Yozue 14
14
Yozue ta repartí Kanaan
1Esakinan ta e terenonan ku e israelitanan a haña komo propiedat na Kanaan. Saserdote Eleazar i Yozue, yu di Nun, huntu ku e kabesnan di famia dje tribunan a duna e israelitanan e terenonan ei. 2Dor di tira lòt kada un di e nuebe tribunan i e mitar tribu a haña nan propiedat, manera SEÑOR a ordená tempu di Moises.#Numbernan 26:52-56; 34:13 3E otro dos tribunan i e mitar tribu ya Moises a duna e tereno ost di Yordan komo propiedat.#Numbernan 32:33; 34:14-15; Deuteronomio 3:12-17 Tribu di Levi sí no a haña tereno komo propiedat; 4wèl nan a haña siudat pa nan biba, ku e kunuku rondó di nan pa nan bestianan. E desendientenan di Jozef tabata forma dos tribu: Manase ku Efraim. 5E israelitanan a parti e pais manera SEÑOR a ordená Moises.
Kaleb ta haña Hebron komo propiedat
6Algun hende di tribu di Huda a bai Guilgal serka Yozue. Un di nan, Kaleb, yu di Yefune, di famia di Kenaz, a bisa Yozue: ‘Bo ta kòrda loke SEÑOR a bisa su profeta Moises na Kadesh-Barnea tokante di mi ku bo?#Numbernan 14:30; Sirag 46:9 7Mi tabatin kuarenta aña tempu ku sirbidó di SEÑOR, Moises, a manda mi for di Kadesh-Barnea bai eksplorá e pais akí. Ora mi a bini bèk mi a kont'é tur kos segun mi konsenshi.#Numbernan 13:1-30 8Mi kompañeronan a hinka sustu den e israelitanan, pero ami a keda fiel na SEÑOR, mi Dios. 9P'esei Moises a hura mi e tempu ei: “E tera ku bo pia toka lo bira propiedat di bo i bo desendientenan pa semper, pasobra bo a keda fiel na SEÑOR, mi Dios.”#Numbernan 14:24 10I SEÑOR a tene mi na bida manera El a primintí. Ya ta 45 aña ku SEÑOR a bisa Moises e kos ei. E tempu ei ainda Israel tabata den desierto. Awor akí mi tin 85 aña 11i mi ta mes duru ku tempu Moises a manda mi bai eksplorá e pais; ketu bai mi ta sinti mi kapas di por bringa òf kumpli ku kualke enkargo meskos ku e tempu ei.#Sirag 46:9
12P'esei mi ta pidi bo duna mi e region di e serunan; e region ku SEÑOR a primintí mi e tempu ei. Bo mes a tende e tempu ei ku aya tin anakitanan ta biba den siudat grandi i reforsá; kasi sigur SEÑOR lo ta ku mi i lo mi kore ku nan, manera El a bisa.’ 13E ora ei Yozue a bendishoná Kaleb i a dun'é siudat Hebron komo propiedat. 14Asina Hebron a keda propiedat di Kaleb i su desendientenan te dia djawe, pasobra Kaleb a keda fiel na SEÑOR, Dios di Israel. 15Promé aya Hebron tabata yama Kiriat-Arba. (Arba tabata e anakita di mas famoso.)
Awor tabata reina pas den e pais.
Currently Selected:
Yozue 14: BPK13
Highlight
Copy
Compare
Share
Want to have your highlights saved across all your devices? Sign up or sign in
Papiamentu Bible with DC © Bible Society in Netherlands Antilles and Aruba, 2012, 2013
