Mateo 19
19
Divorsio
(Marko 10:1-12; Lukas 16:18)
1Despues ku Hesus a kaba di papia, El a sali for di Galilea i a bai e parti di Hudea, na otro banda di riu di Yordan. 2Un multitut grandi a siguiÉ i El a kura e hende malunan einan.
3Algun fariseo ku ker a lag'É kai den trampa, a bini serka djE i puntr'É: ‘Un hòmber mag divorsiá di su kasá pa kualke motibu?’ 4Hesus a kontestá nan: ‘Boso no a lesa ku na kuminsamentu, Kreador a krea nan hòmber i muhé?#Génesis 1:27; 5:2 5I El a bisa: “P'esei un hòmber ta bai laga su mama i su tata pa uni ku su kasá i nan dos lo bira ún.”#Génesis 2:24 6Asina nan lo no ta dos persona mas sino ún. Ke men hende no mag separá loke Dios a uni den matrimonio.’ 7Nan a kontest'É: ‘Pakiko antó Moises a ordená pa un hòmber traha un papel di divorsio i manda su kasá bai?’#Deuteronomio 24:1-4; Mateo 5:31 8Hesus a bisa nan: ‘Moises a duna boso pèrmit pa divorsiá di boso kasá pasobra boso ta tèrko. Ma den kuminsamentu, no tabata asina. 9Pero Ami ta bisa boso: Esun ku, pa kualke otro motibu ku no ta inmoralidat, manda su kasá bai i kasa ku un otro muhé, ta kometé adulterio.’#19:9 Tin manuskrito ku ta añadí: Si e promé muhé ei kasa ku otro hende, e tambe ta kometé adulterio (kompará Marko 10:12).#Mateo 5:32; 1 Korintionan 7:10-11 10Su disipelnan a bis'É: ‘Si ta asina ta bai entre hòmber i muhé, mihó no kasa antó.’ 11Hesus a sigui bisa: ‘Loke boso ta bisa no ta posibel pa tur hende; solamente pa esnan ku Dios ta laga biba asin'ei. 12Pasobra tin diferente motibu pa kual hende no ta kasa; tin ku no por kasa, pasobra nan a nase asina; otro hende no por kasa pasobra hende a hasi nan asina ei; i otro no ta kasa pa motibu di reino di Dios. Esun ku por komprondé, lag'é komprondé.’
Hesus ta bendishoná algun mucha
(Marko 10:13-16; Lukas 18:15-17)
13Algun hende a trese algun mucha pa Hesus pone man riba nan i resa ku nan, ma e disipelnan a skual e hendenan. 14Hesus a bisa e disipelnan: ‘Laga e muchanan bini serka Mi. No kita nan di bini, pasobra reino di Dios ta pertenesé na esnan manera nan.’ 15Despues di a pone man riba nan, El a bai for di ei.
Hesus ta kombersá ku un hòmber riku
(Marko 10:17-31; Lukas 18:18-30)
16A sosodé ku un hòmber a aserká Hesus i puntr'É: ‘Maestro, ki bondat mi mester hasi pa mi haña bida eterno?’ 17Hesus a kontest'é: ‘Pakiko bo ta puntra Mi tokante bondat? Ta Dios so ta bon! Pa bo haña bida eterno, bo mester kumpli ku e mandamentunan.’ 18E hòmber a puntra: ‘Kua di nan?’ Hesus a sigui bis'é: ‘No mata;#Éksodo 20:13; Deuteronomio 5:17 no kibra fidelidat di matrimonio;#Éksodo 20:14; Deuteronomio 5:18 no hòrta;#Éksodo 20:15; Deuteronomio 5:19 no duna testimonio falsu;#Éksodo 20:16; Deuteronomio 5:20 19honra bo mama i bo tata;#Éksodo 20:12; Deuteronomio 5:16 i stima bo próhimo, manera bo ta stima bo mes.’#Levítiko 19:18 20E hóben a kontestá Hesus: ‘Mi a tene mi na tur e mandamentunan ei. Kiko mi falta ainda?’ 21Hesus a bis'é: ‘Si bo ke ta perfekto, bai bende bo propiedatnan, duna pober e sèn i lo bo tin tesoro den shelu. Despues bin sigui Mi.’ 22Ora e hóben a tende e palabranan akí, el a kita bai ku tristesa, pasobra e tabata mashá riku.
23Hesus a bisa su disipelnan: ‘Mi ta sigurá boso: esta difísil ta pa un hende riku drenta reino di shelu.’#Proverbionan 11:28 24Laga Mi bisa aserká: ‘Ta mas fásil pa un kamel pasa dor di wowo di un angua, ku pa un riku drenta reino di Dios.’ 25Ora e disipelnan a tende e kos ei, nan a spanta mashá i nan tabata puntra: ‘Ta ken antó por haña salbashon?’ 26Hesus a keda mira nan duru den nan kara i bisa: ‘Pa hende, esei ta imposibel, ma pa Dios tur kos ta posibel.’ 27Pedro a bis'É: ‘Mira kon nos a laga tur kos i sigui Bo. Kiko nos ta haña?’ 28Hesus a kontestá nan: ‘Mi ta sigurá boso: Den e era nobo, ora Yu di hende sinta riba su trono glorioso,#Mateo 25:31 boso ku ta mi siguidó lo sinta riba diesdos trono pa husga e diesdos tribunan di Israel.#Lukas 22:30 29Ken ku bandoná su kas, su ruman hòmber i su ruman muhé, su mama, su tata, su yunan òf su terenonan pa mi motibu, lo haña shen be mas tantu ku esei i tambe bida eterno. 30Sinembargo hopi di esnan ku awor ta di promé, lo ta delaster i hopi di esnan ku awor ta delaster, lo ta di promé.’#Mateo 20:16; Lukas 13:30
Currently Selected:
Mateo 19: BPK13
Highlight
Share
Copy
Want to have your highlights saved across all your devices? Sign up or sign in
Papiamentu Bible with DC © Bible Society in Netherlands Antilles and Aruba, 2012, 2013