Mateo 18
18
Ken ta mas importante?
(Marko 9:33-37; Lukas 9:46-48)
1Den e tempu ei, e disipelnan a aserká Hesus i bis'É: ‘Ken ta mas importante den reino di shelu?’#Lukas 22:24 2Hesus a yama un mucha chikí pon'é para meimei di nan, 3i bisa: ‘Mi ta sigurá boso: si boso no kambia bira manera mucha, boso lo no por drenta reino di Dios.#Marko 10:15; Lukas 18:17 4Esun ku ta humilde manera e mucha akí, ta esun di mas importante den reino di Dios. 5I es ku risibí un mucha asin'akí den mi nòmber, ta risibí Mi mes.
Tentashon pa kai den piká
(Marko 9:42-48; Lukas 17:1-2)
6Pa e hende ku pone un di e chikínan akí ku ta konfia den Mi, kai den piká, ta mihó si mara un piedra grandi di mulina rònt di su garganta i hog'é den laman. 7Ta tristu ku den mundu tin kos ku ta pone hende kai den piká. Awor no por evitá ku tin kos ku ta pone hende kai den piká, ma ai di e persona ku ta pone otro hende pèrdè fe.
8Si bo man òf bo pia ta pone bo kai den piká, kap e kita afó; mihó drenta bida eterno mankaron òf koho, ku bai tirá den e kandela ku no ta paga nunka mas, ku dos man òf dos pia.#Mateo 5:30 9Si ta bo wowo ta pone bo kai den piká, rank'é saka afó; mihó bo drenta bida eterno ku un wowo so, ku bai tirá den kandela di fièrnu ku dos wowo.#Mateo 5:29
Parábola di e karné pèrdí
(Lukas 15:3-7)
10Sòru pa boso no trata niun di e chikitunan akí ku menospresio. Un kos Mi por bisa boso: e angelnan ku ta enkargá ku nan, ta den presensia di mi Tata den shelu.#Ezekiel 34:16; Lukas 19:10 [11Yu di hende a bini pa salba esun ku ta pèrdí!] 12Kiko ta boso opinion tokante lo siguiente. Suponé ku ún karné di un doño di shen karné pèrdè kaminda. E doño lo no laga e otro 99 karnénan den seru, pa e bai buska esun pèrdí? 13Mi ta sigurá boso: lo e ta mas kontentu ku esun ei, ora e hañ'é, ku e ta ku e 99 karnénan ku no a pèrdè kaminda. 14Meskos asina, boluntat di boso Tata den shelu ta, pa ningun di e chikitunan akí no bai pèrdí.
Un ruman ku peka
(Lukas 17:3)
15Si un ruman faya ku bo,#18:15 faya ku bo; otro manuskrito tin: faya bai serka dje i skual e, bo so kuné. Si e tende, bo a gana bo ruman bèk.#Sirag 19:13-17; Lukas 17:3 16Ma si e no tende di bo, bai ku un òf dos ruman mas, pasobra asina, manera Skritura ta bisa: Tur loke boso papia por keda konfirmá pa testimonio di dos òf mas testigu.#Deuteronomio 19:15 17Si e ruman nenga di tende, hiba henter e asuntu dilanti di iglesia. I si ainda e no ke tende, trat'é komo si fuera ta un pagano òf kobradó di belasting e ta.
18Mi ta sigurá boso: Loke boso prohibí na tera, lo ta prohibí den shelu tambe; loke boso pèrmití na tera, lo ta pèrmití den shelu tambe.#Mateo 16:19; Huan 20:23 19Mi ta sigurá boso tambe: si dos di boso resa di akuerdo ku otro pa kiko ku ta aki na tera, mi Tata ku ta den shelu, lo hasié pa boso. 20Pasobra kaminda dos òf tres reuní den mi nòmber, Ami lo ta huntu ku nan.’
Parábola di e kriá ku no ke pordoná
21E ora ei Pedro a aserká Hesus i puntr'É: ‘Señor, kuantu bia mi mester laga mi ruman peka kontra mi i tòg pordon'é? Te shete bia?’ 22Hesus a kontest'é: ‘Nò, no shete bia, ma setentishete bia.#18:22 setentishete bia; otro posibel tradukshon: setenta bia shete#Lukas 17:3-4 23P'esei por kompará reino di Dios ku lo siguiente. Tabatin un rei ku a disidí di hasi kuenta ku su kriánan ku tabata deb'é. 24Ora el a kuminsá hasi esaki, nan a trese un hòmber ku tabata deb'é sesenta mion moneda di plata. 25Komo ku e hòmber no por a paga su debe, rei a duna òrdu pa bend'é, ku kasá ku yu, ku tur su propiedat. 26E kriá a kai na rudia dilanti di rei i rog'é: “Tene pasenshi#18:26 Tene pasenshi; otro manuskrito tin: Mi shon, tene pasenshi ku mi; lo mi paga bo tur kos bèk!” 27Rei a haña duele di dje; el a lag'é bai i a kanselá e debe.
28E hòmber a sali for di ei, i topa un kriá ku tabata deb'é shen mil moneda di plata. El a kohe e kriá tene, chok'é i bis'é: “Paga mi loke bo debe mi!” 29E otro a tira su kurpa abou na suela i a rog'é: “Tene pasenshi ku mi; lo mi paga bo bèk!” 30Ma e hòmber no tabata ke, el a laga tira esun ku tabata deb'é den prizòn, te dia esaki pag'é tur su plaka. 31E otro kriánan ku a mira kiko a pasa, a bira tur aríbabou bai konta rei tur kos. 32E ora ei rei a manda yama e hòmber i bis'é: “Kriá mal hende! Mi a kanselá henter bo debe, djis pasobra bo a roga mi. 33Bo mester a tene mizerikòrdia ku bo kompañero kriá meskos ku ami a tene mizerikòrdia ku bo.” 34Rei a rabia mashá pisá i entreg'é na e wardadónan di prezu pa tortur'é te dia e paga tur su debe.
35Meskos asina, mi Tata ku ta den shelu, lo hasi ku kada un di boso, ku no pordoná su ruman di kurason.’#Sirag 28:3-4
Currently Selected:
Mateo 18: BPK13
Highlight
Share
Copy
Want to have your highlights saved across all your devices? Sign up or sign in
Papiamentu Bible with DC © Bible Society in Netherlands Antilles and Aruba, 2012, 2013