Isaías 50
50
Dios ta skucha keho di su pueblo
1SEÑOR ta hasi boso e siguiente pregunta:
‘Si ta bèrdè ku t'Ami a kore ku boso mama Herusalèm,
mustra mi e sertifikado antó
ku ta proba ku M'a repudi'é.
Akaso M'a bende boso komo katibu pa paga mi debenan?
Nò, a bende boso pa motibu di boso piká.
Si a kore ku boso mama,
ta pa motibu di boso rebeldia!
2Unda boso a keda ora M'a bin testiguá?
Di kon niun hende no a reakshoná riba mi defensa?
Akaso boso ta pensa ku Mi n' tin basta forsa
pa reskatá boso,
ku mi brasa n' ta basta largu
pa liberá boso?
Sinembargo mi menasa so ya ta seka riunan i laman:
piská ta muri di set
i putri bai pa falta di awa.
3Mi por bisti shelu na pretu ku paña di rou.’
Sirbidor di Señor (di tres kanto)
4SEÑOR Dios a duna mi un lenga ábil,
ku sa kon papia pa animá hende desanimá.
Tur mainta Señor ta laga mi spièrtá
ku deseo pa tend'É.
Anto mi ta skuch'É manera un alumno atento.
5SEÑOR Dios ta siña mi skucha bon.
Mi no ta bai kontra djE
ni bèk pa su enkargo.
6Mi ta bira mi lomba duna esun ku ke suta mi,
si e ke ranka mi barba, mi ta dun'é mi kara.
Mi no ta kita kara,
ora nan chèrchè mi i skupi riba mi.#Mateo 26:67; Marko 14:65
7Nan ta kere ku bèrgwensa lo pone mi baha kabes,
pero SEÑOR Dios ta bin yuda mi.
P'esei mi kara no ta ni trèk,
m'a hasié duru manera piedra.
Mi n' ta keda brongosá,
esei ta sigur!
8Mi tin Un ku ta yuda proba mi inosensia.
Ya E ta na kaminda.
Ken ta tribi denunsiá mi?
Lag'é ban serka hues ku mi.
Ken ke trese algu dilanti kontra mi?
Lag'é enfrentá mi!
9Sí, SEÑOR Dios ta bin yuda mi.
Ken por deklará mi kulpabel?
Tur ku akusá mi ta peresé,
ta gasta manera paña bieu ku mòt a kome.#Romanonan 8:33-34
10Kua di boso ta rekonosé outoridat di SEÑOR
i ta skucha su sirbidor?
E mester sa ku,
maske e kana den skuridat
sin niun tiki klaridat,
SEÑOR ta sosten'é,
e por konfia riba djE.
11Pero boso ku ta sende kandela
i ta arma boso mes ku flecha ardiente,
ata loke ta warda boso:
vlamnan di boso mes kandela,
flechanan ku boso mes a sende!
Ata boso suerte akí, ku SEÑOR a prepará:
boso lo keda abou na suela ta trose di doló.
Currently Selected:
Isaías 50: BPK13
Highlight
Copy
Compare
Share
Want to have your highlights saved across all your devices? Sign up or sign in
Papiamentu Bible with DC © Bible Society in Netherlands Antilles and Aruba, 2012, 2013
