Isaías 53
53
1Ken lo kere loke nos ta anunsiá?#Romanonan 10:16
Ken lo biba kere
ku poder di SEÑOR lo manifestá su mes di e manera ei?#Huan 12:38
2Manera un planchi su sirbidor a krese bai laria,#53:2 su sirbidor…laria; literalmente: el a krese dilanti di djE
manera rais ku ta spreit den tera seku;
sin forma ni bunitesa pa hala nos atenshon,
su aparensia no a atraé nos.
3E tabata despresiá, bandoná pa tur hende,#Salmo 22:6-7; Isaías 49:7
un hòmber ku konosé doló,
ku sa di sufrimentu;
ku ta pone bo kita kara p'e,
despresiá, konsiderá sin balor.
4Sinembargo ta nos enfermedatnan el a karga
i ta nos doló el a soportá,#Mateo 8:17
ma nos a mir'é komo hende ku Dios a marka,
ku El a kastigá i humiliá.
5Pero nan a bor'é pa motibu di nos rebeldia,
plèch'é pa motibu di nos piká;
kastigu k'el a pasa a trese pas pa nos;
danki na su yaganan nos a haña kura#1 Pedro 2:24
6Nos tur a kana dualu manera karné,
kada un riba su mes kaminda,
pero SEÑOR a lag'é karga tur nos maldat.
7El a laga nan maltrat'é i humili'é
sin protestá, sin papia un pi'e palabra,
ketu manera un lamchi hibá matadero,#Revelashon 5:6
sin habri su boka
manera karné den man di feitadó.
8Nan a koh'é prezu, sentensi'é,
kaba lastr'é bai kuné.
Ken ta preokupá ainda pa su desendensia!
Nan a rank'é fo'i riba mundu,#Echonan 8:32-33
mat'é pa piká di mi pueblo.
9Nan a der'é serka malbadonan,
su graf tabata meimei di rikunan,#1 Pedro 2:22
ounke e no a kometé ningun maldat
ni nunka un mentira no a sali fo'i su boka.
10Pero SEÑOR ker a kibr'é,
p'esei El a pon'é sufri.
Ya komo el a paga ku su bida pa piká,
lo e tin bida largu i mira su desendientenan.
Dios lo us'é pa realisá su plan!
11Despues di tantu sufrimentu l'e mira lus
i lo e ta satisfecho.#53:11 l'e mira…satisfecho: segun dos manuskrito hebreo deskubrí na Qumran; otro manuskrito hebreo tin: lo e mira resultado di sufrimentu di su alma i lo e ta satisfecho
SEÑOR ta bisa di dje:
‘Mi sirbidor konosé mi boluntat.
Dor ku e mes ta inosente
e ta libra hopi hende di piká,
pasobra e ta tuma nan maldat riba su lomba.
12P'esei Mi ta dun'é un lugá meimei dje grandinan
i l'e triunfá huntu ku poderosonan,
pasobra el a entregá su bida te na morto
i laga nan tum'é pa malbado,#Marko 15:28; Lukas 22:37
ora en realidat
el a tuma piká di hopi hende riba su lomba
i a boga pa pekadónan.’
Currently Selected:
Isaías 53: BPK13
Highlight
Copy
Compare
Share
Want to have your highlights saved across all your devices? Sign up or sign in
Papiamentu Bible with DC © Bible Society in Netherlands Antilles and Aruba, 2012, 2013
