Predikador 3

Tur kos tin su tempu

1Tur kos tin su ora i su tempu, tur kos aki na mundu:

2ora pa nase i ora pa muri,

ora pa planta i ora pa koba saka fo'i tera,

3ora pa mata hende i ora pa kura,

ora pa basha abou i ora pa konstruí,

4ora pa yora i ora pa hari,

ora pa tene luto i ora pa balia,

5ora pa plama piedra i ora pa pone nan huntu,

ora pa brasa otro i ora pa kita fo'i otro,

6ora pa buska i ora pa resigná,

ora pa warda kos i ora pa tira kos afó,

7ora pa sker kibra i ora pa drecha,

ora pa keda ketu i ora pa papia,

8ora pa stima i ora pa odia,

ora pa guera i ora pa pas.

9Kiko hende ta gana ku matament'i kurpa? 10Mi a mira e tarea pisá ku Dios a duna hende pa mata kurpa kuné. 11Ta un smak pa mira kon tur tur kos ta tuma lugá na su debido tempu. Dios a duna hende tambe un gana fuerte di sinta pensa riba tempu i riba loke ta pasa den e tempu ei. Pero tòg asina mes hende no por saka afó kiko Dios a hasi for di kuminsamentu te na final.#Salmo 139:17; Isaías 55:8-9; Romanonan 11:33 12Mi a ripará ku pa hende no tin nada mihó ku biba kontentu i hasi bon tanten bo ta na bida, 13pasobra ku nos ta kome i bebe i ta kontemplá e benefisionan di nos trabou, ta pasobra Dios a pèrmití nos. 14Mi a mira ku tur kos ku Dios hasi ta keda meskos;#Salmo 33:11 no tin nada di añadí ni nada di kita afó; Dios a traha nan asina, pasobra Dios ke pa hende tene rèspèt di djE.

15Loke tin awor akí, tabat'ei promé ayá kaba,

i loke bin aworó tambe tabat'ei kaba.

Dios ta laga e mesun kos sosodé kada be di nobo atrobe.

16Mi por a ripará tambe ku riba e mundu akí

tin korupshon i maldat,

kaminda mester tin hustisia i rektitut.

17P'esei mi ta bisa ku Dios

lo husga e hòmber hustu i e mal hende,

pasobra tur kos ku pasa

i tur loke hende hasi tin su tempu.

18Mi a pensa tambe, tokante kondukta humano, ku Dios ta pone hende na prueba pa nan realisá ku nan tambe ta manera animal. 19Destino di hende ta manera di animalnan; e mesun destino ta warda nan: meskos ku esun ta muri, e otro tambe ta muri. Tur dos ta hala rosea; hende no#Salmo 49:12,20 tin bentaha riba bestia. Tur kos ta ilushon. 20Ta dera nan tur dos den e tera for di kua a traha nan i finalmente tur dos ta kaba bira tera atrobe.#Génesis 3:19; Job 34:15; Sirag 17:1 21Ken por proba ku rosea di hende ta subi bai laria i rosea di bestia ta baha bai abou?#Predikador 12:7

22Asina mi a mira ku no tin nada mihó pa hende ku gosa di su trabou, pasobra ta esei ta su destino. Pasobra ken por bis'é kiko ta sosodé ora e no t'ei mas?

Currently Selected:

Predikador 3: BPK13

Highlight

Copy

Compare