Efesionan 5
5
1Unabes ku boso ta Dios su yu stimá, hasi esfuerso pa sigui su ehèmpel. 2Biba den amor; tuma ehèmpel di Kristu ku a stima nos i a entregá su bida pa nos komo un sakrifisio ku ta hole dushi, un ofrenda ku ta agradá Dios.#Éksodo 29:18; Salmo 40:6
3No ta pas pa esnan ku ta pertenesé na e pueblo santu hasi ni menshon mes di kos manera inmoralidat, kualke tipo di impuresa òf avarisia! 4Tampoko no ta pas pa papia palabra grosero, papia kos di loko, konta chiste indesente. Ma al kontrario gradisí Dios. 5Boso por ta sigur di esaki: niun hende ku ta inmoral, impuru i haragan pa kos — e último kos ei ta igual na idolatria — no por tuma parti den reino di Kristu i di Dios!
Hende ku ta biba den lus
6No laga niun hende ku bini ku palabra sokete, gaña boso. Pasobra ta eksaktamente pa motibu di e tipo di kos ei mes, Dios lo kastigá e hendenan ku no ke tende di djE. 7P'esei antó no sea kómplise di e hendenan ei! 8Un tempu boso mes tabata den skuridat, ma awor ku boso ta uní ku Señor, boso ta den lus! Komportá boso pues manera hende ku ta biba den lus. 9Ta lus#5:9 Ta lus; otro manuskrito tin: Spiritu Santu ta produsí tur klase di bondat, hustisia i bèrdat. 10Purba diserní loke ta agradá Señor. 11No partisipá na e aktonan inútil di hende ku ta biba den skuridat, pero eksponé nan aktonan! 12Bo ta haña asta bèrgwensa di menshoná e kosnan ku nan ta hasi den sekreto! 13I ora un kos bai den lus, su naturalesa berdadero ta sali na kla, 14pasobra tur kos ku keda revelá den un forma kla, ta bira igual na lus. P'esei tin bisá:
‘Abo ku ta drumí, lanta;
lanta for di morto!
Pa Kristu bria riba bo!’
15Paga bon tinu antó kon komportá boso,#5:15 Paga…boso; otro manuskrito tin: Mira pa boso komportá boso ku kuidou no manera hende bobo, sino ku sabiduria! 16I probechá di kualke oportunidat ku presentá,#Kolosensenan 4:5 pasobra nos ta biba den tempu malu. 17P'esei no sea insensato, ma buska pa konosé boluntat di Señor. 18No bebe burachi, pasobra biña ta pone hende pèrdè kabes, ma laga Spiritu Santu yena boso. 19Kanta salmo-, himno- i kantikanan inspirá, pa otro. Kanta i toka pa Señor ku henter boso kurason. 20Semper yama Dios Tata danki pa tur kos, den nòmber di nos Señor Hesu-Kristu.#Kolosensenan 3:16-17
Relashon den matrimonio
21Someté boso na otro pa motibu di e rèspèt ku boso tin pa Kristu.
22Señoranan, someté boso na boso esposo,#Kolosensenan 3:18; 1 Pedro 3:1 manera boso ta someté boso na Señor! 23E hòmber ta kabes di su esposa, manera Kristu ta kabes di iglesia. Tambe Kristu ta salbador di iglesia, ku ta su kurpa. 24Pues manera iglesia ta someté na Kristu, e muhénan tambe mester someté, sin reserva, na nan esposo.
25Hòmbernan, stima boso esposa,#Kolosensenan 3:19; 1 Pedro 3:7 manera Kristu a stima iglesia i a entregá su bida p'e. 26Esaki Kristu a hasi pa E limpia iglesia i konsagr'é na Dios pa medio di awa i su palabra. 27Asina El a prepará un iglesia radiante, sin mancha, ploi òf algu paresido, un iglesia santu i sin kulpa, pa E mes.#2 Korintionan 11:2; Revelashon 21:2,9 28Ta asin'ei hòmbernan mester stima nan esposa; nan mester stima nan manera nan ta stima nan mes kurpa, pasobra e hòmber ku ta stima su esposa, ta stima su mes! 29Nunka niun hende no a odia su mes kurpa; ma e ta kuid'é i aliment'é. Esei ta loke Kristu ta hasi ku su iglesia, 30pasobra ta su kurpa. I nos ta miembro di e kurpa ei.#5:30 Tin manuskrito ku ta añadí: di su karni i wesu.
31Skritura ta bisa: ‘P'esei un hòmber lo laga su tata i su mama pa uni ku su kasá i nan dos lo ta un.’#Génesis 2:24 32Tin un gran bèrdat skondí den e asuntu akí i mi ta relashon'é ku iglesia. 33Ma e ta konta pa boso tambe: Kada hòmber mester stima su mes esposa manera e ta stima su mes i kada muhé mester respetá su esposo.
Currently Selected:
Efesionan 5: BPK13
Highlight
Share
Copy
Want to have your highlights saved across all your devices? Sign up or sign in
Papiamentu Bible with DC © Bible Society in Netherlands Antilles and Aruba, 2012, 2013