam di kandela;
barankanan ta rementá na pida pida su dilanti.
7SEÑOR ta bon;
E ta un fòrti den tempu di angustia;
un refugio pa tur ku skonde serka djE.
8Pero ku un diluvio ku ta lastra tur kos bai kuné,
E ta bari e lugá kaminda Nínive ta keda,
E ta kore ku su enemigunan i hinka nan den skuridat di morto.
9Maske kua kòmplòt, boso ninivitanan, trama kontra SEÑOR,
E ta destruí boso kompletamente.
Lo boso no kousa su pueblo niun otro angustia mas.
10Boso por ta manera rama di sumpiña iflèktu den otro
i papa muhá di bibida,
tòg boso lo kima manera yerba seku.
11For di bo, Nínive, a sali un hòmber, ku a trama maldat kontra SEÑOR,
unu ku a traha plannan malbado.
12Esaki SEÑOR ta bisa su pueblo:
‘Maske kon fuerte i numeroso e ninivitanan ta,
lo kòrta nan bash'abou i nan lo kaba na nada.
Mi a humiliá boso,
pero Mi no ta hasié mas.
13Lo Mi ranka yugo di Asiria for di riba boso lomba
i kibra boso kadenanan na pida pida.’
14Pero kontra abo, Nínive, SEÑOR ta dekretá lo siguiente:
‘Bo nòmber lo no perdurá
i Mi ta destrosá e diosnan falsu den bo tèmpel.
Mi mes lo koba bo graf, pasobra bo no meresé bida.’
15 # 1:15—2:13 ta korespondé ku v. 2:1-14 den teksto hebreo. Mira, ata un mensahero ta bini riba seru ku bon notisia.
E ta na kaminda pa anunsiá un tempu di pas.#Isaías 52:7
Pueblo di Huda, selebrá bo fiestanan
i kumpli ku e promesanan, hasí na Dios.
Nunka mas mal hende lo no invadí bo pais.
Nan ta kompletamente destruí.
Currently Selected:
Nahum 1: BPK13
Highlight
Share
Copy
Want to have your highlights saved across all your devices? Sign up or sign in
Papiamentu Bible with DC © Bible Society in Netherlands Antilles and Aruba, 2012, 2013